Read Ыдыктыг Библия, 2011 Иеремия 31 Bible Online

Иеремия 31 - Ыдыктыг Библия, 2011 bible

Иеремия 31

¹«Ол үе кээрге, Мен Израильде төрел бөлүк бүрүзүнүң Бурганы болур мен — деп, Дээрги-Чаяакчы медеглээн, — а олар Мээң чонум болур».

²Дээрги-Чаяакчы мынча дээн: «Дайын-чаадан дириг арткан чон ээн кургаг ховуга Мээң ээ көрнүүшкүнүмнү чедип алган. Мен Израильге оожургал-дышты хайырлаан мен!

³Мен аңаа ырактан көстүп келген мен. Мөңге ынакшыл-биле сеңээ ынак болгаш, энерелим сеңээ көргүзер мен!

⁴Сени база катап күш киирер мен; Израиль-кыс, күштүг апаар сен! Хөгжүм херексели тудуп алгаш, өөрүң-биле база катап өөрүшкүлүг самнап үнүп кээр сен;

⁵Самарияның дагларынга виноградың база катап тарып аар сен. Виноград тараан ажаакчылар ооң чимизин боттары чооглаар!

⁶Ийе, ол хүннү доктааткан, ынчан Эфрем дагларында доскуулчулар: „Тургулаңар, Сион дагже, Дээрги-Чаяакчы Бурганывысче үне берээли!“ — деп алгыржы бээр».

⁷Дээрги-Чаяакчы мынча дээн: «Израильди өөрүшкүлүг алгап ырлаңар, чоннарның баштыңын мендилеңер! Чарлап, мактаңар база „Дээрги-Чаяакчы, Бодуңнуң чонуңну, Израильдиң арткан кезээн камгалап көр!“ — деп дилеңер.

⁸Мен израильчилерни соңгу чүкте чурттан, чер-делегейниң ужу-кыдыындан чыып эккээр мен. Согур, аскак-бүскек улус, иштиг-сааттыг, божуур четкен херээженнер база оларның аразынга турар, олар дыка хөй бооп мөөңнежип алган чанып кээр.

⁹Израильчилер ол чурттан ыы-сыылыг чоруптар — мен ам оларны суглар кыдыы-биле оргу-дески оруктап эдертир мен, олар аңаа илдикпес. Мен — Израильдиң адазы-дыр мен, Эфрем — Мээң дун оглум-дур!

¹⁰Чоннар, Дээрги-Чаяакчының сөзүн дыңнаңар! Ырак чурттарга медээлеп: „Израильди Кым тоо быдаратканыл, Ол Боду ону чыып алгаш, кадарчы сүрүг малын дег, карактап-кадарар“ — деп чугаалаңар.

¹¹Дээрги-Чаяакчы Израильди садып хостаан, ооң күш четпези холдан адырган!

¹²Израиль чон ээп келгеш, бедик Сионга өөрүп-хөглээр, Дээрги-Чаяакчының ачы-буян хайырлалы: кызыл-тас, виноград арагазы, олива үзү, аныяк бода болгаш шээр мал дээш өөрүп-байырлаар. Оларның сагыш-сеткили суггаттыг чечектелген сесерлик дег апаар, хилинчек көрбестей бээрлер.

¹³Чалыы кыстар самнап хөглээр, аныяк оолдар, кырганнар база! Оларның кажыыдалын хөглээшкин-биле солуур мен, оларны аргалаар мен, муңгарал соонда, өөртүр мен.

¹⁴Бурганның бараалгакчыларын элбек-чаагай аъш-чем-биле чемгерер мен, чонум Мээң ачы-буян хайырлалымны четтиргеш, тодар». Дээрги-Чаяакчының медеглээн чүвези ол-дур.

¹⁵Дээрги-Чаяакчы мынча дээн: «Рамада [42] алгы-кышкы, ажыг-шүжүгнүң ыы-сыызы дыңналып тур. Рахил [43] ажы-төлүнүң ажыын ажып ыглап, хөңнү чазалбайн тур, чүге дээрге ажы-төлүн ышкынган-дыр»

¹⁶Дээрги-Чаяакчы мынча дээн: «Ишкирнигип ыглавайн көр, карааң чажы төгүлбезин, чүге дээрге сээң күш-ажылың дээш шаңнал көрдүнген — деп, Дээрги-Чаяакчы медеглээн, — ажы-төлүң дайзыннарының чуртундан дедир чанып кээр!

¹⁷Сээң идегелиң — келир үеде — деп, Дээрги-Чаяакчы медеглээн, — оолдарың боттарының ээлээн черинче эглип кээр!

¹⁸Дыңнап кагдым — Израиль ыглап-сыктап: „Сен мени кезеттиң, чөрүү молдурга ышкаш, кеземче алдым. Эглип келзин дээш, мени ээлдирип алам, Дээрги-Чаяакчы, Сен — мээң Бурганым болгай сен!

¹⁹Мен оруктан өскээр эггеш, хараададым, бачыдым билингеш, бажым шаштынып турдум! Адым баксырап, бодумну бужартаттым, аныяк шаамның багын чүктеп чор мен“ — деп тур.

