Read Ыдыктыг Библия, 2011 Иеремия 26 Bible Online

Иеремия 26 - Ыдыктыг Библия, 2011 bible

Иеремия 26

¹Иосияның оглу, Иудеяның хааны Иоакимниң чагыргазының эгезинде Дээрги-Чаяакчы Бодунуң сөзүн ажыдып,

²Иеремияга мынча дээн: «Дээрги-Чаяакчының өргээзиниң шөлүнге туруп алгаш, Иудеяның шупту хоорайларындан Дээрги-Чаяакчының өргээзинге мөгейип кээп турар бүгү чурттакчыларга сеңээ чугаалаарын дужааган бүгү сөстеримни дамчыт, чаңгыс-даа сөс уттуп кагба!

³Олар тооп дыңнааш, кижи бүрүзү бодунуң бузуттуг оруундан ойталаар чадавас. Мен ынчан бодалым өскертип, оларга үүлгедиглери дээш таварыштырар дээним айыыл-халап олар-биле болбас кылып каар мен.

⁴Оларга мону чугаала. Дээрги-Чаяакчы мынча дээн: „Бир эвес Мени тооп дыңнавас, Мээң силерге берген хоойлум ёзугаар чурттавас болзуңарза,

⁵Мээң чалча-медээчилеримниң чугаазын тооп дыңнавас болзуңарза — а Мен силер Мээң медээчилеримни тооп дыңнавайн туруңарда-ла, оларны силерже катап-катап айбылап чорудуп-ла турар-дыр мен —

⁶Силом-биле кылган чүвемни бо өргээ-биле кылыр мен [37], а бо хоорайны чер-делегейниң бүгү чоннарынга каргаттырарынче чыгаар мен“».

⁷Иеремия ол бүгү сөстерни Дээрги-Чаяакчының өргээзинге чугаалаан, Бурганның бараалгакчылары, медээчилери база бүгү чон ону дыңнап турган.

⁸Дээрги-Чаяакчының бүгү чонга дамчыдарын айыткан шупту чүвезин Иеремия чугаалап доозарга, Бурганның бараалгакчылары, медээчилери база бүгү чон ону тудуп алгаш: «Сеңээ өлүм, өлүм!

⁹Дээрги-Чаяакчының адын тудуп өттүр билип медеглеп тура, Силом-биле болган чүве бо өргээ-биле база болурун, бо хоорайның ээнзирээрин, аңаа чурттаар кижи артпазын чүге чугааладың?» — деп алгыржы бергеннер. Бүгү чон Иеремияны шиидер дээш Дээрги-Чаяакчының өргээзинге чыглып келген.

¹⁰Иудеяның нояннары ол дугайында дыңнап кааш, хаанның ордузундан Дээрги-Чаяакчының өргээзинге чедип келгеш, Чаа хаалга чанынга олуруп алганнар.

¹¹Бурганның бараалгакчылары биле медээчилери нояннарга база бүгү чонга: «Бо кижини өлүрүп шиидер ужурлуг! Хоорайывыс дугайында ооң чүү деп өттүр билип медеглээнин боттарыңар дыңнадыңар» — дээн.

¹²Иеремия нояннарга база бүгү чонга мынча дээн: «Дээрги-Чаяакчы мени бо өргээ болгаш бо хоорай дугайында силерниң дыңнааныңар өттүр билген медеглелди чугаалазын дээш айбылап чорутту.

¹³Оруктарыңар биле ажыл-херээңерни экижидип ап көрүңер, Дээрги-Чаяакчы Бурганыңарның сөзүн дыңнаңар. Дээрги-Чаяакчы ынчан бодалын өскертип, силерге аазааны айыыл-халапты болдурбас.

¹⁴А мен — силерниң холуңарже кирдим, мээң-биле силерге шын болгаш чөптүг деп сагындырар чүведен кылыңар.

¹⁵Чүгле ыяк билип алыңар — мени өлүрер болзуңарза, кем-буруу чок кижиниң ханы дээш бодуңарга, бо хоорайга, ооң бүгү чурттакчыларынга буруу чүктедир силер. Чүге дээрге Дээрги-Чаяакчы мени шынап-ла ол бүгү сөстерни силерге дыңналдыр чарлазын дээш айбылап чоруткан болгай».

¹⁶Нояннар база бүгү чон Бурганның бараалгакчылары биле медээчилеринге: «Бо кижини өлүрүп шиитпес ужурлуг-дур! Ол биске Дээрги-Чаяакчы Бурганывыстың өмүнээзинден чугаалап турган-дыр» — дээннер.

¹⁷Чурттуң элээн каш баштыңнары туруп келгеш, чыылган бүгү чонга мынча дээннер:

¹⁸«Иудеяның хааны Эзекияның үезинде Морешет чурттуг Михей өттүр билип медеглеп турду. Ол Иудеяның бүгү чонунга: „Аг-шериглиг Дээрги-Чаяакчы: ‘Сионну шөл ышкаш аңдарып каар, Иерусалим бузундулар оваазы апаар, а бо өргээни туткан даг арга-ыяш үнген чер апаар’ — дээн“ — деп чугаалаан болгай.

¹⁹Ындыг-даа болза, Иудеяның хааны Эзекия биле Иудеяның бүгү чону ол медээчини өлүрерин дидинген бе? Хаан Дээрги-Чаяакчыдан корга бергеш, Оон хайыра дилээрин оралдашпаан бе? Дээрги-Чаяакчы ынчан бодалын өскертип, Бодунуң оларга аазааны айыыл-халап болбас кылып каан болгай. А бис боттарывыстың бажывысче хан кудуп тур бис!»

²⁰(Өске бир кижи — Шемайяның оглу, Кириат-Иарим хоорай чурттуг Урия дээрзи база Дээрги-Чаяакчының өмүнээзинден өттүр билип медеглеп турган чүве-дир. Ол кижи бо хоорай биле бо черге удур, Иеремия ышкаш, өттүр билип медеглеп турган.

²¹Иоаким хаан, ооң шериглери болгаш нояннары медээчиниң сөстерин дыңнаан соонда, хаан ону өлүрер деп барган. Урия ол дугайында билип кааш, кортканындан Египетче дезе берген.

²²Иоаким хаан Египетче бодунуң улузун — Ахборнуң оглу Элнафанны өске кижилер-биле кады чорудупкан.

²³Олар Урияны Египеттен үндүргеш, Иоаким хаанга эккелгеннер. Хаан Урияны хылыш-биле өлүрткеш, мөчү-сөөгүн карачал улус ажаар чевегже октаптарын дужааган чүве-дир.)

²⁴Ынчангаш Шафанның оглу Ахикам Иеремияга болчуп, Иеремияны өлүрүп каар кылдыр чонга бербейн барган.