Read Ыдыктыг Библия, 2011 Иеремия 1 Bible Online

Иеремия 1 - Ыдыктыг Библия, 2011 bible

Иеремия 1

¹Хелкияның оглу Иеремияның сөстери бо-дур. Иеремия болза Вениаминниң аймааның черинде турар Анатот хоорай чурттуг Бурганның бараалгакчыларының бирээзи турган.

²Дээрги-Чаяакчы аңаа Бодунуң сөзүн Амоннуң оглу иудей хаан Иосияның хааннаашкынының он үшкү чылында ажыдып эгелээн.

³Дээрги-Чаяакчы Иеремияга Иосияның оглу иудей хаан Иоакимниң чагырган үезинде база сөөлзүредир — Иосияның оглу иудей хаан Седекияның хааннаашкынының он бирги чылын төндүр чугаалап келген. Ол-ла чылдың бешки айында дайзыннар Иерусалимниң чурттакчыларын тудуп алгаш, сүрүп аппарган.

⁴[4-5] Дээрги-Чаяакчы меңээ Бодунуң сөзүн ажыдып: «Хырын иштинге ботталдырып кааным мурнунда-ла сени билир турдум, иең иштинден үнүп кээриң мурнунда-ла сени ыдыктап аңгылап кагдым, делегейниң чоннарынга медээчи кылдыр салып кагдым» — деп чугаалаан.

⁶Мен: «О, Дээрги-Бурган-Чаяакчы! Ам-даа аныяам кончуг болгаш, чүве чугаалап билбес-тир мен» — деп харыыладым.

⁷А Дээрги-Чаяакчы меңээ: «„Аныяк мен“ диве, Мен сени кымче-даа чорудупсумза, баар сен, Мээң сеңээ дужааган бүгү чүвемни чугаалаар сен!

⁸Кымдан-даа кортпа, чүге дээрге Мен сээң-биле боор мен, сени камгалаар мен» — дээн.

⁹Дээрги-Чаяакчы холун сунуп, аксымга дээскеш, меңээ: «Бодумнуң сөстеримни ам сээң аксыңдан үнер кылып кагдым.

¹⁰Көрдүң бе, Мен бөгүн сени чоннар, күрүнелерни харагалзаар кижи кылдыр томуйлап тур мен — дазылы-биле тура тыртар, үрегдээр, узуткаар, буурадыр, быжыглаар база тарып олуртур сен» — дээн.

¹¹Дээрги-Чаяакчы меңээ Бодунуң сөзүн ажыдып: «Иеремия, сен чүнү көрүп тур сен?» — деп чугаалады. Мен: «Миндаль ыяштың будуун көрүп тур мен» — деп харыыладым.

¹²Дээрги-Чаяакчы меңээ: «Шын көрүп турар-дыр сен, ол дээрге Мээң удумзуравайн [1] турарым ол-дур, Бодумнуң сөзүмнү күүседирим ол-дур» — дээн.

¹³Дээрги-Чаяакчы меңээ Бодунуң сөзүн база катап ажыдып: «Сен чүнү көрүп тур сен?» — деп чугаалады. Мен: «Хайынган пашче көрүп тур мен, ол паш соңгу чүкте турар-дыр» — деп харыыладым.

¹⁴Дээрги-Чаяакчы меңээ: «Бо черниң бүгү чурттакчыларын айыыл-халап соңгу чүктен хөме алыр-дыр» — дээн.

¹⁵«Мен ам соңгу күрүнелерниң бүгү аймактарын кыйгырар мен — деп, Дээрги-Чаяакчы медеглээн. — Олар чедип келгеш, Иерусалимниң ханаларын, Иудеяның бүгү хоорайларын дескиндир бүзээлээш, аймак бүрүзү бодунуң дүжүлгезин Иерусалимниң иштинге тургузуп аар.

¹⁶Мен Иудеяның үүлгеткен бүгү кем-буруузу дээш, ооң Менден ойталап, өске бурганнарга айдызаар өргүлдер кыпсып, холу-биле кылып алган дүрзүлеринге мөгейип турганы дээш, аңаа удур шииткелим үндүрер мен.

¹⁷А сен куруң куржанып белеткенип ал, баргаш, Мээң сеңээ дужааган чүвемниң шуптузун улуска чугаала, оларның мурнунга сирилеве, оон башка Мен сени, олар көрүп турда, сириледиптер мен!

¹⁸Бо черниң бүгү чурттакчылары — Иудеяның хааннары, нояннары, Бурганның бараалгакчылары болгаш карачал чону сеңээ удур болур, а Мен ам сени шивээ, демир адагаш, хүлер хана дег быжыг кылдыр тургузуп кагдым.

¹⁹Олар сеңээ удур халдап үнер, ынчалза-даа күш четпестер, чүге дээрге Мен сээң-биле боор мен — деп, Дээрги-Чаяакчы медеглээн. — Мен сени камгалаар мен».