Read Ыдыктыг Библия, 2011 Иеремия 33 Bible Online

Иеремия 33 - Ыдыктыг Библия, 2011 bible

Иеремия 33

¹Дээрги-Чаяакчы Иеремияга, кажан ол таңныылдар шөлүнге хоругдал адаанга турда, Бодунуң сөзүн база катап ажыдып чугаалаан.

²Черни чаяагаш, ону хевирлеп, быжыглаан Дээрги-Чаяакчы деп аттыг Бурган:

³«Мени кыйгыр, сеңээ харыылаар мен, сээң билбейн чорааның, өндүр улуг, билип аары берге чүүлдерни сеңээ ажыдар мен» — дээн.

⁴[4-5] Дээрги-Чаяакчы, Израильдиң Бурганы бо хоорайны бүзээлээн дайзынның хылыжындан кээп дүжер бажыңнарның база Иудеяның хааннарының ордуларының дугайында мынча дээн: «Оларның чурттакчылары халдейлер-биле дайылдажып турар-дыр, ынчалза-даа ол бажыңнарны мөчү-сөөк долар! Мен килеңнеп, хорадааш, чурттакчыларны кыргып-хыдыыр мен! Оларның бүгү кем-буруузу дээш, Мен бо хоорайдан хая көрүнген мен.

⁶Ындыг-даа болза, Мен бо хоорайга эмненип, сегиир арга берип, экиртир мен. Оларны эмнээш, элбек-чаагай амыр-тайбың биле алыс шынны оларга ажыдар мен.

⁷Мен Иудея биле Израильге эки чолду эгидер мен, биеэде турганы дег быжыглаар мен.

⁸Олар Меңээ удур бачыт үүлгедип турган — Мен оларны бүгү кем-буруузундан арыглаар мен. Олар Меңээ удур бачыт үүлгедип, Меңээ удур тура халып турган — Мен оларның бүгү бузут-багын өршээр мен.

⁹Иерусалим хоорай Меңээ өөрүшкүлүг ат апаар, чер-делегейниң бүгү чоннары ону алгап-мактап, алдаржыдар. Өске чоннар Мээң бо хоорайга хайырлаан ачы-буяным дугайында дыңнап каар; Мээң бо хоорайга хайырлаан ачы-буяным база чаагай чоруум дугайында билип кааш, олар сүрээдеп, сирилей бээр».

¹⁰Дээрги-Чаяакчы мынча дээн: «Силер бо чер дугайында: „Бо дээрге ээнзирээн чер-дир, мында кижи-даа, мал-маган-даа чок!“ — дээр-дир силер. Ынчалза-даа маңаа — ам хоозураан, чаңгыс-даа чурттакчы артпаан, кижи-даа, дириг амытан-даа чок Иудеяның хоорайларын, Иерусалимниң кудумчуларын база катап ыыт-шимээн дола бээр:

¹¹өөрүшкү биле хөглээшкин үнү, күдээ оол биле келин кыстың үнү дыңналыр! Бо черге Дээрги-Чаяакчының өргээзинге өөрүп четтириишкин өргүлдери кылган улустуң: „Аг-шериглиг Дээрги-Чаяакчыга өөрүп четтириңер, Ол ачылыг-дыр, Ооң энерели кезээ шагда үстүп төнмес-тир!“ — деп алгырган үнү дыңналыр. Чүге дээрге Мен бо черниң чурттакчыларынга эки чолду эгидер мен, бүгү чүве биеэде турганы ышкаш апаар». Дээрги-Чаяакчының чугаалаан чүвези ол-дур.

¹²Аг-шериглиг Дээрги-Чаяакчы мынча дээн: «Шак бо ээнзирээн, кижи-даа, дириг амытан-даа чок черге — ооң бүгү хоорайларының чоогунга база катап кадарчыларның сүрүг малын дыштандырар одар-белчиирлери турар.

¹³Даглар, Шефела болгаш Негевте турар хоорайлар чоогунга, Вениаминниң черинде болгаш Иерусалимниң чоок-кавызында хоорайлар чоогунга, Иудеяның бүгү хоорайларының чоогунга сүрүг малдар боттарының ээзинге кадартып, база катап оъттай бээр». Дээрги-Чаяакчының чугаалаан чүвези ол-дур.

¹⁴«Израиль биле Иудеяның чонунга аазаан ачы-буянымны көргүзер хүннерим кээр — деп, Дээрги-Чаяакчы медеглээн. —

¹⁵Ол хүннерде, ол үеде Давидтен укталган чөптүг-шынныг Өзүмнү өстүрер мен, чер кырынга шын шииткел биле чөптүг чорукту ол доктаадыр.

¹⁶Ол хүннерде Иудея камгалал алыр, Иерусалим айыыл чок чурттаар, Иерусалимге „Яхве-Седкену [48]“ деп ат тыпсыр».

¹⁷Дээрги-Чаяакчы: «Израильдиң дүжүлгезинге үргүлчү Давидтиң үре-салгалындан үнген кижи саадаар.

¹⁸Левит бараалгакчылар база бүрүн өрттедир өргүлдер кылыр дээш, далган-тараа өргүлдери өрттедип, эп-найырал өргүлдери эккеп салыр дээш Мээң мурнумга үргүлчү турар» — деп чугаалаан.

¹⁹[19-20] Иеремияга Дээрги-Чаяакчы Бодунуң сөзүн ажыдып, мынча деп чугаалаан: «Мен хүнге база дүнге, олар чогуур үезинде солчуп турар кылдыр, кажан-даа күш чок апарбас чагыг берген мен.

²¹Мээң чалчам Давид-биле чарган чагыг-керээм база күш чок апарбас — Давидтиң салгакчылары ооң дүжүлгезинге саадап, чагырар; Мээң чалчаларым — левит бараалгакчылар-биле чарган чагыг-керээм база күштүг бооп артар.

²²Сылдыстарның аг-шерии санаттынар бе, далайның элезининде хемчээл бар бе?! Мээң чалчам Давидтиң болгаш Меңээ бараан болган левиттерниң үре-салгалын база ынчаар өстүрүп-көвүдедир мен».

²³Дээрги-Чаяакчы Иеремияга Бодунуң сөзүн ажыдып:

²⁴«Иеремия, көр даан. Бо улус: „Дээрги-Чаяакчы шаанда шилип алган ийи төрел бөлүүнден ойталаан-дыр!“ — дижип тур. Олар Мээң чонумну куду көрүп, ону ам чон деп санавайн тур» — деп чугаалаан.

²⁵Дээрги-Чаяакчы: «Хүндүскү болгаш дүнеки үеге чагыг берип, дээр биле черниң өскерлиш чок дүрүм-хоойлузун доктаатканым дег,

²⁶Мен Иаковтуң салгалындан, Мээң чалчам Давидтиң салгалындан ойталавас мен: оларның аразындан Авраам, Исаак болгаш Иаковтуң салгалын чагырар кижилерни шилиир мен! Мен оларга эки чолду эгидер мен» — дээн.