Read Ыдыктыг Библия, 2011 Иеремия 4 Bible Online

Иеремия 4 - Ыдыктыг Библия, 2011 bible

Иеремия 4

¹«Израиль, бир эвес эглип келиксээр болзуңза, Менче эглип кел — деп, Дээрги-Чаяакчы медеглээн. — Чүдек-бужар дүрзүлериңни ап октапкаш, улчуп чорбастай берзиңзе база

²шынныы-биле, ак сеткилдии-биле: „Дириг Дээрги-Чаяакчының ады-биле даңгыраглап тур мен!“ — дээр болзуңза, өске чоннар Бургандан ачы-буян алыр, Ол дээш чоргаарланыр».

³Дээрги-Чаяакчы Иудея биле Иерусалимде чурттаан улуска мынча деп турар-дыр: «Кур черден боттарыңарга аңдарып алыңар, тенниг үнүштер аразынга үрезин тарываңар!

⁴Дээрги-Чаяакчыга хамааржырыңарны көргүзери-биле чүрээңерни демдектеп, арыглап алыңар, Иудеяның улузу, Иерусалимниң чурттакчылары, оон башка силерниң бузуттуг херектериңер дээш Мээң килеңим чалбыышталдыр хып, өжүртүнмес өрт ышкаш апаар».

⁵«Иудеяга чарлап көрүңер, Иерусалимге медээлеп чугаалаңар, бүгү чуртка трубадан этсиңер, үнүңер шаа-биле: „Барып, быжыглаттынган хоорайларга чыглыылы!“ — деп алгырыңар.

⁶Сионче дезер дээш ынаар углай туктан көдүрүңер, амы-тыныңар камгалаңар, черле доктааваңар, чүге дээрге Мен соңгу чүктен айыыл-халап, кончуу сүргей өлүм-чидим эккээр мен!

⁷Шырыштан үнүп келген арзылаң дег, чоннарны узуткаар хаан кел чыдар-дыр, ол силерниң чериңерни хоозурадыр дээш бодунуң чыдынындан туруп келген-дир. Узуткакчы хоорайларыңарны үреп бузуп кааптарга, оларга чурттакчылар артпас».

⁸Ынчангаш качыгдал хевинден кеткеш, ишкирнигип ыглажыңар, Дээрги-Чаяакчының килеңи бисти оюп эртер эвес.

⁹«Ол хүн хаан-даа, ноян-даа эр соруун чидириптер, Бурганның бараалгакчылары коргуп-сүртээр, медээчилер аңгадай бээр» — деп, Дээрги-Чаяакчы медеглээн.

¹⁰Мен: «Аа халак, Дээрги-Бурган-Чаяакчы! Сен бо чонга, Иерусалимниң чурттакчыларынга тайбың дүжерин аазааш, оларны ылап-ла мегелеп кагдың. Хылыш оларның боскун үзе кезер деп барды» — деп чугааладым.

¹¹Шак ол чонга, Иерусалимниң чурттакчыларынга: «Ол үеде Мээң күжүр чонумче ээн кургаг ховунуң тас тейлеринден изиңейндир чип турар хат хадып кээр! Ындыг хатка тараа арыглай челбиттинмес, үрезин саваңдан арыглаттынмас.

¹²Хат хөлүн эрттир дыңзыг боор! Мээң күзел-соруум ёзугаар ол хат хадып кээрге, Мен чонумга хамаарыштыр шииткелимни үндүрер мен!» — деп, Бурган чугаалаан.

¹³Булут ышкаш, дайзын көдүрлүп олур, ооң дайынчы тергелери казыргы дег, аъттары эзирлерден кашпагай! Ат болдувус-ла, өлүп читтивис-ле!

¹⁴«Иерусалим, бодуңнуң чүрээңни бузуттан арыглап ал, ынчан камгалалды алыр сен! Чежеге дээр кара бодалдарың амдажыдар сен?

¹⁵Дан хоорайдан, Эфрем дагларындан өлүмнүң медээзи дыңналып тур.

¹⁶Чоннарга мону чарлаңар, Иерусалимге дамчыдыңар: ырак чурттан аг-шериг кел чыдыр, Иудеяның хоорайларында оларның алгы-кышкызы чаңгыланып тур.

¹⁷Шөлдү долганган таңныылдар дег, олар найысылалды бүзээлеп келди. Чүге дээрге Иудея Меңээ удур тура халаан-дыр! — деп, Дээрги-Чаяакчы медеглээн. —

¹⁸Бодуңнуң-на ажыл-херектериң, бак үүлгедиглериң бо бүгүнү сенче халдатты! Бузут-багыңдан тывылган ажыг-шүжүг сээң чүрээңни кемдедип тур».

¹⁹Ишти-хөңнүмнү! Ишти-хөңнүмнү! Чүрээм аарышкыдан харыксырап, чарлыр чыгыы соп тур, ыыттавайн баар аргам чогул. Чүге дээрге трубалар эткенин — дайынчы медээни дыңнап тур мен.

²⁰Халапты халап солаан, бүгү чурт хоозураан; чадырларывыс хенертен, оран-сававыс — карак чивеш дээр аразында буступ кээп дүшкен.

²¹Кажанга чедир дайынның туктарын көрүп, дайынчы трубалар этсирин дыңнаар мен?

²²«Мээң чонум мелегей-дир, Мени билбес-тир! Угаан кирбээн уруглар дег, сарыыл чок-тур; олар чүгле бузут үүлгедир талазы-биле мергежээн, а буян кылып билбес-тир».

²³Черже көрдүм — ол ужу-бажы билдинмес, ээн болду, дээрже көрдүм — ында чырык чок болду.

²⁴Дагларже көрдүм — олар сирилеп тур, тейлер шупту сүрээдеп тур.

²⁵Көөрүмге, чаңгыс-даа кижи чок, дээрниң куштары тарадыр ужа берген болду.

²⁶Көөрүмге, чечектелген чер ээн кургаг хову апарган болду, ооң бүгү хоорайларын Дээрги-Чаяакчының күзел-соруун ёзугаар бузуп каапкан — Ооң килең-кылыы ол хире-дир!

²⁷Дээрги-Чаяакчы: «Бо бүгү чер хоозурап каар, ынчалза-даа ону бүрүнү-биле узуткавас мен!

²⁸Ынчангаш чер ыглап-сыктаар, бедик дээр карара бээр; шиитпиримни үндүрген мен, ам ону өскертпейн, күүседир мен» — деп чугаалаан болгай.

²⁹Аъттыг-шеригжилер биле ча адыгжыларының алгы-кышкызындан хоорай чурттакчылары тарадыр маңнажып тур. Олар шыргай аргаларже дезип, кашпалдарже чаштып чоруп тур. Хоорайлар шупту ээнзирээн, оларда чаңгыс-даа чурттакчы артпаан.

³⁰А сен, куруглаан Иудея, ам канчаар сен? Каас-коя хептер кедип, алдын каасталгалар-биле шиметтинип, карактарың будуп чордуң. Хей-ле каастанып чораан болдуң! Сээң-биле самыырап турган таныштарың сени тоовастап, амы-тыныңны үзүксеп тур.

³¹Алгы-кышкыны дыңнап тур мен — херээжен кижи божуп чыткан-даа дег, ол дун төлүн божуп, човууртаан-даа ышкаш. Сион-кыс ыглап-сыктап, уё-човуур-биле холун өрү сунуп: «Ат болдум! Өлүрүкчүлерден дезер дээш шаам төндү!» — деп тур.