Read Ыдыктыг Библия, 2011 Иеремия 13 Bible Online

Иеремия 13 - Ыдыктыг Библия, 2011 bible

Иеремия 13

¹Дээрги-Чаяакчы меңээ: «Барып, лён курдан садып алгаш, куржанып ал, чүгле ону сугга өттүрбе» — дээн.

²Мен Ооң дужааганын ёзугаар лён кур садып алгаш, куржанып алдым.

³[3-4] Дээрги-Чаяакчы меңээ Бодунуң сөзүн база катап ажыдып: «Садып алгаш, куржанып чоруур куруңну ап ал, бо дораан Евфрат хемче [23] баргаш, курну аңаа хая чарыынга чажырып каг» — деп чугаалады.

⁵Мен Евфратче баргаш, Дээрги-Чаяакчының меңээ дужааганын ёзугаар курну чажырып кагдым.

⁶Элээн хөй хүн эрткенде, Дээрги-Чаяакчы меңээ: «Евфратче баргаш, Мээң аңаа чажыртып каан курумну ап ал» — деп чугаалады.

⁷Мен Евфратче катап база баргаш, курну чажырып каан черимден ушта казып алдым. Көөрүмге, кур ирип калган, канчаар-даа ажыглаттынмас апарган болду.

⁸Дээрги-Чаяакчы меңээ Бодунуң сөзүн ажыдып,

⁹мындыг чугаа дамчытты: «Иудеяның чоргаараар чүвезин, Иерусалимниң кончуг чоргааралын шак мынчаар ирииринче албадаар мен!

¹⁰Бо бузуттуг чон Мээң сөстеримни тооп дыңнаарындан ойталап, чөрүү чүрээниң аайынга кирип, өске бурганнарга мөгейип, оларга бараан болуп, сөгүрүп турар-дыр! Ол чон канчаар-даа ажыглаттынмас бо кур ышкаш апаар.

¹¹Кижиниң белин дескиндир чыыра тырткан кур дег, Мен Израиль биле Иудеяның бүгү чонун Бодумче чыыра тыртып алдым — деп, Дээрги-Чаяакчы медеглээн. — Олар Мээң чонум, Мээң алдар-адым, мактал-хүндүм, каасталгам апарзын дээш ынчаар кылган мен, ынчалза-даа олар Мени тооп дыңнавады.

¹²Улус-чонга мону чугаала. Дээрги-Чаяакчы, Израильдиң Бурганы: „Арага кудар сава бүрүзүн арага-биле долдурар“ — дээн. Олар сеңээ: „Таанда-ла бис сава бүрүзүн арага-биле долдурар ужурлуун билбезивис ол бе?“ — деп харыылаар.

¹³Ынчан оларга мону чугаала. Дээрги-Чаяакчы мынча дээн: „Бо черниң бүгү чурттакчыларын — Давид хаанның дүжүлгезинде саадаан хааннарны, Бурганның бараалгакчылары биле медээчилерин, Иерусалимде чурттаан бүгү улусту — оларның шуптузун ужур эзиртир арага-биле долдурар мен!

¹⁴Оон оларны савалар дег чуура шавар мен, бирээзин — өскезинге, адаларын — оолдарынга чуура үстүрер мен — деп, Дээрги-Чаяакчы медеглээн. — Өршээвес, кээргевес, ээ-хайыра көргүспес мен, кыргып-хыдыыр мен!“»

¹⁵Тооп дыңнаңар, кичээнгейге алыңар, улуургаваңар, чүге дээрге Дээрги-Чаяакчы чүве чугаалаан-дыр.

¹⁶Дээрги-Чаяакчы Бурганыңарны дүмбей караңгы дүшпээнде, алдаржыдыңар, караңгыга бүргеткен дагларга илдигип кээп ушпааныңарда, алдаржыдыңар! Ынчан чырып кээрин манаар силер, а Ол идегеп манааныңар чырыкты чүү-даа көзүлбес караңгы кылдыр хуулдуруптар.

¹⁷Бир эвес бо сөстерни тооп дыңнавас болзуңарза, мээң сеткилим дуюкаа ыглап-сыктаар, силерниң улуургааңар дээш ажыг-шүжүглүг ыглаар. Караам суу эриин ажа бээр, чүге дээрге Дээрги-Чаяакчының сүрүүн туттуруушкунче сүрүп аппаар-дыр!

¹⁸«Хаанга болгаш ооң иезинге: „Дүжүлгеңерден дүжүңер! Ат-алдарыңарның оваадайы бажыңардан кээп дүжер-дир.

¹⁹Негевте хоорайлар бүзээлеттирер-дир, оларны камгалаар кым-даа чок боор. Иудеяның чонун бүрүнү-биле тудуп алгаш баар-дыр“ — деп чугаала.

²⁰Карааң хере көр, Сион-кыс, соңгу чүктен дайзын кел чыдыр! Сеңээ хүлээдип берген сүрүг мал кайыл, сээң кайгамчык чараш хойларың кайыл?

²¹Сени башкарар кылдыр бодуңнуң чаңчыктырып алган улузуңну Дээрги-Чаяакчы сээң бажыңга салып каарга, чүү дээр сен? Божаан херээжен дег, аарышкыга алзыр сен!

²²Сеткил-чүрээңге: „Ол бүгү чүге мени таварды?“ — деп айтыртынар сен. Эңдерик бачыттарың дээш сээң эдээңни өрү аңдарып, чазарлаан-дыр.

²³Эфиоп кижи кара-хүрең кежин, ирбиш — ала-шокар кежин солуп шыдаар бе? Чүгле бузут үүлгедип өөренген болгаш, буян кылып шыдаар силер бе?

²⁴Мен сээң чонуңну, ээн кургаг ховунуң хадынга доюлган тараа саваңы дег, тарадыр шааптар мен!

²⁵Ол дээрге сээң хуу-салымың, Мээң хемчээп бергеним үлүүң-дүр — деп, Дээрги-Чаяакчы медеглээн, — чүге дээрге Мени уттупкаш, меге чүүлге ынанган-дыр сен.

²⁶Ол дээш эдээңни арныңче өрү көдүрер мен, бужарыңны улус көрзүн.

²⁷Сээң самыыраашкыннарыңны, туралаан киштээшкиниңни, шөлдер, тейлерге бужары-биле будулуп турганыңны көрген мен. Ат болур сен, Иерусалим! Кажанга чедир арыг эвес болур сен?»