²⁰А Эфрем — Мээң эргим оглум, ынак төлүм эвес чүве бе? Мен ону чаңгыс эвес катап чемелеп турдум, ынчалза-даа черле утпаан мен! Мээң сеткил-чүрээм ол дээш муңгарап чор, Мен ону кээргеп тур мен!» Дээрги-Чаяакчының медеглээн чүвези ол-дур.

²¹«Бодуңга орук демдеглээр даштардан салып ал, чагылардан тургузуп ал, сеткил-чүрээңни биеэде чоруп турганың дорт орукче угландыр. О, Израиль-кыс, эглип кел, бодуңнуң хоорайларыңче эглип кел!

²²Кажанга чедир улчуп кээр сен, өскерликчи кыс? Дээрги-Чаяакчы чер кырынга туруп көрбээн чүүлдү кылды: кыс кижи бодунуң эр эжинче дедир эглип келди [44]».

²³Аг-шериглиг Дээрги-Чаяакчы, Израильдиң Бурганы: «Кажан мен израиль чонга эки чолду эгидеримге, Иудеяда, ооң хоорайларында улус: „Чөптүг-шынныг оран-сава, ыдыктыг даг! Дээрги-Чаяакчы сеңээ ачы-буяндан хайырлазын!“ — деп сөстерни чугаалаар.

²⁴Шак бо черни Иудеяның чону, ооң бүгү хоорайларының чурттакчылары, чер ажылдыглар болгаш сүрүг малы-биле көжүп чоруур улус эп-найыралдыг ээлеп чурттаар.

²⁵Могап-шылаан улуска суг ижиртир мен, шагзыраан улусту тоттурар мен» — дээн.

²⁶Ынчан мен одунгаш, карактарым көрүп келдим. Удуп чыткан үем тааланчыг болду.

²⁷«Израиль биле Иудеяны чурттакчы чон болгаш мал-маган-биле долдурар үем кел чыдыр — деп, Дээрги-Чаяакчы медеглээн. —

²⁸Мурнунда Мен дазылы-биле тура тыртар, үрегдээр, буурадыр, узуткаар болгаш хора халдадыр дээш олардан карак салбайн турдум. Ам Мен быжыглаар база тарып олуртур дээш олардан карак салбас мен — деп, Дээрги-Чаяакчы медеглээн. —

²⁹Ол үеде улус: „Адалары шаңгыр кат чип турган, а ажы-төлдүң дижи кагжаан“ — деп чугаалавайн баар.

³⁰Чүге дээрге кижи чүгле бодунуң кем-буруузу дээш өлүр; шаңгыр катты кым чигенил — ооң дижи кагжаар.

³¹Израильдиң чону-биле база Иудеяның чону-биле чаа чагыг-керээ чарар үем кел чыдыр — деп, Дээрги-Чаяакчы медеглээн. —

³²Оларның ада-өгбезин холундан чедип алгаш, Египеттен үндүре бергеш, олар-биле чарганым дег эвес, өске чагыг-керээ болур. Олар ук чагыг-керээни үрээн болгай, а Мен оларның Ээзи турган мен [45] — деп, Дээрги-Чаяакчы медеглээн. —

³³Мен ол хүннерде израиль чон-биле мындыг чагыг-керээ чарар мен: Бодумнуң дүрүм-хоойлумну оларның угаан-медерелинче киирер мен, оларның чүректеринге бижип каар мен! Мен оларның Бурганы болур мен, а олар Мээң чонум болур — деп, Дээрги-Чаяакчы медеглээн. —

³⁴Моон соңгаар кым-даа өске кижини, бодунуң ха-дуңмазын, сургап: „Дээрги-Чаяакчыны билип алыңар!“ — дивес, чүге дээрге олар шупту, улуг-бичези чокка, Мени билген турар — деп, Дээрги-Чаяакчы медеглээн. — Мен оларның кем-буруузун өршээр мен, оларның бачыттарының дугайында оон ыңай сагынмас мен».

³⁵Хүндүскү үени чырытсын дээш хүннү хайырлаан, дүнеки үени чырытсын дээш ай биле сылдыстарга дүрүмнер доктааткан, далайны хөлзедип, чалгыгларны шимээргедип турар Аг-шериглиг Дээрги-Чаяакчы деп аттыг Бурган мынча дээн:

³⁶«Бо дүрүмнер Мээң мурнумга күжүн чидирбези дег, Израильдиң салгалы Мээң мурнумга кезээ мөңгеде чон бооп артар».

³⁷Дээрги-Чаяакчы мынча дээн: «Бедик дээр хемчээттинмес, черниң ханы үндезиннери шинчилеттинмес, Мен база Израильдиң салгалындан, бак үүлгедиглер кылган-даа болза, ойталавас мен!» Дээрги-Чаяакчының медеглээн чүвези ол-дур.

³⁸«Бо хоорайны Дээрги-Чаяакчыга алдар кылдыр Хананел суургазындан Азыгда хаалгага чедир катап база тудар үе кээр — деп, Дээрги-Чаяакчы медеглээн. —

³⁹Чер хемчээр хендир оон Гарив тейге чедир шөйүлгеш, оортан Гоафче ээптер.

⁴⁰Ам мөчү-сөөк биле хүл шыпкан бүгү шынаага база Кедрон суунга чедир, чөөн чүкте Аът хаалгазынга чедир бүгү шөлдер Дээрги-Чаяакчының ыдыктыг чери апаар [46], ол хоорайны кажан-даа үреп буспас, узуткавас».