Read Ыдыктыг Библия, 2011 Иеремия 29 Bible Online

Иеремия 29 - Ыдыктыг Библия, 2011 bible

Иеремия 29

¹Иеремия медээчиниң арткан баштыңнарже, Бурганның бараалгакчылары биле медээчилеринче болгаш Навуходоносорнуң Иерусалимден Вавилонче сүрүп аппарган бүгү чонунче Иерусалимден чоруткан чагаазы бо-дур.

²Иехония хаанны, ооң авазын, Иудея болгаш Иерусалимниң дүжүметтери биле нояннарын, усчу, дарган улузун Иерусалимден тудуп аппарган соонда,

³Иеремия ол чагааны Шафанның оглу Элеаса биле Хелкияның оглу Гемарияны дамчыштыр чоруткан турган. Ол ийи кижини Иудеяның хааны Седекия Вавилонче — ооң хааны Навуходоносорже айбылап чоруткан чүве-дир. Ол чагаада мынча деп бижээн:

⁴Аг-шериглиг Дээрги-Чаяакчы, Израильдиң Бурганы мынча дээн: «Иерусалимден Вавилонче үндүр сывырыпканым бүгү туттурган улус, дыңнаңар.

⁵Бажыңнардан тудуп алгаш, ээлеп чурттаңар, сесерликтерден тарып алгаш, оларның чимизин чиңер.

⁶Кадайдан ап алыңар, оол-кыстыг болуңар, оларны өглеп-баштаңар — олар база ажы-төлдүг болзун. Ол черге өзүп-көвүдеңер, эвээжевеңер!

⁷Силерни ынаар үндүр сывырыпканым хоорайга амыр-тайбыңдан күзеңер. Ол хоорай дээш дилеп, Дээрги-Чаяакчыга мөргүңер, бир эвес аңаа амыр-тайбың доктаар болза, силерге база амыр-тайбың доктаар».

⁸Аг-шериглиг Дээрги-Чаяакчы, Израильдиң Бурганы: «Силерниң араңарда турар бүдүү билирлериңерге, төлгечилериңерге дуурайлатпаңар, дүжүн чугаалаар дүшчүлерни дыңнаваңар! [39]

⁹Ол улус силерге Мээң адым тудуп мегелеп өттүр билип медеглээр-дир, Мен оларны айбылап чорутпаан мен» — деп медеглээн.

¹⁰Дээрги-Чаяакчы мынча дээн: «Вавилонга берип каан чеден чыл эрте бээрге, Мен силерже сагыш салыр мен, Мээң ачы-буянныг сөзүмнү силер-биле күүседип, силерни бо черже дедир чандырар мен.

¹¹Силерге хамаарыштыр чүнү баш бурунгаар бодап алганымны Мен билир болгай мен — деп, Дээрги-Чаяакчы медеглээн. — Силерге келир үени, идегелди хайырлаар дээш, Мен айыыл-халап эвес, амыр-тайбыңны бээр деп бодалдыг мен.

¹²Силер Мени кыйгырар силер, баргаш, Меңээ мөргүүрүңерге, Мен силерге харыылаар мен.

¹³Менче чүткүп, дилеп эгелээш, тып аар силер. Бир эвес Менче бүгү чүлдү-чүрээңер-биле чүткүүр болзуңарза,

¹⁴Мени тып аар силер — деп, Дээрги-Чаяакчы медеглээн, — Мен силерге эки чолду эгидер мен [40], силерни ынаар үндүр сывырыпканым бүгү чоннардан, бүгү черлерден чыып эккээр мен».

¹⁵Силер: «Дээрги-Чаяакчы биске Бодунуң медээчилерин Вавилонга турувуста, база чорудуп берди» — деп турдуңар.

¹⁶[16-17] А Аг-шериглиг Дээрги-Чаяакчы Давид хаанның дүжүлгезинде саадаан хаан дугайында, Иерусалим хоорайда бүгү чурттакчы чон — силерниң-биле кады тудуп аппарбаан ха-дуңмаңар дугайында мынча дээн: «Мен оларже дайын-чаа, аш-чут болгаш хамчык аарыг ыдып тур мен! Мен оларны кижи чиир аргажок, ирик фига чимизи ышкаш аажылаар мен.

