Read Ыдыктыг Библия, 2011 Иеремия 11 Bible Online

Иеремия 11 - Ыдыктыг Библия, 2011 bible

Иеремия 11

¹Дээрги-Чаяакчының Иеремияга ажыдып каан сөзү бо-дур:

²«Шак бо чагыг-керээниң сөстерин дыңнаңар, оларны Иудеяның чонунга, Иерусалимниң чурттакчыларынга медээлеңер.

³Оларга Дээрги-Чаяакчы, Израильдиң Бурганының сөстерин чугаала: бо чагыг-керээниң сөстерин тооп дыңнавас кижи каргаттырар.

⁴Чагыг-керээмни Мен силерниң ада-өгбеңерни, хайылдырар суугудан ужулган дег, Египеттен үндүре бергеш, оларга: „Мээң сөзүмнү тооп дыңнаңар, Мээң силерге дужааганым бүгү чүвени кылыңар, ынчан силер Мээң чонум болур силер, а Мен силерниң Бурганыңар болур мен“ — деп чугаалап, айтып-чагаан мен.

⁵Ынчаар кылыр болзуңарза, силерниң ада-өгбеңерге сүт болгаш ары чигири агып чыдар байлак черни — ам силерниң ээлеп турарыңар черни бээр болган даңгыраамны күүседир мен». Мен: «Ылап-ла ындыг, о Дээрги-Чаяакчы!» — деп харыыладым.

⁶Дээрги-Чаяакчы меңээ: «Бүгү бо сөстерни Иудеяның хоорайларынга, Иерусалимниң кудумчуларынга чарлап, чугаала. Шак бо чагыг-керээниң сөстерин дыңнаңар база күүседиңер!

⁷Мен силерниң ада-өгбеңерни Египеттен үндүре берген хүнүмден эгелээш, сагындырып келген мен, оларга бөгүнге чедир катап-катап сагындырып шаг болдум. Оларга: „Мээң сөзүмге чагыртыңар!“ — деп турдум.

⁸Ынчалза-даа олар тооп дыңнавады, кулаан ээктирбеди, кижи бүрүзү бодунуң бузуттуг чүрээниң чөрүү чоруунуң аайы-биле чурттап турду. Мен Бодумнуң чагыг-керээмни оларга күүседир кылдыр айтып-чагаан мен, ынчалза-даа олар күүсетпейн турду. Ынчангаш бо чагыг-керээниң бүгү каргыштары олар-биле чогуп бүдер кылып каар мен» — деп чугаалаан.

⁹Дээрги-Чаяакчы меңээ: «Иудеяның улус-чонунуң, Иерусалимниң чурттакчыларының аразында сүлчээ бар-дыр.

¹⁰Олар боттарының ада-өгбезиниң кем-буруузунче эглип келген-дир. Олар Мээң сөстеримни тооп дыңнаарындан ойталап, өске бурганнарга мөгейип, бараан болуп турду. Израиль биле Иудеяның улузу Мээң оларның ада-өгбези-биле чарган чагыг-керээмни үреди» — деп чугаалаан.

¹¹Ынчангаш Дээрги-Чаяакчы: «Мен ам оларже чайлап шыдавазы айыыл-халапты ыдар мен. Олар Мени кыйгырып эгелээр, а Мен оларны дыңнавас мен — дээн. —

¹²Иудеяның хоорайлары, Иерусалимниң чурттакчылары боттарының айдызап турган бурганнарын кыйгырар, ынчалза-даа айыыл-халап үезинде бурганнары оларны камгалап шыдавас.

¹³Иудея, сээң кандыг-даа хоорайың боду бурганныг болгай. Иерусалимниң кудумчу бүрүзүнде чүдек-бужар Ваал бурганга айдызаар өргүл бедигээжи тургузуп алган силер.

¹⁴А сен, Иеремия, бо чон дээш мөргүве, ол дээш ыглап чалбарба, Менден дилег кылып тейлеве! Олар айыыл-халапка алыскаш, Мени кыйгыра бээрге, Мен оларны дыңнавас мен.

¹⁵Мээң ынак чонум Мээң өргээмде чүнү кылып турарыл? Ол хөй бужар-бак үүлгедиглер кылып турар-дыр. Бузут үүлгеткеш, өөрүп турар болзуңза, сээң өргүлүңнү хүлээп аар деп бе?

¹⁶Дээрги-Чаяакчы сеңээ „Каас-чараш кылдыр чечектелген, тааланчыг чимистерлиг олива ыяжы“ деп ат тывыскан. Ынчалза-даа күштүг диңмит-кызаңнааштыг чаъс үезинде оливаже Ол чаңнык дүжүрерге, ооң будуктары сыйлып каар.

¹⁷Израиль биле Иудеяның улузу, силерни тарып олуртуп каан Аг-шериглиг Дээрги-Чаяакчы боттарыңарның араңарга кылып турган бузудуңар дээш силер-биле айыыл-халап боорун чугаалаан. Силер Ваал бурганга айдызаашкын кылып, Мени килеңнедип турган болгай силер».

¹⁸Дээрги-Чаяакчы, Сен меңээ ол улустуң бузуттуг үүлгедиглерин ажыттың, мен ам ону билир мен.

¹⁹Мен бүзүрээчел хураган дег болдум, мени дөгерер дээш аппар чыткан; олар меңээ кара сагыштап: «Ону чечек-чимистиг ыяш дег кезип каалы, дириглер оранынга ол артпазын, ооң ады уттундура берзин!» — деп турганын билбээн-дир мен.

²⁰Аг-шериглиг Дээрги-Чаяакчы, чөптүү-биле шиидип турар сен база кижиниң сеткил-чүрээ, ишти-хөңнүн шенеп турар болгай сен! Олардан өжээн негээриңни мен көрүп көрейн, бодумнуң чаргы-чаалымны шиитпирлээрин Сеңээ бүзүредим.

²¹[21-22] Ынчангаш Аг-шериглиг Дээрги-Чаяакчы мынча дээн: «Сеңээ өлүм күзеп: „Дээрги-Чаяакчының өмүнээзинден медеглеве, оон башка сени өлүрүп каар бис!“ — деп кыжанып турар Анатот хоорайның чурттакчыларын Мен ам кезедир мен! Оларның аныяк оолдары хылыштан кырлып каар, оолдар-кыстары аштап өлүр.

²³Оларның иштинден кым-даа амы-тынныг артпас, чүге дээрге кеземче чылы кээрге, Анатоттуң чурттакчыларынче айыыл-халапты ыдар мен».