Read Ыдыктыг Библия, 2011 Иеремия 3 Bible Online

Иеремия 3 - Ыдыктыг Библия, 2011 bible

Иеремия 3

¹«Ашаа кадайын чандырыптарга, кадайы оон чоруй баргаш, өске ашакка барып аар болза, баштайгы ашаа олче эглип кээп болур бе? Ынчаар болза, ол чер бужартай бербес деп бе? А сен хөй таныштарың-биле самыырап турган хиреңде-ле, Менче эглип кээр деп тур сен бе? [5] — деп, Дээрги-Чаяакчы медеглээн. —

²Тас тейлерже көрүжүң шигле, ында сээң самыырап турбааның чер бар-дыр бе? Ээн кургаг ховуда чорумалдар кеденген араб кижи дег, таныштарыңны орук кыдыынга манап турдуң. Бодуңнуң самыыраашкын болгаш бузудуң-биле черни бужартаттың.

³Ынчангаш чаъс чагбастаан, Мен часкы чаъс-чайыкты кутпайн турдум. Сээң арын-шырайың самыын-садар херээженнии дег-дир, ыядыр арның чок-тур!

⁴А ам сен Меңээ: „Аныяамдан тура эргим эжим! Ачам сен!

⁵Таанда-ла кезээ мөңгеде килеңнээр сен бе, кезээде хорадаар сен бе?“ — деп турар-дыр сен. Ынча дээр хиреңде-ле, бар шааң-биле бузут үүлгедир-дир сен».

⁶Дээрги-Чаяакчы меңээ Иосияның хааннаан үезинде: «Өскерликчи херээжен дег Израильдиң чүнү үүлгедип турганын көрген-не болгай сен. Ол бедик даг бүрүзүнче барып, таварышкан-на хөлегелиг салбагар ыяш адаанче кирип, аңаа самыырап турду.

⁷Бүгү үүлгедиглериниң соонда, ол Менче эглип кээр боор деп бодадым, ынчалза-даа ол эглип келбеди. Ооң сөс ээлевес кыс дуңмазы Иудея ону көрүп турду.

⁸Израильдиң Меңээ өскерлип турганы дээш, Мен аңаа чарлыышкын бижии бижээш, чандырыпкан мен. Оон көөрүмге, ооң сөс ээлевес кыс дуңмазы Иудея кортпайн, боду база самыырап чорупту.

⁹Ол бодунуң ыят чок самыыраашкыны-биле черни бужартадып, даш, ыяш дүрзүлер-биле Меңээ өскерлип турду.

¹⁰Ынчап тургаш-ла, Израильдиң сөс ээлевес кыс дуңмазы Иудея Менче шын сеткили-биле эвес, а кажарлап эглип келди» — деп чугаалаан.

¹¹Дээрги-Чаяакчы меңээ: «Өскерликчи Израиль, сөс ээлевес Иудеяга көөрде, ооң буруузу эвээш-тир.

¹²Баргаш, соңгу чүкке: „Эглип кел, өскерликчи Израиль!“ — деп сөстерни чарлап чугаала» — дээн. Ол оон ыңай: «Мен сеңээ хорадап артпас мен, энерелдиг болгаш, кезээ мөңгеде килеңневес мен — деп медеглээн. —

¹³Чүгле бодуңнуң кем-бурууңну билин: Дээрги-Чаяакчы Бурганыңга удур бачыт үүлгедип, таварышкан-на хөлегелиг салбагар ыяш адаанга өске бурганнарга хандыкшып шаг болдуң, Мээң сөзүмнү тооп дыңнавайн турдуң». Дээрги-Чаяакчының медеглээн чүвези ол-дур.

¹⁴«Эглип келиңер, өскерликчи ажы-төл — деп, Дээрги-Чаяакчы медеглээн, — чүге дээрге Мен — Ээңер-дир мен [6], силерни, бир хоорайдан-на — бир кижи, бир аймактан-на — ийи кижи кылдыр эдертип алгаш, Сионче эккээр мен.

¹⁵Мээң сеткилимге тааржыр чагырыкчылардан силерге бээр мен, олар силерни угаан-медерелдии-биле чагырар.

¹⁶Бо черге өзүп-көвүдеп, эңдерли бээр силер — деп, Дээрги-Чаяакчы медеглээн, — ол хүннерде Дээрги-Чаяакчының чагыг-керээзин шыгжаан аптара дугайында улус чугаалашпас, ону бодавас база сагынмас, ону хереглевес, өске ыдыктыг аптара-даа кылып албас.

¹⁷Ол үеде Дээрги-Чаяакчының дүжүлгези деп атты Иерусалимге тыпсыр, бүгү чоннар Иерусалимге чыглып келгеш, Дээрги-Чаяакчының адынга мөгеер, оон соңгаар боттарының чөрүүленген бузуттуг чүректеринге чагыртып чурттавайн баар.

¹⁸Ол хүннерде Иудеяның чону Израильдиң чону-биле каттыжып алгаш, соңгу чүкте чурттан силерниң ада-өгбеңерге Мээң берген черимче чоруй баар.

¹⁹Мен сеңээ ажы-төлүмге дег хамаарылгалыг болуксадым, сеңээ күзенчиг черни, чоннарның эң кайгамчык үлүүн дыка берикседим. Сен Мени „Ачам“ деп адаар боор деп, Менден ойталавас боор деп бодадым.

²⁰Ынчалза-даа ашаанга өскерилген кадай дег, израиль чон, сен база Меңээ өскерилдиң — деп, Дээрги-Чаяакчы медеглээн. —

²¹Тейлер баштарында алгы-кышкы, израиль чоннуң чалынган ыы-сыызы дыңналып турар, чүге дээрге олар оруундан өскээр ээп, Дээрги-Чаяакчы Бурганын уттупкан-дыр.

²²Эглип келиңер, өскерликчи ажы-төлүм, Мен силерни шынчы эвес чорууңардан экиртип каар мен». Көрем, Сенче бар чыдыр бис, чүге дээрге Дээрги-Чаяакчы Бурганывыс — Сен-дир сен!

²³Тейлерде — чүгле меге, дагларда — чүгле шимээнниг чыыштар бар болгай. Израильдиң камгалалы чүгле Дээрги-Чаяакчы Бурганывыстан кээри шын-дыр!

²⁴Бистиң аныяк шаавыстан-на бужар дүрзү-бурганнар ада-өгбевистиң эт-хөреңгизин, оларның шээр, бода малын, оглу-кызын сыырып турган.

²⁵Бужар чүүлдеривис бисти бүргеп алган, бак адывыс бисти шып алган! Чүге дээрге бис-даа, ада-өгбевис-даа аныяк шаавыстан амдыгаа чедир Дээрги-Чаяакчы Бурганывыска удур бачыт үүлгедип, Ооң сөзүн тооп дыңнавайн турган-дыр бис.