Read Ыдыктыг Библия, 2011 Иеремия 50 Bible Online

Иеремия 50 - Ыдыктыг Библия, 2011 bible

Иеремия 50

¹Дээрги-Чаяакчының Иеремия медээчини дамчыштыр Вавилон болгаш халдей чер дугайында медеглээн сөзү бо-дур.

²«Өске чоннар аразынга медеглеңер, чарлаңар, медээ тугун көдүрүңер, чүнү-даа чажырбайн: „Вавилон эжелеттирер-дир, Вил бурган бак атка кирер-дир, Меродах бурган бастырар-дыр — Вавилоннуң көжээ-бурганнары бужартаар-дыр, дүрзү-бурганнары чуура шаптырар-дыр“ — деп чугаалаңар.

³Соңгу чүктен бир чон келгеш, Вавилонга удур халдааш, ооң черин хоозурадыр. Аңаа кым-даа чурттап артпас: кижи-даа, дириг амытан-даа оон көжүп үнгеш, улчуп чоруй баар.

⁴Ол хүннерде, ол үе кээрге, Израильдиң чону база Иудеяның чону кады чедип кээр — деп, Дээрги-Чаяакчы медеглээн. — Олар ыы-сыылыг чорупкаш, боттарының Бурганы Дээрги-Чаяакчыже чүткүп эгелээр.

⁵Олар Сион чедер орук дилээр, арыннарын олче шиглей көрүп: „Барып, Дээрги-Чаяакчыга каттыжып, уттуп-кагбас мөңге керээни Ооң-биле чарып аалы“ — дээрлер.

⁶Мээң чонум — азып читкен хойлар; оларны кадарчылары оруундан астыра берген, даглар аразында улчуп чоруурлар. Даглар, тейлер кезип, тарай бергеш, дыштанып турган өдээн уттупканнар.

⁷Уткужуп келген бүгү улус оларны чип турар, кызып-кыйган дайзыннары: „Бисте буруу чок! Чүге дээрге олар Дээрги-Чаяакчының мурнунга, чөптүг-шынныг оран-саваның мурнунга, ада-өгбезиниң идегели болур Дээрги-Чаяакчының мурнунга бачыт үүлгеткен болгай“ — деп чугаалап турар.

⁸Вавилондан дезиңер, халдей черден чоруй барыңар, сүрүг хой баштаан хуналар дег болуңар.

⁹Чүге дээрге Мен соңгу чүкте черге өндүр улуг чоннардан шериг чыггаш, оларны Вавилонга удур ыдар мен — олар олче халдаарга, ол эжелеттирер. Дайзын шеригниң согуннары — олча-тывыш тыппайн, дедир чанмас шыырак дайынчының согуннары-дыр.

¹⁰Халдей чон оларга үптеттирер, үптекчилер тодуп ханар! — деп, Дээрги-Чаяакчы медеглээн. —

¹¹Өөрүп-хөглеп, байырлап, Мээң ээлээн черимни үптеп турдуңар! Шыкта бугажык дег дешкилеп, аскырлар дег киштеп турдуңар!

¹²Ол дээш силерниң ие-чуртуңарның ады баксыраар, төрээн ие-чериңерниң арны кызар, ол ам чоннарның адак-багы апаар, ээн кургаг хову, суг чок ээн чер болур.

¹³Дээрги-Чаяакчының килеңинден Вавилон чурттакчы чок чер апаар, бүрүнү-биле ээнзирээр. Вавилоннуң чаны-биле эрткен кижи бүрүзү ооң бузундуларын көргеш, элдепсинер, кочулап сыгырар.

¹⁴Ча адыгжылары, Вавилон хоорайны бүзээлеп, чыскаалыңар, ону адыңар, согуннарыңар камнаваңар, чүге дээрге ол Дээрги-Чаяакчыга удур бачыт үүлгеткен-дир!

¹⁵Хоорайның бүгү талаларындан алгыржыңар! Ол өршээл дилээр, ооң камгалал суургалары буступ кээп дүжер, ханалары үрелип каар — Дээрги-Чаяакчының кеземчези ол-дур! Оон өжээнден негеңер. Ол канчаар аажылап туржук, ону база ынчаар аажылаңар!

