Read Ыдыктыг Библия, 2011 Иеремия 17 Bible Online

Иеремия 17 - Ыдыктыг Библия, 2011 bible

Иеремия 17

¹Иудеяның бачыдын демир шиш-биле, алмаз кески-биле бижип каан, оларның чүректерин калбак даш кылгаш, аңаа шыйып каан, өргүл салыр бедигээштериниң мыйыстарында оюп каан.

²[2-3] Олар өргүл салыр бедигээштеринче, Ашера бурганга тураскааткан ыяштарынче, саглагар ыяштарынче, бедик тейлеринче, ховуда дагларынче, боттарының оолдарынче дег, сагыш салып турар. Иудея, бүгү эт-хөреңгиңни, эртине-байлааңны өргүл салыр бедик черлериң дээш, бүгү девискээрлериңде үүлгедип турар бачыттарың дээш, өске улуска олча-тывыш кылдыр бериптер мен.

⁴Мээң сеңээ бергеним хувааглыг чериңни бодуңнуң бурууң-биле ышкынар сен. Мен сени билбезиң чуртче дайзыннарыңга кул кылдыр хүлээдир мен, чүге дээрге Мээң килеңим одун өөскүттүң, ол от мөңге кывар!»

⁵Дээрги-Чаяакчы мынча дээн: «Кижиге идегээр, кижи амытанны чөленгииш деп санаар, сеткил-чүрээ Дээрги-Чаяакчыдан ойталаан кижи каргаттырар.

⁶Ол кижи ээн кургаг ховуда чадаң үнүш дег, эки чүве көрбес, сай-даштыг, изиг кургаг ховуга, кужурлуг, ээн черге чурттаар.

⁷Дээрги-Чаяакчыга идегээр, Аңаа ынаныр кижи ачы-буян алыр!

⁸Ындыг кижи суг чанынга тараан ыяш дег болур. Ол ыяш суг кыдыынга дазылданган болгаш, изиг-кааң үеден кортпас; ооң бүрүлери ногаан артар, каңдаашкынныг чыл аңаа коргунчуг эвес, ол ынчан безин чимис бээрин соксатпас.

⁹Кижиниң сеткил-чүрээ оп-мегелиг, эдип аар арга чок; кым ону билип шыдаарыл?

¹⁰А Мен, Дээрги-Чаяакчы, кижиниң чүрээнче өттүр көрүп, сеткил-сагыжын шенеп турар мен, кижи бүрүзүн ооң херектерин ёзугаар, ажыл-херээниң үре-түңнелин барымдаалап, шаңнаар азы кезедир мен.

¹¹Шынчы эвези-биле баяан кижи — чуургаларын базып олурар, ынчалза-даа төлдери чазылбас торлаа дег [26]. Назын ортузу четкеш, ол кижи бүгү чүвезин чидирип аар, өлүр үезинге чедир мелегей бооп артар».

¹²Ыдыктыг өргээвис дээрге Бурганның эрте шагда көдүрлүп үнген алдарлыг дүжүлгези-дир!

¹³Дээрги-Чаяакчы — Израильдиң идегели! Сени каапкаш барган кижи адын бужартадыр! «Менден ойталаан улустуң алдар-адын черге таптай базар, чүге дээрге Дээрги-Чаяакчыны — амыдырал хайырлаар суг бажын — каапкан-дыр».

¹⁴Мени экиртип көрем, Дээрги-Чаяакчы, ынчан экирий бээр мен, мени камгалап көрем, ынчан камгалал алыр мен, чүге дээрге Сени алгап-мактап тур мен!

¹⁵Улус-чон меңээ: «Дээрги-Чаяакчының сөзү кайыл? Ол сөс боттанзын!» — деп тур.

¹⁶Мен Сээң адың тудуп, улус чагырарынче чүткүвээн мен [27], айыыл-халап хүнү кээрин күзевээн мен, Сен Бодуң ону билир сен. Мээң аксымдан үнген сөстер үргүлчү Сээң мурнуңга ажык.

¹⁷Меңээ коргунчуг болбайн көрем. Сен дээрге хай-халап хүнүнде хоргадалым болгай сен.

¹⁸Мени истеп-сүрген улустуң ады баксыразын, а мээң адым баксыравазын, олар коргуп-сүртезин, а мен коргуп-сүртевээйн! Оларже айыыл-халап хүнүн ыдывыт, аар согуушкун-биле оларны чылча шаап каг!

¹⁹Дээрги-Чаяакчы меңээ: «Иудеяның хааннарының үнүп-кирип турары Улус-чон хаалгазынче, Иерусалимниң өске бүгү хаалгаларынче баргаш:

²⁰„Бо хаалгалар дамчыштыр кирип турар Иудеяның хааннары база бүгү чону, Иерусалимниң бүгү чурттакчылары, Дээрги-Чаяакчының чугаа-сөзүн дыңнаңар!“ — деп чугаала» — дээн.

²¹Дээрги-Чаяакчының силерге дамчыткан чүүлү бо-дур: «Амы-тынныг артар дизе, амыр-дыш хүнүнде чүък дажыглап чорбаңар, ону Иерусалимниң хаалгаларын дамчыштыр киирбеңер.

²²Амыр-дыш хүнүнде бажыңыңардан чүък үндүрбеңер, кандыг-даа ажыл кылбаңар. Ада-өгбеңерге Мээң айытканым дег, амыр-дыш хүнүнүң ыдыктыын сагыңар.

²³[23-24] Ада-өгбеңер Мени тооп дыңнаваан, Менче кулаан ээктирбээн болгай. Олар чөрүү болгаш, тооп дыңнаваан, чагыг-суртаалды хүлээп албаан болгай — деп, Дээрги-Чаяакчы медеглээн. — Бир эвес Мени ылап-ла тооп дыңнаар болзуңарза, амыр-дыш хүнүнде бо хоорайның хаалгаларын дамчыштыр чүък дажыглап киирбес база амыр-дыш хүнүнүң ыдыктыын сагып, ол хүн кандыг-даа ажыл кылбас болзуңарза,

²⁵ынчан бо хоорайның хаалгаларын дамчыштыр Давидтиң дүжүлгезинде саадаан хааннар база нояннар кирер. Олар чуузаларга олурупкаш, аът мунгаш, кирер: хааннар, оларның нояннары база Иудеяның улузу, Иерусалимниң чурттакчылары. Бо хоорай кезээ мөңгеде турар.

²⁶Иудеяның хоорайларындан, Иерусалимниң чоок-кавызындан, Вениаминниң ээлээн черинден, Шефеладан, даглардан, Негевтен улус чедип келгеш, Дээрги-Чаяакчының өргээзинге бүрүн өрттедир болгаш эп-найырал өргүлдери кылыр, далган-тараа өргүлдери, өөрүп четтириишкин өргүлдери болгаш айдызаар өргүлдер эккеп салыр.

²⁷А бир эвес Мени тооп дыңнавас, амыр-дыш хүнүнүң ыдыктыын сагывас база амыр-дыш хүнүнде Иерусалимниң хаалгаларын дамчыштыр чүък дажыглап эрттирер болзуңарза, Мен ынчан ол хаалгаларны хуюкталдыр өрттедир мен! Ол дээрге Иерусалимниң шивээлерин чиир өшпес от-тур!»