Read Ыдыктыг Библия, 2011 Иеремия 5 Bible Online

Иеремия 5 - Ыдыктыг Библия, 2011 bible

Иеремия 5

¹«Иерусалимниң кудумчуларын эргий кылаштаңар. Көрүп чоруңар, сураглап билип алыңар, төп шөлдерден дилеңер: алыс шынче чүткээн, оода чаңгыс чөптүг кижи бар-дыр бе, ындыг кижи тып шыдаар силер бе? Тып алзыңарза, Мен найысылалды өршээр мен!

²Иерусалимниң чурттакчылары дириг Дээрги-Чаяакчының ады-биле даңгыраглап турар, ынчалза-даа ол даңгырактары меге боор-дур».

³Дээрги-Чаяакчы, Сээң карааң алыс шынны көрүп кагбас деп бе? Чонуңну буурадып турдуң — а ол аарышкыны медереп билбес-тир, ону узуткап турдуң — а ол угаан киреринден ойталаар-дыр. Оларның сеткил-чүрээ даштан кадыг апарып, Бурганче эглиринден ойталады.

⁴Мен ынчан: «Бо-даа карачал улус-тур, олар бүдүүлүк болгаш, Дээрги-Чаяакчының оруун, боттарының Бурганының дүрүмнерин билбес болгай.

⁵Ынчаарга ызыгууртан кижилерге барып, чугаалажып көрейн. Олар Дээрги-Чаяакчының оруун, Бурганының дүрүмүн билир болгай» — дээн мен. Ынчалза-даа олар база шупту Бурганның кедирген хомудун чуура шаап, моожазын үзе тыртып каапкан болду.

⁶«Ынчангаш оларже шыргай арыгдан арзылаң халдаар, оларны ховунуң бөрүзү үзерлеп кааптар, ирбиш хоорайлар чанынга кеденир: хоорайдан үнген кижи бүрүзүн ол үсперлеп кааптар! Чүге дээрге оларның бачыттары көвүдээн-дир, Меңээ өскерлири дам барган-дыр.

⁷Мен сени канчап өршээр мен? Сээң улузуң Менден ойталаан-дыр, Бурган болбас дүрзүлер ады-биле даңгыраглаар-дыр. Мен тоттуруп турумда-ла, олар самыыралга алзып, самыын херээженнер бажыңнарында тырлып турар-дыр.

⁸Семис киргин аскыр дег, кижи бүрүзү өске кижиниң кадайынче туралап, киштеп кыйгырар-дыр.

⁹Таанда-ла ол бүгү дээш оларны кезетпес мен бе? — деп, Дээрги-Чаяакчы медеглээн. — Таанда-ла ындыг чондан өжээн негевес мен бе?

¹⁰Дайзын чоннуң виноград шөлдеринче [7] барып, үрегдезин, ынчалза-даа бүрүнү-биле узуткавазын. Виноград сыптарын үрегдезин, чүге дээрге олар Дээрги-Чаяакчыга хамаарышпас-тыр.

¹¹Чүге дээрге Израильдиң-даа, Иудеяның-даа чону Меңээ шынчы эвес болган-дыр — деп, Дээрги-Чаяакчы медеглээн. —

¹²Олар Дээрги-Чаяакчы дугайында мегелеп чугаалажып: „Бурган бисти канчаптар деп. Бисти айыыл-халап-даа таварбас, дайын-чаа-даа, аш-чут-даа көрбес бис!

¹³Ооң медээчилери хат ышкаш хоозун кижилер-дир; Дээрги-Чаяакчының сөзү оларга ажыттынмаан. Оларның оштаан бүгү бак чүвези боттары-биле боттанзын!“ — деп турганнар».

¹⁴Аг-шериглиг Дээрги-Бурган-Чаяакчы мынча дээн: «Иеремия, улустуң ындыг чугаа-сөзү дээш, сээң аксыңдан үнер Мээң сөзүмнү от дег кылып каар мен, бо чон ыяш апаар — ону ол от чиптер.

