Read Ыдыктыг Библия, 2011 Иеремия 15 Bible Online

Иеремия 15 - Ыдыктыг Библия, 2011 bible

Иеремия 15

¹Дээрги-Чаяакчы меңээ мынча дээн: «Моисей биле Самуил-даа Мээң мурнумга чаннып көстүп келген болза, Мен бо чонну кээргевес ийик мен. Ол чонну Менден ырадыр сывырывыт, олар чоруй барзын!

²Кажан олар сенден: „Кайнаар баар улус бис?“ — деп айтырар болза, мынча деп харыылаар сен. Дээрги-Чаяакчы: „Өлүр хүнү келген кижи өлүмче барзын, хылышка шаштырар кижи хылыштан калзын, ашка чыгаткан кижи аштазын, тудуп алгаш баары чайлаш чок кижи туттуруп алзын!“ — деп турар-дыр дээр сен.

³Мен оларны дөрт шаажы-биле кезедир мен — деп, Дээрги-Чаяакчы медеглээн. — Оларны хылыш өлүр шанчар, мөчү-сөөктерин ыттар үзе-чаза тыртар, дээрниң куштары биле черниң аң-араатаны сыырар.

⁴Мен оларны Эзекияның оглу, Иудеяның хааны Манассияның Иерусалимге үүлгеткен чүвези дээш бүгү өске күрүнелерге коргунчуг үлегер-чижек кылып каар мен.

⁵Кым сени кээргээрил, Иерусалим? Кым сээң ажыың ажып ыглаарыл? Кым сээң амыр-мендиң айтырарыл?

⁶Сен Мени каапкаш бардың — деп, Дээрги-Чаяакчы медеглээн, — дедир чоруй бардың. Сеңээ удур Бодумнуң холумну көдүрдүм, узуткап кагдым — сени кээргээр күжүм-даа төндү.

⁷Мен черниң бүгү хоорайларында улусту айыыр-биле тарадыр октапкан мен. Бодумнуң чонумну узуткап каан мен, оларны ажы-төл чок арттырган мен, чүге дээрге боттарының оруундан өскээр эгбээн-дир!

⁸Мээң күзел-соруум ёзугаар оларның дулгуяк херээженнери далайның элезининден-даа хөй апарды. Аныяк оолдарның аваларынче чырык хүндүс-ле узуткакчыларны ыттым, оларга хенертен коргуушкун биле девидээшкинни таварыштырдым.

⁹Чеди-даа ажы-төлдүг турган иелер ам харыксырап, сагыш-сеткили куруглап калган, оларның хүнү дүъште-ле ажа берген, олар, ады баксырап, дорамчылаткан. А чоннуң арткан улузун хылышка чиш кылдыр берип, дайзыннарынга хүлээдип бээр мен». Дээрги-Чаяакчының медеглээн чүвези ол-дур.

¹⁰Күжүр ием, ат болдум! Сен мени чүге бүгү чер-делегей-биле чаргылдажып, маргыжып чоруур кылдыр төрүп кааның ол?! Хуузун алыр дээш акша чегдирбээн мен, бодум-даа чээли албаан мен, а бүгү улус мени каргаар-дыр.

¹¹Дээрги-Чаяакчы мынча дээн: «Иеремия, Мен сени быжыглааш, ачы-буян хайырлаар мен! Айыыл-халап, кызып-кыйыышкын үезинде дайзыннарыңны сеңээ чанныр кылдыр албадаар мен [25].

¹²Соңгу чүктен эккелген демир биле хүлерни кым сыйып шыдаарыл?

¹³Иудея, сээң бүгү девискээриңге үүлгеткен бачыттарың дээш эт-хөреңгиңни, эртине-байлааңны дайзыныңга белен олча-тывыш кылып каар мен.

¹⁴Бодуңнуң билбес чораан чериңче, дайзыннарыңче чоруур кылдыр сени албадаар мен, чүге дээрге Мээң килеңим от ышкаш кыптыгып, сени өрттедир деп тур!»

¹⁵О, Дээрги-Чаяакчы, бүгү чүвени билир сен! Мени утпа, менче сагыш салып көрем, мени истеп-сүрген улустан өжээним негеп көрем! Оларны үр шыдажып келгеш, мени чок кылдыртпа, Сен дээш дорамчылал хүлээп чоруурумну билип ап көрем.

¹⁶Сээң сөзүң мээң аъш-чемим апарып турду. Сээң сөстериң сеткил-чүрээмниң өөрүшкүзү, хөглээшкини апарды, чүге дээрге Сеңээ хамааржыр болгай мен, Дээрги-Чаяакчы, Аг-шериглиг Бурган!

¹⁷Каттыржып-хөглээн улус чыыжынга олурбадым, хөглеведим — Сээң холуң мени чааскаан олурарынче албадап тур, мени килең-биле бүргедиң.

¹⁸Чүге мээң аарышкым читпезил, балыым экирбезил, эмнеттинип шыдавазыл? Таанда-ла Сен мени мегелеп, соглуучал хем дег апардың бе?

¹⁹Ынчан Дээрги-Чаяакчы: «Менче эглип кээр болзуңза, Мээң мурнумга бараан болур кылдыр сени база катап тургузуп каар мен. Үнелиг сөстү хоозун сөстен аңгылап шыдаар болзуңза, Мээң аксы-сөзүм дег апаар сен. Улус боттары сээң аайыңче кирер, а сен оларның аайынче кирбес сен!

²⁰Мен сени бо чонга удур быжыг хүлер хана кылдыр тургузар мен. Олар сенче халдаар, ынчалза-даа сени ажып тиилээр харык чок болур, чүге дээрге Мен сээң-биле мен, сени камгалап, кадагалаар мен — деп медеглээн. —

²¹Мен сени каржы-бак улустан камгалап, түрлүг улустуң холундан адырар мен».