Read Ыдыктыг Библия, 2011 Иеремия 2 Bible Online

Иеремия 2 - Ыдыктыг Библия, 2011 bible

Иеремия 2

¹Дээрги-Чаяакчы меңээ Бодунуң сөзүн ажыдыпкан:

²«Баргаш, Иерусалимниң чонунга Дээрги-Чаяакчының бо сөстерин чарлап чугаала: „Сактып тур мен, аныяаңда меңээ бердинген чордуң, душтук кыстың ынакшылы-биле меңээ ынак турдуң, ээн кургаг ховуга, үнүш-дүжүт чок черлерге Мени эдерип чордуң.

³Израиль — Дээрги-Чаяакчының ыдыктыг чону, Ооң дүжүдүнүң баштайгызы-дыр. Ону чип турган улус шупту буруудаар, айыыл-халап оларны хөме таварыыр“». Дээрги-Чаяакчының медеглээн чүвези ол-дур.

⁴Иаковтуң салгалы, Израильдиң бүгү аймактары, Дээрги-Чаяакчының сөзүн дыңнаңар!

⁵Дээрги-Чаяакчы мынча дээн: «Таанда-ла ада-өгбеңер Мени кем-буруулуг деп көрген бе? Чүге олар Менден ырай берди? Олар хоозун чүүл сүргеш, боттары хоозун куруг апардылар.

⁶Олар: „Дээрги-Чаяакчы бисти Египеттен үндүре берген, Ол бисти ээн кургаг ховуга, кооргалдарлыг, суг чок черге, дүмбей караңгы, кым-даа чорбайн турар, кижи ээлеп чурттавайн турар черге эдертип чораан болгай. Олче чүткүүлү“ — диведилер.

⁷Мен силерни дүжүткүр черже, ооң ачы-буянныг беримчези-биле чемнензин дээш, эккелдим. А силер чедип келгеш, канчалдыңар? Мээң чуртумну бужартадып, Мээң ээлээн черимни чүдек-бужар чүүл кылып кагдыңар!

⁸Бурганның бараалгакчылары: „Дээрги-Чаяакчыже чүткүүлү!“ — деп кыйгырбады, ыдыктыг хоойлу башкылары Мени билбес-тир, силерниң чагырыкчыларыңар Менден ойталаан-дыр, медээчилер Ваал бурганның өмүнээзинден медеглеп, ажык-дуза чок дүрзү-бурганнарга мөгейип турар-дыр!

⁹Ол дээш Мен силер-биле чаргылдажыр мен — деп, Дээрги-Чаяакчы медеглээн. — Силерниң салгалыңар-биле база чаргылдажыр мен.

¹⁰Китт чоннуң [2] ортулуктарынче баргаш, көрүңер, кедар аймакчеэлчиннерден чоруткаш, хайгыылдап көрүңер. Орта шак мындыг чүве болган бе деп билип алыңар:

¹¹бодунуң ёзулуг Бурган безин эвес бурганнарын солуп турар чон бар бе? А Мээң чонум бодунуң алдарлыг Бурганын ажык-дуза чок дүрзү-бурганнарга орнапкан-дыр.

¹²О дээрлер, ону кайгап-хараңар, коргуп-сүрээдеп, сирилеңер! — деп, Дээрги-Чаяакчы медеглээн. —

¹³Мээң чонум бузуттуг ийи херек үүлгеткен: ол Мени, амыдырал хайырлаар суг бажын, каапкаш, суг ызырынмас, үрелип бузулган доскаарлардан суг узуксап турар.

¹⁴Израиль чон — кул бе? Кулданыышкынга төрүттүнген чалча бе? Ол чүге олча апарды,

¹⁵чүге арзылаңнар олче сүртенчиг ырланып, ооң черин хоозурадып кагды? Ооң хоорайлары өрттеттирген, чурттакчы чок арткан-дыр.

¹⁶Мемфис биле Тафнис хоорайларның чурттакчылары сээң бажыңны чара шаап кагды [3].

¹⁷Ол бүгү дээш, бодуң шоруң! Сеңээ орук баштап чораан Дээрги-Чаяакчы Бурганыңдан ойталаан болгай сен!

¹⁸А ам Египетче чүге баарың ол, Нил хемниң суун ижер дээш бе? Ассирияже чүге баарың ол, Евфраттың суун ижер дээш бе?

¹⁹Кем-бурууң дээш кеземче алыр сен, өскерлиишкиниң дээш сени кезедир; ынчангаш Дээрги-Чаяакчы Бурганыңдан ойталааның, Менден кортпас апарганың кайы хире айыыл-халап, ажыг-шүжүгге чедиргенин билип, көрүп ал». Аг-шериглиг Дээрги-Бурган-Чаяакчының медеглээн чүвези ол-дур.