¹⁵Көөр силер, израильчилер, Мен силерже ыракта чонну ыдыптар мен — деп, Дээрги-Чаяакчы медеглээн, — күчүлүг, эрте-бурунгу чонну! Силер ооң дылын билбес боор силер, чугаа-сөзүн билип шыдавас силер.

¹⁶Ооң согун саадаа — ажык чевег дег, ооң дайынчылары шупту күш-шыдалдыг.

¹⁷Ол чон силерниң дүжүдүңерни, аъш-чемиңерни сыырыптар, оглу-кызыңарны база сыырыптар, мал-маганыңарны чиптер, виноградыңарны, фига чимизиңерни база чиптер. Ол силерниң идегеп турар быжыглалдыг хоорайларыңарны хылыш-биле чылча шаап каар.

¹⁸Ынчалза-даа ынчан безин силерни төнчүзүнге чедир узуткавас мен — деп, Дээрги-Чаяакчы медеглээн. —

¹⁹Улус: „Дээрги-Чаяакчы Бурганывыс бо бүгүнү бис-биле чүү дээш кылганы ол?“ — деп айтырарга, „Силер Оон ойталааш, бодуңарның чериңерге өске бурганнарга бараан болуп турдуңар, ынчангаш өске черге хары улуска бараан болур силер“ — деп харыылаар сен, Иеремия.

²⁰Иаковтуң салгалынга медээлеп, Иудеяга дыңнадып:

²¹„Мону дыңнап ал, мелегей, угаан чок чон! Карактыг хиреңерде, көрбес-тир силер, кулактыг хиреңерде, дыңнавас-тыр силер!“ — деп чугаалаңар.

²²Менден коргар база сүрээдээр ужурлуг эвес ийик силер бе? — деп, Дээрги-Чаяакчы медеглээн. — Мен дээрге далайны кызыгаарлай элезин салып каан Бурган-дыр мен. Суг ажып шыдавас мөңге кызыгаарны кылып каан Бурган мен. Далайның чалгыглары хөлзеп, часказа-даа, ону үреп күш четпес, шимээргеп, диргелзе-даа, ону ажа шурап шыдавас.

²³А бо чон чөрүү, чагырга билбес-тир: Менден хая көрүнгеш, чоруй барган-дыр.

²⁴Олар сеткил-чүрээнде: „Дээрги-Чаяакчы Бурганывыстан коргуп чоруулу, Ол биске чогуур хуусаада, күзүн-даа, чазын-даа чаъзын чагдырып, дүжүт ажаар үелерни тодарадып бээр болгай“ — дивээн-дир.

²⁵Оларның кем-буруузу ол бүгүнү оларга бербейн барды, бачыттары ачы-буянны олардан хунаап аппарды.

²⁶Мээң чонумнуң аразында бузуттуг улус бар-дыр: олар кедегде олурар куш тудукчузу ышкаш, какпа-дузаан салып алгаш, кижилер тудар-дыр!

²⁷Куштар долган хааржак ышкаш, кара сагыш-биле тыпкан олча оларның бажыңнарын долган. Ынчангаш олар байып, депшээн-дир,

²⁸чооннап, чагландыр семирип калган-дыр. Кылбас-ла бузуттуг үүлгедии чок, өскүстер эки-чаагай чурттаар кылдыр, оларның херээн чөптүү-биле шиитпес, ядыыларның чаргызын шынныы-биле шиитпес улус-тур.

²⁹Таанда-ла ол бүгү дээш оларны кезетпес мен бе? — деп, Дээрги-Чаяакчы медеглээн. — Таанда-ла ындыг чондан өжээн негевес мен бе?

³⁰Бо черде коргунчуг чүдек-бужар чүүлдер бооп турар-дыр:

³¹бүдүү билирлер мегелеп медеглээр-дир, Бурганның бараалгакчылары боттарының туразы-биле улусту чагырар-дыр, Мээң чонумга ол чорук таарымчалыг-дыр. Ол бүгүнүң хараазында силер-биле чүү боор деп?