Read Ыдыктыг Библия, 2011 Иеремия 14 Bible Online

Иеремия 14 - Ыдыктыг Библия, 2011 bible

Иеремия 14

¹Дээрги-Чаяакчының Иеремияга каңдаашкын дугайында ажыдып каан сөзү бо-дур.

²«Иудея ыглап турар, ооң хоорайлары харыксырап калгаш, черже кээп дүшкеш, кажыыдап турар, Иерусалимде ыы-сыы — кулак уюк.

³Ызыгууртаннар чалчаларын сугладып чорударга, демгилери кудуктарга келгеш, узар суг чок боорга, куруг саваларлыг чанып кээп, ыядып-човаанындан арнын чажырып турар.

⁴Чаъс чагбастаан болгаш, чер кыры чарлыгылап калган. Тараажылар бак атка кирип, арнын чажырып алган!

⁵Элик безин оът-сиген үнмээн боорга, чаа төрүттүнген төлүн ховуга каап турар.

⁶Черлик элчигеннер тас тейлерде туруп алган, шөө-бөрүлер дег, чыт хап турар, оларның карактары соолбурарып калган, чүге дээрге оът-сиген үнмээн-дир».

⁷Кем-буруувус бисти сойгалап тур, ынчалза-даа Бодуңнуң адың бодааш, биске болчуп көрем, о Дээрги-Чаяакчы. Ийе, бис Сеңээ дыка хөй катап өскерлип турдувус, Сээң мурнуңга бачыт үүлгедип шаг болдувус.

⁸Израильдиң Идегели, айыыл-халап үезинде ооң Камгалакчызы! Чүге Сен ам бо черде хары кижи дег, хонуп аар дээш түр доктааган аян-чорукчу дег апардың?

⁹Чүге Сен ам аймаарай берген кижи дег, кымны-даа камгалаар күш чок дайынчы дег апардың? Дээрги-Чаяакчы, бистиң аравыста болгай сен, бис Сеңээ хамааржыр болгай бис. Бисти кагбайн көрем!

¹⁰Дээрги-Чаяакчы бо чон дугайында: «Олар буттарын чагырбайн, улчуурунга ынак чорду, ол дээш Мен оларга таарзынмайн бардым. Мен ам оларның бузуттуг үүлгедиглерин бодап кээр мен, бачыттары дээш кезедир мен» — дээн.

¹¹Дээрги-Чаяакчы меңээ: «Бо чонга ачы-буян дилеп, мөргүве!

¹²Олар шээрленир-даа болза, ыы-сыызын дыңнавас мен, бүрүн өрттедир болгаш далган-тараа өргүлдери-даа кылыр болза, Меңээ таарышпас. Харын оларны дайын-чаа, аш-чут, хамчык аарыг-биле узуткаар мен!» — деп чугаалаан.

¹³Мен ынчан: «Аа халак, Дээрги-Бурган-Чаяакчы! Сээң медээчилериң улуска: „Дайын-чаа көрбес силер, аш-чут-даа силерге болбас, чүге дээрге Бурган бо черге силерге быжыг тайбыңны хайырлаар“ — деп чугаалап тур» — дээн мен.

¹⁴Дээрги-Чаяакчы меңээ: «Ол медээчилер Мээң адым тудуп, мегелеп медеглеп турар-дыр! Мен оларны айбылап чорутпаан, оларга айтыышкыннар бербээн, олар-биле чугаалашпаан мен. Менден келбээн меге ажыдыышкыннар, хоозун төлге, боттарының даап бодаан чүүлдерин өттүр билген медеглелдер кылдыр силерге чугаалап турар улус-тур» — дээн.

¹⁵Ынчангаш Дээрги-Чаяакчы: «Мээң айбылап чорутпааным, Мээң адым тудуп медеглеп турар медээчилер: „Бо черге дайын-чаа-даа, аш-чут-даа турбас“ — деп турар-дыр. Олар боттары дайын-чаа биле аш-чуттан өлүп каар.

¹⁶Ол медээчилерни дыңнап турган улус аш-чут биле дайын-чаадан өлүп каарга, оларны Иерусалимниң кудумчуларынче үндүр октаптар, ол улусту, оларның кадайларын, оглу-кызын ажаар кижи тывылбас. Мен оларже боттарының чедип алганы айыыл-халапты төптер мен.

¹⁷Ол сөстерни оларга дамчыт» — дээн. Мээң караамны чаштар долуп, дүне-даа, хүндүс-даа соксаал чок ага берзин, чүге дээрге мээң күжүр хайыралыг чонум коргунчуг балыглардан, аар кемдээшкиннерден харыксырап калган-дыр.

¹⁸Шөлче үнүп келгеш, көөрүмге, хылыш-биле шанчып каан улус чыдыр, хоорайга чедип келгеш, көөрүмге, аштап, хилинчектенген улус тур. Бурганның медээчизи-даа, бараалгакчызы-даа чүнү-даа билбес апаргаш, чуртта улчуп чоруур-дур [24].

¹⁹Таанда-ла Сен Иудеядан шуут ойталадың бе? Таанда-ла Сээң сеткил-сагыжың Сионну көөр хөңнү чок бе? Чүге Сен бисти экирип шыдавас кылдыр эттеп-соп тур сен? Амыр-тайбың кээр боор деп идегеп турдувус, ынчалза-даа ачылыг чүү-даа чок-тур, экирииривисти манап турдувус, ынчалза-даа коргунчуг хай-халаптар чедип келди.

²⁰Кем-буруувусту билир бис, Дээрги-Чаяакчы, ада-өгбевистиң бузут-багын база билир бис, Сээң мурнуңга бачыт үүлгеткен болгай бис.

²¹Ынчалза-даа Бодуңнуң адың бодааш, бистен ойталава, Бодуңнуң алдарлыг дүжүлгеңни куду көрдүреринче чыгава! Бис-биле чарган чагыг-керээңни сактып кээп, ону үревейн көрем.

²²Өске чоннарның хоозун дүрзү-бурганнары чаъс чагдырып шыдаар бе? Дээр чайыкты боду хайырлаар бе? Дээрги-Чаяакчы Бурганывыс, Сен хайырлаар эвес сен бе? Сеңээ идегеп тур бис, чүге дээрге ол бүгүнү Сен чаяап турар болгай сен.