¹⁸Мен оларны дайын-чаа, аш-чут болгаш хамчык аарыг-биле истеп-сүрер мен. Оларны чер-делегейниң бүгү күрүнелеринге коргунчуг үлегер-чижек кылып каар мен, үндүр сывырарым чер бүрүзүнге оларны каргыш, хоозурал, кочулал болгаш дорамчылалга таварыштырар мен.

¹⁹Чүге дээрге олар Мээң сөстеримни тооп дыңнавайн турган болгай — деп, Дээрги-Чаяакчы медеглээн. — Мен ол сөстеримни Бодумнуң чалча-медээчилеримни дамчыштыр оларже катап-катап чорудуп-ла турдум, а олар тооп дыңнавады — деп, Дээрги-Чаяакчы медеглээн. —

²⁰А силер, Мээң Иерусалимден үндүр сывырып, Вавилонче чорудупканым улус, Дээрги-Чаяакчының сөзүн тооп дыңнаңар!»

²¹Аг-шериглиг Дээрги-Чаяакчы, Израильдиң Бурганы силерге Ооң адын тудуп, меге чүве медеглеп турар медээчилер — Колияның оглу Ахав биле Маасеяның оглу Седекия дугайында мынчаар чугаалаан: «Мен оларны Вавилоннуң хааны Навуходоносорга хүлээдип бээримге, силер көрүп туруңарда, хаан оларны өлүрүп каар!

²²Оларны сактып, Вавилонче көжүрткен иудейлер аразынга: „Седекия болгаш Ахав-биле болган чүвени Дээрги-Чаяакчы сээң-биле база кылзын!“ — деп каргыш тыптыр. (Вавилоннуң хааны оларны отка хаарган.)

²³Чүге дээрге олар Израильге чүдек-бужар чүве үүлгедип: өске улустуң кадайлары-биле самыырап база оларга чугаалаарын дужаавааным меге чүвени Мээң адым тудуп чугаалап турганнар. Мен ону билир мен, аңаа херечи мен». Дээрги-Чаяакчының медеглээн чүвези ол-дур.

²⁴[24-25] «Иеремия, Нехелам чурттуг Шемайя деп кижиге Аг-шериглиг Дээрги-Чаяакчы, Израильдиң Бурганының дараазында сөстерин дамчыт: „Иерусалимниң бүгү чурттакчы чонунга, Маасеяның оглу, Бурганның бараалгакчызы Софонияга болгаш бүгү бараалгакчыларга бодуң өмүнээңден чагаа бижээн кижи сен болгай сен“». Ол чагаада мынча деп бижээн турган:

²⁶Дээрги-Чаяакчы Софония сени Бурганның бараалгакчызы Иодайның орнунга бараалгакчы кылып каан болгай; Дээрги-Чаяакчының өргээзинге угаанын ышкынгаш, өттүр билип медеглеп эгелээр улусту хайгаараар база оларның буттарын доорбаш ыяшка демирлээр, мойнунга дөңгү кедирер ужурлуг турган сен.

²⁷А силерниң черде өттүр билип медеглеп турар Анатот чурттуг Иеремияны чүге доктаатпас сен?

²⁸Ол Иеремия Вавилонда бисче: «Шөлүлгеңер үр хуусаалыг боор. Бодуңарга бажыңнардан тудуп алгаш, оларны ээлеп чурттаңар, сесерликтерден тарып алгаш, оларның чимизин чиңер» — деп бижээн чагаа чорутту.

²⁹Бурганның бараалгакчызы Софония ол чагааны Иеремия медээчиге номчуп берген.

³⁰Дээрги-Чаяакчы Иеремияга Бодунуң сөзүн ажыдыпкан:

³¹«Өскээр көжүрткен бүгү улусче медээден чорудувут. Дээрги-Чаяакчы Нехелам чурттуг Шемайя дугайында: „Шемайяны Мен айбылап чорутпаан мен, ындыг-даа болза, ол силерге өттүр билип медеглеп, меге идегел берген-дир!“ — деп чугаалаан.

³²Ынчангаш Дээрги-Чаяакчы мынча дээн: „Мен Нехелам чурттуг Шемайяны, ооң үре-салгалын кезедир мен! Ооң үре-салгалындан кым-даа бо чоннуң аразынга чурттавас, Бодумнуң чонумга Мээң хайырлаар ачы-буянымны көрбес, чүге дээрге Шемайя бодунуң чугаазы-биле Дээрги-Чаяакчыга удур үймээн үндүрген-дир“». Дээрги-Чаяакчының медеглээн чүвези ол-дур.