¹⁶Вавилонда чер болбаазырадып, дүжүт ажаар улусту чок кылыңар! Кызагдакчының хылыжындан корткаш, кижи бүрүзү бодунуң чонунче дедир чана берзин, бодунуң черинче маңнап ыңай болзун.

¹⁷Израиль — тоо быдараан сүрүг хой-дур, арзылаңнар ону тарай сывырыпкан. Баштай ону Ассирияның хааны чип турган, ооң соонда Вавилоннуң хааны Навуходоносор ооң сөөктерин хемдээн».

¹⁸Ынчангаш Аг-шериглиг Дээрги-Чаяакчы, Израильдиң Бурганы мынча дээн: «Мен Вавилоннуң хаанын, ооң чуртун, мооң мурнунда Ассирияның хаанын кезеткеним дег, кезедир мен.

¹⁹Мен Израильди биеэги одар-белчииринче дедир чандырар мен, сүрүг хоюм Кармил биле Васанга оъттаар, Эфрем биле Галаад дагларынга тодуп аар.

²⁰Ол хүннерде, ол үе кээрге, улус Израильдиң кем-буруузун дилээр-даа болза, үре-түңнелдиг болбас, Иудеяның бачыдын дилээр-даа болза, тыппас — деп, Дээрги-Чаяакчы медеглээн, — чүге дээрге Мен чонумнуң артынчызын өршээр мен.

²¹Мератаим деп чуртка удур, Пекодтуң чурттакчыларынга удур дайылдажып үнүвүт [67], оларны өлүрүп, кижи арттырбайн кыргып-хыды — деп, Дээрги-Чаяакчы медеглээн. — Мээң дужааган бүгү чүвемни күүсет!

²²Ол черде — чаа-дайын дааш-шимээни, коргунчуг үрегдээшкин!

²³Бүгү чер-делегейни чуура шаап турган маска боду буступ, чуурлуп каар! Өске чоннар аразынга Вавилон коргунчуг үлегер-чижек апаар.

²⁴Мен сени тудар четки салып каан мен, Вавилон. Сен ону билбес болгаш, олче кире халый бээр сен. Дайзын сээң кырыңга кээрге, туттуруп аар сен, чүге дээрге Дээрги-Чаяакчы-биле тулчуп турган-дыр сен.

²⁵Дээрги-Чаяакчы Бодунуң шыгжамырын ажыткаш, килеңиниң чепсээн уштуп алган: Аг-шериглиг Дээрги-Бурган-Чаяакчы халдей черге ажыл-херек чок артпас!

²⁶Бүгү чүктен Вавилонче халдаңар. Ооң тараа шыгжаан черлерин ажыдыңар, кошкул-хөреңгизин тараа дег оваалай чыңар, аңаа чүү-даа артпас кылдыр бүрүнү-биле узуткап кааптыңар!

²⁷Ооң хамык бугаларын [68] өлүрүп калыңар — оларны дөгерер дээш аппарзын. Халдейлер ат болур, оларның кеземче көөр үе-шагы келген-дир.

²⁸Вавилон черден дезип, тын менди үнерин бодаан улустуң алгы-кышкызы дыңналып тур, ам Сионда улус Дээрги-Чаяакчы Бурганывыстың өжээн негээнин, Бодунуң өргээзи дээш өжээн негээнин билип алыр.

²⁹Вавилонга удур ча адыгжыларын кыйгырыңар! Кым-даа амы-тынныг артпас кылдыр, ону долгандыр туруп, бүзээлеңер-ле! Үүлгедиглери дээш ону кезедиңер, Вавилон өске чоннарны канчаар аажылап чорааныл, ону база ынчаар аажылаңар, чүге дээрге ол Израильдиң ыдыктыг Бурганы Дээрги-Чаяакчының мурнунга өрү көрдүнүп турган-дыр.

³⁰Ооң кудумчуларынга аныяк оолдар кырлып каар, ооң дайынчылары шупту ол хүн өлүп каар». Дээрги-Чаяакчының медеглээн чүвези ол-дур.

