Read Ыдыктыг Библия, 2011 Иеремия 10 Bible Online

Иеремия 10 - Ыдыктыг Библия, 2011 bible

Иеремия 10

¹Израиль чон! Дээрги-Чаяакчының сеңээ чугаалаан сөзүн дыңна!

²Дээрги-Чаяакчы: «Өске чоннарның оруун эдербеңер, оларның коргары дээрде онзагай чүүлдерден кортпаңар! — деп чугаалаан. —

³Өске чоннарның ёзу-дүрүмнери хоозун болгай: олар аргадан ыяш кезип эккээрге, шевер кижи ону балды-биле чазап кылгаш,

⁴алдын, мөңгүн-биле каастап каан база маска, кадаглар дузазы-биле тендиңневес кылдыр быжыглап каан дүрзү-бурганныг боор.

⁵Ногаа олурткан шөлде хоютку дег, ол дүрзү-бурганнар чугаа-сөс чок. Оларны улус көдүрүп, дажыглап чоруп турар, а боттары чаңгыс-даа базым кылып шыдавас. Олардан кортпаңар, олар хора халдадыр харыы-даа чок, ачы-дуза чедирер шаа-даа чок».

⁶Сеңээ дөмей кым-даа чок, Дээрги-Чаяакчы! Өндүр улуг-дур сен! Сээң адың өндүр бедик, күчү-күштүг!

⁷Сенден кортпас кижи бар бе, чоннарның Хааны? Чаңгыс Сеңээ ол бүгү чогуур-дур. Аймак-чоннарның бүгү мерген угаанныгларының аразында, бүгү күрүнелерде Сеңээ дөмей кым-даа чок!

⁸Ол улус мелегей болгаш бүдүүлүк. Оларның өөредии чөгенчиг — анаа-ла ыяш.

⁹Олар Фарсистен калбартыр соктап каан мөңгүн, Уфазтан алдын эккеп турар. Чазаныкчы, эзилдирикчи усчулар ол бүгүден дүрзү-бурганнар кылгаш, каас-коя хеп кедирип турарлар.

¹⁰А Дээрги-Чаяакчы — алыс шын Бурган-дыр, Ол — дириг Бурган, мөңге Хаан-дыр. Ооң килеңинден чер сирилээр, Ол хорадаарга, кандыг-даа чон шыдажыр харык чок боор.

¹¹Ол улуска: «Бурганнарыңар чер биле дээрни чаяаваан, олар чырык чер кырынга, дээр адаанга узуткаттырар [19]» — деп чугаалаңар.

¹²А Дээрги-Чаяакчы Бодунуң күчү-күжү-биле черни чаяап каан, Бодунуң мерген угааны-биле өртемчейни тудуп тургускан, Бодунуң угааны-биле дээрни хере азып каан.

¹³Ол үнүн дыңзыдарга, дээрде суглар шимээргей бээр; Ол булуттарны черниң кыдыг-кызыгаарындан бөлүп эккеп, чаъс чаап турда, чаңныктарны чаяап, Бодунуң шыгжамырындан хатты үндүр хадыдып турар.

¹⁴Билиг чок кижи бүрүзү сээдең [20]; шевер-даа эзилдирикчиниң шуткуп алган дүрзү-бурганы ооң адын баксырадыр, чүге дээрге ооң шуткаан чүүлдери — меге-дир, оларда тын чок.

¹⁵Олар хоозун куруг, кочуланчыг кылыглар-дыр, кеземче үези кээрге, олар чиде бээр.

¹⁶А Иаковтуң Үлүү болур Бурган ындыг эвес: бүгү чүвени Ол чаяаган, Израиль — Ооң өнчү болур аймаа база ээлээн чери, Ооң ады — Аг-шериглиг Дээрги-Чаяакчы!

¹⁷Бүзээлелде чурттап турар чон, чуртуңну кааптарынга белеткенип, эт-севиң чыып ал.

¹⁸Чүге дээрге Дээрги-Чаяакчы: «Мен бо удаада шак бо черниң чурттакчыларын үндүр сывырып, айыыл-халапка таварыштырар мен, оларны дайзыннары тудуп алзын» — дээн-дир.

¹⁹Ат болдувус! Хилинчээвис көрдүвүс, балыгларывыс саргып аарып тур. Бо аарышкыга төлептиг болган болгаш, шыдажып эртер апаар-дыр бис.

²⁰Бистиң оран-сававыс хоозураан-дыр, ооң хендирлерин [21] үзе тыртып каан-дыр. Оолдарывыс бисти каапкаш, чиде берген. Оран-сававысты тургузуп бээр, шывыгларын кырынче салып бээр кижи ам чок-тур.

²¹Чүге дээрге чагырыкчылар сээдеңнээн-дир, Дээрги-Чаяакчыже чүткүвестээн-дир. Ынчангаш олар ам чедимчелиг болбас, оларның албаты чону тоо быдарай берген.

²²Медээ чедип келди, соңгу чүкте чурттан улуг дааш-шимээн дыңналды! Иудеяның хоорайлары хоозурап, шөө-бөрүлер чурттаар чер апаар-дыр.

²³Билир бис, Дээрги-Чаяакчы: кижи бодунуң оруун чагырып шыдавас, баар уун башкарып шыдавас.

²⁴Бисти кезедип көрем, Дээрги-Чаяакчы, чүгле чөптүү-биле, килеңнээн үеңде эвес! Бисти чөгенчиг улус кылбайн көрем!

²⁵Сээң килеңиң Сени билбес чоннарже, Сээң адыңны мактавас аймактарже кыптыксын! Чүге дээрге олар израиль чонну сыырыпкан, ону чипкен, узуткап каан база ооң чурттаан черин хоозурадып каан болгай.