Read Ыдыктыг Библия, 2011 Плач Иеремии 1 Bible Online

Плач Иеремии 1 - Ыдыктыг Библия, 2011 bible

Плач Иеремии 1

¹Аа халак! Аажок хөлдүг хоорай-даа [1] ээнзирээн-дир. Көвей чоннар агайы ам дулгуяк дег. Чурттарның кадыны ам албадаткаш, ажыл кылыр үүлелиг!

²Дүнелерде ыглап орар — чаактары көк суг болган. Ынак чораан улустан ам аргалаптар кижи чок-тур. Өөрү шупту саттыныпкаш, өжээтеннер апарган-дыр.

³Албадаткан аар ажыл, айыыл-халап соон дарый Иудея дайзынның холундува кире берди, өске чоннар аразынга хоргадал-дыш тыппастады, истеп-сүрген улус ону кызап келгеш, тудуп алды.

⁴Байырлап кээр улус читкен, Сионче баар оруктар ам муңгаргай-дыр, эжик-хаалга ээнзирээн. Бурганның бараалгакчылары човууртап тур, ыраажы кыстар шупту муңгак, хоорайның үүлези ажыг-берге!

⁵Иерусалим дайзыннары тергиидеп тур, өштүглери өөрүп тур. Эңдерик хөй бачыды дээш, Дээрги-Чаяакчы ону качыгдатты. Дайзыннар ооң ажы-төлүн хары черже сүрүп бар чор.

⁶Сион-кыс, өндүр каазың оңуп каап-тыр. Нояннарың одар тыппаан ивилерге дөмей-дирлер, сүргеннерниң мурнунда-ла шаа төнген илгип чорлар.

⁷Иерусалим түреп-човаан, улчуп-тояан хүннеринде; дайзынга чон алзыпканда; өмек болур кижи чокта, эрте шагдан эдилеп чораан эртине-байлаан сактып туру. Олче кайгаан дайзыннар, кошкаан көргеш, шоодуп турлар.

⁸Медээжок аар бачыды дээш, Иерусалим бужартады. Шалдаң-дыр деп көрүп каапкаш, алдаржыдып чорааннар ам куду көрдү. А ол боду хая көрнүп, ыы-сыылыг човууртап тур.

⁹Ооң хеви хирлиг турган — келир өйде чүү боорун бодаваан-дыр. Кончуу сүргей буступ дүштү — аргалаптар кижи ам чок. «Дээрги-Чаяакчы, хинчээмни көр — дайзыным дендеп барды!»

¹⁰Ооң бүгү эртине-байлаан дайзынның холу хунаан. Ыдык өргээ саза баскан өске чоннар улузун ол көрүп турар. «Ниитилелиңерге олар каттышпазын!» — деп хорудуң чоп, Дээрги-Чаяакчы!

¹¹Өскелерден аъш-чем дилеп, хоорай чону човууртап тур. Деңгел кирер чемге орнап, эртинезин бээрлер-дир. «Дээрги-Чаяакчы, менче көрем, базындырып турарымны!

¹²Эрткен-дүшкен чорумал чон, дилеп тур мен, эргилип кээп, көрүңер даан: өндүр килең хүнүнде Дээргимден кээр кеземчем дег, шак ол кончуг човалаң дег човалаң-даа турар деп бе?!

¹³Ол сөөктеримче сиңниктир отту дээрден бадырды; буттарымга четки салгаш, дезе бээрин албадапты; күжүр мени аймааратты — хүнден хүнче күжүм калды.

¹⁴Дээргиниң холу эптээн дарлал-дөңгү — бачыттарым — мойнум кызып, күчү-күжүм суларатты. Ооң мени хүлээткени холдар быжыг — ушта чүткүп шыдавас мен!

¹⁵Улуг-шыырак эрлерни Ол менден үндүр сывырыпты; чалыы экерлерим узуткаар дээш, меңээ удур чыыш кылды: арыг кызы — Иудеяны арбайлаштыр соктап каапты.

¹⁶Үргүлчү ыглаар ужурум ол; ийи караам суун иштим. Сорук-күжүм омакшыдар аргалакчы ырай берди. Дайзыннарның күжү дендеп, ажы-төлүм качыгдады».

¹⁷Сион-кыс хей-ле холун сунган — аргалакчы тывылбады. Бүзээлээн бүгү дайзыннарга Израильди Дээрги-Чаяакчы тудуп беривитти. Иерусалимни олар үглеп келгеш, бужар херээженни дег аажылааннар.

¹⁸«Дээргиниң чөптүүн аарай! Ооң сөзүнге удурланып канчаарым ол! Бүгү чоннар, дыңнаңарам, хилинчээмни көрүңерем: хып дээн чалыы оглу-кызым дайзынга туттурдулар.

¹⁹Таныштарым кыйгырган мен, олар мени мегелеп каан. Бурганның бараалгакчылары-даа, ак салдыг кырганнар-даа амыдыраар, шыдал кирер аъш-чем дилээш, хоорайга кырылдылар.

²⁰Ырмазыраан менче көрем, Дээрги-Чаяакчы: ийлей бердим. Чүлдү-чүрээм чарлыр четти — Сеңээ аажок удурланып турган-дыр мен. Даштын хылыш ажы-төлдү кыргып-хыдаан, бажыңда — база-ла өлүм.

²¹Дайзыннар-ла човуурумну дыңнап турар — аргалаптар кижи чок-тур. Айыыл-халап, аар-бергем Сенден дээрзин олар дыңнааш, өөрүп турлар. Ынчалза-даа айытканың хүннү „Кел!“ де — ынчан олар мен дег апаар!

²²Бачыттарым шуптузу дээш, кеземчең Меңээ онаарың дег, дайзыннарымны ынчаар кезет — хай-бачыды Сеңээ бүрүн көстү берзин! Чүге дээрге човуурум-даа үзүлбес-тир, чүрээм күжүр качыгдап тур!»