Read Ыдыктыг Библия, 2011 Иеремия 22 Bible Online

Иеремия 22 - Ыдыктыг Библия, 2011 bible

Иеремия 22

¹Дээрги-Чаяакчы меңээ мынча дээн: «Иудеяның хаанының ордузунче баргаш, аңаа Мээң сөзүмнү медегле.

²Мону чугаалаар сен: Давидтиң дүжүлгезинде саадаан Иудеяның хааны, Дээрги-Чаяакчының сөзүн дыңна — сен-даа, дүжүметтериң-даа, сээң чонуң-даа, бо хаалга дамчыштыр кирип турар бүгү улус база — дыңнаңар!

³Дээрги-Чаяакчы мынча дээн: „Шынныг шииткел, чөптүг чорук кылыңар, базындырган кижини базынганның холундан адырыңар, даштыкы кижини, өскүс кижини, дулгуяк херээженни хомудатпаңар, оларны кызып-кыйбаңар, шак бо черге кем-буруу чок кижи ханы төкпеңер.

⁴Бир эвес ол айтыышкынны күүседир болзуңарза, Давидтиң дүжүлгезинде саадаан хааннар чуузаларга олургаш-даа, аът мунгаш-даа — боттары, дүжүметтери, албаты чону — бо ордунуң хаалгаларын дамчыштыр кирер.

⁵А бир эвес ол сөстерни тооп дыңнавас болзуңарза, бо орду бузундулар оваазы апаар“. Ону Бодум-биле даңгыраглап тур мен!» Дээрги-Чаяакчының медеглээн сөзү ол-дур.

⁶Дээрги-Чаяакчы Иудеяның хаанының ордузунуң дугайында: «Сен Меңээ Галаад дег, Ливан сынның баштары дег өндүр-чаагай сен. Ынчалза-даа Мен сени ээнзиргей чер, чурттакчы чок хоорай кылып каар мен!

⁷Мен сеңээ удур узуткакчыларны томуйлап каар мен, кайызынга-даа чепсек берип каар мен. Сээң эки дээн пөштериңни олар кезип каапкаш, отче октаптар — деп чугаалаан. —

⁸Хөй чоннарның улузу бо хоорайның чаны-биле эртер, олар бот-боттарындан: „Дээрги-Чаяакчы чүү дээш бо өндүр улуг хоорайны ынчаар аажылааныл?“ — деп айтыржыр.

⁹„Чүге дээрге олар боттарының Бурганы, Дээрги-Чаяакчының чагыг-керээзинден ойталааш, өске бурганнарга мөгейип, оларга бараан бооп турган-дыр“ — деп харыы кээр».

¹⁰Өлген хаан дээш ыглашпаңар, ол дээш качыгдаваңар! Харын туттуруушкунда барган хаанның ажыын ажып ыглажыңар, чүге дээрге ол ам черле ээп келбес, төрээн чуртун көрбес.

¹¹Чүге дээрге Дээрги-Чаяакчы Иосияның оглу, Иудеяның хааны, бо черден туттуруушкунда барган Шаллум [29] дугайында: «Бодунуң ачазы Иосияның соонда хааннап эгелээн Шаллум ам черле бээр келбес-тир!

¹²Ону тудуп аппарган черге ол өлүп каар, бо черни моон соңгаар көрбес — деп чугаалаан. —

¹³Бодунуң ордузун чөптүг-шынныг эвес, үстүкү өрээлдерин — хоойлу-дүрүм чок тудуп турар, өске кижини албадал-биле халаска ажылдадыр, күш-ажыл дээш төлевир бербес хаан ат болур!

¹⁴Ол „Бодумга улуг орду, делгем үстүкү өрээлдер тудуп алыйн“ деп чугаалаан. Ол бодунга улуг соңгалар оюп кылып, пөш-биле каастай шап, кызыл будук-биле будуп турар.

¹⁵Таанда-ла сээң хаан чагыргаңның ужур-утказы пөштен хөй тудуглар тударында бе? Сээң ачаң дойлап-даа тургаш, шын шииткел биле чөптүг чорукту көргүзүп чорду. Ынчангаш чедимчелиг бооп келди.

¹⁶Ядыы-түреңги улустуң херээн ол шын шиитпирлеп турду, ынчангаш чедимчелиг бооп келди. Мени билип аары ындыг боор эвес чүве бе? — деп, Дээрги-Чаяакчы медеглээн. —

¹⁷А сен карааңны-даа, чүрээңни-даа чүгле ажык-кончаа дилээринче, буруу чок улустуң ханын төгеринче, улусту бастып, кызып-кыярынче углап келдиң».

¹⁸Ынчангаш Дээрги-Чаяакчы Иосияның оглу, Иудеяның хааны Иоаким дугайында мынча дээн: «Улус ооң ажыын ажып, акы-угбаларынга „Аа халак!“ дивес, „Дээргивис, хайыраатывыс чок апарган-дыр!“ деп ажыын ажып ыглашпас.

¹⁹Ону элчиген ажааган ышкаш кылдыр ажаап каар, сөөртүп аппаргаш, Иерусалимниң даштынче үндүр октаптар.

²⁰Сион-кыс, барып, Ливан сынга ыглап-сыкта, Васан дагга алгыр, Аварим сынга ишкирнигип ыгла, чүге дээрге сээң хандыкшааннарың [30] шупту чылча шаптырган-дыр.

²¹Амыр-чаагай чурттап чоруңда, Мен сээң-биле чугаалажып, сагындырып турдум, а сен „Дыңнавас мен!“ дээн сен. Аныяаңдан-на ындыг чордуң, Мени тооп дыңнавайн келдиң!

²²Сээң бүгү чагырыкчыларыңны хат хадып алгаш баар, хандыкшааннарың{*} туттуруушкунга баар. Ынчан бүгү бузуттуг үүлгедиглериң дээш адың баксыраар, куду көрдүрер сен.

²³Пөштерде уя тудуп алган, Ливанда чурттап турар улус! [31] Эъди аараан херээженни аарышкы дег, силерни хилинчек бүргей аптарга, човууртаар силер!»

²⁴«Дириг Бодумнуң адым-биле даңгыраглап тур мен! — деп, Дээрги-Чаяакчы медеглээн. — Иоакимниң оглу, Иудеяның хааны Иехония, сен Мээң холумда үнелиг билзээм-даа турган болзуңза, Мен сени уштуп октаптар мен!

²⁵Мен сени сээң амы-тының үзүксээн, коргуп-сүртээр улузуңнуң — Вавилоннуң хааны Навуходоносор болгаш халдей чоннуң холунга хүлээдип бээр мен.

²⁶Мен сени төрээн иең-биле кады хары чуртче үндүр сывырыптар мен — ол черге төрүттүнмээн силер, ынчалза-даа аңаа өлүр силер!

²⁷А аажок ээп келиксээриңер бо черже ам кажан-даа ээп келбес силер».

²⁸Таанда-ла ол кижи, Иехония, ажыы чок бузук дой доңга бе, херээ чок сава бе? Чүге ону ажы-төлү-биле кады оларның билбези чуртче сүрүп аппарганыл?

²⁹О чер, чер, чер! Дээрги-Чаяакчының сөстерин дыңна!

³⁰Дээрги-Чаяакчы мынча дээн: «Ол кижини ажы-төл чок кижи дег кылдыр бүрүткеп калыңар, ол кижи бүгү назынында эки чол көрбес. Ооң салгакчыларындан кым-даа чаагай чолдуг болуп, Иудеяны чагырбас, Давидтиң дүжүлгезинге саадавас».