³¹«Адыыргак хей, Мен сеңээ удур мен — деп, Аг-шериглиг Дээрги-Бурган-Чаяакчы медеглээн, — чүге дээрге сээң кеземче көөр үе-шагың келген-дир.

³²Адыыргак хей тептигип кээп дүжер, ону кым-даа көдүрбес. Ооң хоорайларын от-биле бүргээр мен, ол от долгандыр бүгү чүвени чиптер!»

³³Аг-шериглиг Дээрги-Чаяакчы мынча дээн: «Израиль биле Иудеяның чону дарлаттырып турар-дыр! Оларны дайзын тудуп аппаргаш, салбайн тудуп турар, хостаар хөңнү чок-тур.

³⁴Ынчалза-даа оларның Камгалакчызы күштүг, Ооң ады — Аг-шериглиг Дээрги-Чаяакчы! Ол оларга болчур, оларның черинге оожургалды эккээр, а Вавилоннуң чурттакчыларын дүвүрелге алзыр.

³⁵Хылыш халдейлерже көдүрлүр — деп, Дээрги-Чаяакчы медеглээн. — Вавилоннуң чурттакчыларынче, ооң нояннарынче болгаш мерген угаанныгларынче көдүрлүр.

³⁶Хылыш ооң төлгечилеринче көдүрлүр, ынчангаш олар угаан чок апаар, хылыш ооң дайынчыларынче көдүрлүр, ынчангаш олар сирилээр;

³⁷хылыш ооң аъттарынче, дайынчы тергелеринче база ооң аг-шериинче кирген аймак-чоннарже көдүрлүр, ынчангаш олар херээженнер дег кортук апаар. Хылыш Вавилоннуң эртине-байлаанче көдүрлүр, ынчангаш ону үптеп кааптар.

³⁸Ооң сугларынче каңдаашкын халдаарга, суглар соглуп каар. Чүге дээрге бо чер — көжээ-бурганнарлыг чер-дир. Ооң чурттакчылары дүрзү-бурганнар дээш угаанын ышкыныпкан-дыр.

³⁹Ынчангаш Вавилонга чүгле шөө-бөрүлер, аң-мең болгаш страус куштар чурттаар. Ол чер кезээ мөңгеде чурттакчы чок апаар, салгалдан салгал дамчып ээнзиреп каар.

⁴⁰Бурганның үреп бузуп кааны Содом биле Гоморрага дег, олар-биле кожаланчак хоорайларга дег, Вавилонга база чаңгыс-даа кижи чурттавас, кижи амытан ол черге турумчувас».

⁴¹Көрүңер! Соңгу чүкте чурттаан чон, күчүлүг аймак, өндүр улуг хааннар кел чыдыр, олар чер-делегейниң кыдыындан көдүрлүп олур!

⁴²Олар холунда ча-согун, хылыш туткан; олар — каржы-дошкун, кам-хайыра чок улус-тур, оларның алгы-кышкызы далайның дааш-шимээни дег. Аъттыг шаап кел чыдар, тулчурунга белен дайынчылар-дыр, олар сенче халдаары ол-дур, Вавилон-кыс!

⁴³Вавилоннуң хааны оларның дугайында дыңнап кааш, салдыныптар, ону аарышкы, хилинчек, божаан херээженни дег, ат кылыр.

⁴⁴«Иордан хемниң эриинден чечектелген одар-белчиирже [69] үнүп келген арзылаң дег, Мен база вавилончуларны далаштырып сывыртап, оларны чагырар кижини шилип, томуйлаар мен. Меңээ дөмей кым барыл, Менден кым харыы негээрил? Меңээ удурланып шыдаар кадарчы бар бе?

⁴⁵Ынчангаш Дээрги-Чаяакчының Вавилон дугайында шиитпирин, Ооң халдейлер чуртунга удур бодап алган чүвезин дыңнаңар! Дайзын сүрүг малдың хураганнарын алгаш баар, ооң кадында Бурган одар-белчиирлерни хоозурадып каар.

⁴⁶Вавилон эжелеттирер, дааш-шимээнден чер шимчээр, бүгү чоннар алгы-кышкы дыңнаар».