Read Ыдыктыг Библия, 2011 Исаия 9 Bible Online

Исаия 9 - Ыдыктыг Библия, 2011 bible

Исаия 9

¹Эрткен үеде Завулоннуң база Неффалимниң черин куду көрүп турган, а келир үеде өске чоннар чурттаан Галилеяны, далайже баар орукта черни болгаш Иордан хемниң ындында черлерни алдаржыдар.

²Караңгыга чурттап орган чон өндүр улуг чырык көрүп кагды, дүмбей бүргээн черге чурттаан улуска чырык чайыннап келди.

³Сен чонну көвүдедип, аңаа улуг өөрүшкүнү хайырладың. Ол Сээң мурнуңга, дүжүт ажаалдазының үезинде өөрүүрү дег, олча-тывыш үлежип тура, өөрүп-байырлаары дег, өөрүп-хөглээр.

⁴Мадиан чонну чылча шапкан хүнүңде дег, Сен Бодуңнуң чонуңну хилинчектээн дөңгүнү, ооң эгиннеринде аар чүъктү уштуп, ооң кызагдакчызының мергезин сыйып кагдың.

⁵Тулчуушкунга киришкен дайынчыларның идиин, ханга борашкан хевин өрттедири-биле бериптер, олар отка чемиш болур.

⁶Чаш төл бис дээш төрүттүнген, оолду биске берген болгай! Эрге-чагырга демдээ ооң эгиннеринде, ол «Кайгамчык чөвүлекчи», «Мөге-шыырак Бурган», «Мөңге ада», «Амыр-тайбың хайырлаар чагырыкчы» деп адаттырар.

⁷Ооң эрге-чагыргазы база хайырлаар амыр-тайбыңы кызыгаар чок көвүдээр. Ол Давид хаанның дүжүлгезинге саадап, ооң күрүнезин чагырып, ону шын шииткел болгаш чөптүг чорук-биле амдыгааштан эгелээш, кезээ мөңгеде доктаадып, быжыглаар. Аг-шериглиг Дээрги-Чаяакчының күштүг күзели ол бүгүнү боттандырар!

⁸Дээрги Иаковка удур шииткел сөзү ыткан, ол сөс Израильдиң кырынга дүжер.

⁹[9-10] Ол сөстү бүгү израиль чон биле Самарияның чурттакчылары билип алгаш-даа, улуургак, турамык сеткил-чүрээнден: «Тууйбу бажыңнарны бузуп кагза-даа, чонуп каан даштар-биле катап тудуп аар бис; ыяш тудугларны үреп кагза-даа, пөштен кылган тудуглар-биле солуп аар бис» — деп турар-дыр.

¹¹Дээрги-Чаяакчы оларга удур Рецинниң дайзыннарын көдүрер, оларның өжээтеннерин ыдалаар.

¹²Арамейлер чөөн чүктен, филистимнер — барыын чүктен халдап келгеш, Израильди чазыйланып, ажырыптар. Ынчан безин Дээрги-Чаяакчының килеңи чайлаттынмас, Ооң холу ам-даа чонну кезедип, көдүрлүр.

¹³Ынчалза-даа чон ону ам-даа соп турар Бурганче ээлбейн баар, Аг-шериглиг Дээрги-Чаяакчыже чүткүвейн баар.

¹⁴Дээрги-Чаяакчы чаңгыс хүнде Израильдиң бажын-даа, кудуруун-даа одура шавар, бедик-чаагай будуктарны-даа, хыыргыышты-даа кезе шавар.

¹⁵Баш дээрге баштыңнар болгаш ызыгууртаннар-дыр, кудурук дээрге меге чүвеге өөредир бүдүү билирлер-дир.

¹⁶Башкарыкчылары бо чонну өскээр эдерткен: оларга башкарткан улус оруундан аза берген.

¹⁷Ынчангаш Дээрги ол чоннуң аныяк оолдары дээш сеткили өөрүвес, өскүстерин, дулгуяк херээженнерин кээргевес, чүге дээрге олар шупту — бужартаан, бузут үүлгедир улус-тур, оларның аас-сөзү чүгле чүдек-бужар чүве чугаалаар. Ынчан безин Дээрги-Чаяакчының килеңи чайлаттынмас, Ооң холу ам-даа чонну кезедип, көдүрлүр.

¹⁸Оларның бузуду от ышкаш чалбыышталып, тенниг бок үнүштү чип, арга-арыгны өрттедип тур — ыш адагашталдыр көдүрлүп үнүп тур.

¹⁹А Аг-шериглиг Дээрги-Чаяакчының килеңи черни өрттендир чиир, чон оттуң чемижи апаар. Кым-даа бодунуң ха-дуңмазын кээргевес;

²⁰оң талазындан үзе соп сыыргаш, аш артар; солагай талазындан чигеш, тотпайн баар. Кижи бүрүзү бодунуң холунуң эъдин [12] чиир.

²¹Манассия Эфремни, Эфрем — Манассияны чиир, олар ийилээн Иудеяже халдаар! Ынчан безин Дээрги-Чаяакчының килеңи чайлаттынмас, Ооң холу ам-даа чонну кезедип, көдүрлүр.