²⁰«Бурунгу шагда-ла Мен хомудуңну буза шаап, моожаңны үзе тыртып берген мен, а сен: „Бараан болбас мен!“ — дидиң, бүгү бедик тейлер бажынга, таварышкан-на хөлегелиг саглагар ыяш адаанга самыырап турдуң!

²¹Мен сени тарып каарымга, эң эки виноград үнген шөл, шилиттинген чаш будуктар турдуң. Оон Меңээ хамаарыштыр канчап хары, черлик сып болу бердиң?!

²²Ынчангаш кандыг-даа саваң-биле арыдыр чунуп шыдавас сен — кем-бурууң Мээң мурнумда көскү! — деп, Дээрги-Бурган-Чаяакчы медеглээн. —

²³Сен канчап: „Бужартаваан мен, Ваалдың дүрзүлеринге мөгейбээн мен“ — дээр сен? Шынаага кылып турган херектериңче көрүп көр, чүнү үүлгеткениңни медереп билип ал! Эңгин теве дег, оруктарга дөскелчок караңнадыр маңнап турдуң.

²⁴Ээн кургаг ховуга чаңчыккан черлик кыс элчиген дег, киргиннээш, агаарга харлыгып турдуң! Ол элчигенни кым доктаадып шыдаарыл? Эдержилге үезинде кым-даа, күзезе, ону чайлыг тып аар.

²⁵Ынчаар маңнап тургаш, идииң эледир кедип аарындан кичээн, суксааш, боостааң кургап калбазын халак! Ынчалза-даа: „Хей чүве! Өске бурганнарга ынак мен, оларның изин истээр мен“ — дээш турар болдуң.

²⁶Туттуруп алгаш, ады баксыраан оор кижи дег, Израильдиң — чонунуң, хааннар, нояннар, бараалгакчылар болгаш медээчилериниң — ады баксырады.

²⁷Олар ыяшты „Ачам сен“ деп, дашты „Мени төрүп кагдың“ деп турар. Менче арнын эвес, ооргазын эргилдирип кээр-дир. Ол хирезинде-ле айыыл-халапка таварышканда, „Бисти камгалап көрем!“ дижир-дир.

²⁸Иудея, сээң кандыг-даа хоорайың боду бурганныг болгай. Кылып алган бурганнарыңар кайыл? Айыыл-халап хөме таварып кээрге, шыдаар болза, олар силерни камгалап чедип келзин.

²⁹Мээң-биле канчап чаргылдажыр силер? Мээң мурнумга шупту кем-буруулуг силер — деп, Дээрги-Чаяакчы медеглээн. —

³⁰Чонуңарны кезедиримге-даа, хей болду, чагыг-суртаалымны хүлээп албадыңар. Медээчилериңерни силерниң хылыжыңар, хайыра чок арзылаң ышкаш, чип төттү.

³¹О, амгы салгал, Дээрги-Чаяакчының сөзүн тооп билип ап көрүңер! Мен израиль чонга хамаарыштыр ээн кургаг хову, дүмбей караңгы бооп турдум бе? Ынчаарга чүге-ле Мээң чонум: „Бодувустуң барыксаан оруувус-биле чоруй баар бис, Сенче дедир ээп келбес бис!“ — дээрил?

³²Кыс кижи каас хептерин, душтук кыс — думаалайын уттуп шыдаар бе? А Мээң чонум Мени сагынмас-тыр, шагда-ла уттупкан-дыр.

³³Хандыкшааннарыңче чүткүүр дээнде, мергежээниң аажок-тур, орууңну бузутче шиглеп чаңчыккан-дыр сен [4].

³⁴Сээң хевиң эдээ актыг ядыыларның ханынга борашкан-дыр. Олар кемниг херек үүлгетпээн, буруу чок улус-тур. Ол хиреңде-ле:

³⁵„Мен актыг мен, Бурганның килеңи менден чайлаар боор“ — дээр-дир сен. Мен сени „Бачыт үүлгетпедим“ дээн сөстериң дээш харыы тударынче кыйгырар мен!

³⁶Чүге алызын бодавайн, оруктарың солудуң? Ассириядан чөгелиң төнгени дег, Египеттен база чөгелиң төнер.

³⁷Египеттен база бажың халайтып алгаш үнер сен, чүге дээрге Дээрги-Чаяакчы сээң идегеп турган чоннарыңны хүлээп көрбээн-дир: олар-биле кады чорааш, чедимчелиг болбас сен!»