Read Ыдыктыг Библия, 2011 Плач Иеремии 2 Bible Online

Плач Иеремии 2 - Ыдыктыг Библия, 2011 bible

Плач Иеремии 2

¹Аа халак! Дээрги-Чаяакчы Сион-кысты килеңиниң булуду-биле бүргей каапты! Израильдиң өндүр каазын дээрден черже дүжүр октап, килеңиниң хүнү кээрге, дүжүлгезинден дүжүп кээп турган черин тоовайн, хая көрдү [2].

²Израильдиң хоорай-суур, турлагларын Дээрги-Чаяакчы кээргел чокка сыырыпты; Иудея шивээлерин килеңнээштиң, узуткады; күрүнени болгаш нояннарны ойтур октап, бужартатты.

³Килеңнээш, Ол Израильдиң мыйыстарын [3] кезип каапты, дайзын кээрге, Израильди камгалавайн, оң холун чайладыпты, бүгүдени хуюктап чиир чалбыыш-отту Израильге Ол кыпсывытты.

⁴Дайзын-даа дег, кадыг чазын холу-биле хере тыртты. Карак өөрткен бүгү чүүлдү, өжээтен дег, узуткады. Чалбыышталган килеңин Ол Сион-кыс өргээзинче чажа каапты.

⁵Дээрги-Чаяакчы дайзын дег болу бергеш, Израильди сыырыпты, ооң хамык шивээлерин ажырыптып, ордуларын хоозуратты. Иудея черинге Ол ыы-сыыны, хомудалды нептеретти.

⁶Садта үнген ыяш кескен кижи-даа дег, чыыш черин — өргээзин Ол узуткады. Сионга Ол байырлалдар, амыр-дыштың хүннерин-даа уттур кылдыр албадады; килеңнээштиң, хаанны-даа, Бурганның бараалгакчызын-даа тоовайн барды.

⁷Дээрги-Чаяакчы өргүл салыр черин тоовайн, ыдыктыг өргээзин хүлээведи. Ооң быжыг ханаларын дайзынның холдарынга киирип берди. Байырлалдың чыыжында дег, Дээргиниң өргээзинде алгы-кышкы дыңналып тур.

⁸Сионнуң ханазын бузар деп, Дээрги-Чаяакчы бодап алган. Хананы Ооң холу хемчээп, үрегделден ойталаарын сагынмайн тур. Камгалал чалдары-даа, ханалар-даа буступ дүшкен, качыгдап тур.

⁹Хаалгалар-даа кээп дүшкен, дээктерни Ол үреп-талаан. Хоорай хааны, нояннар-даа өске чоннар холунче кирген, ыдыктыг хоойлу база чок-тур! Медээчилеринге-даа Дээрги-Чаяакчыдан кээр ажыдыышкын үстүп-читкен.

¹⁰Баштарынче доозун-довурак чажып, качыгдал хевин кеткен Сионнуң баштыңнары ыыттаар сөс чок, черде орлар. Иерусалим кыстары-даа качыгдалдан бажын черже халайтылар.

¹¹Карактарым чажы соглуп, согурардым, ийлей бердим. Кара баарым ажып, аараан. Мээң күжүр чонум буурап калган. Хоорайның шөлдеринде эмер чаштар, уруг-дарыг аштап өлүп чыдарын көр:

¹²найысылал шөлдеринде балыг-бышкын улус дег, моорап турлар. Хөөкүйлер авазындан айтырып тур: «Аъш-чем биле суксун кайыл?» Иезиниң хойнунга-ла амы-тыны үстүп турлар.

¹³Иерусалим-кыс, сени кымга дөмейлээйн, сеңээ чүнү чугаалаайн? Күжүр Сион-кыс, аргалаар дээш, сени кымга деңней көрейн? Балыың ханы — далай ышкаш — сени кым-на экиртирил?!

¹⁴Медээчилериң сеңээ хей-ле меге, хоозун чүүлдер оштаан, салым-чолуң өскертир дээш, кем-бурууң ажытпааннар, меге-биле дуурайлап, сени будап каапканнар!

¹⁵Чорумалдар дора көрүп, адыш часкап, Иерусалим-кысты шоодуп, бажын чайып, сыгырдылар: «Бүгү черниң таалалы, дээди каас дээр хоорай бо бе?»

¹⁶Сенче хамык дайзыннарың өгү-дылын караңнатты. Азыг-дижин кыжырадып, сыгырдылар: «Ам-на ону сыырыптывыс! Күзеп-манаан хүнүвүске чедир чурттап, көрүп тур бис!»

¹⁷Дээрги-Чаяакчы бодалдарын боттандырып, эткен сөзүн ээледи. Үе-дүпте аазаан сөзүн күүсетти: хайыра чок сени базып, өжээтенге шоот кылып, дайзыннарың мыйыстарын [4] сүүрертипти.

¹⁸Дээргиге чүрек-хөңнүң ханызындан тейле-ле, о Сион-кыс! Дүн-хүн дивейн, дамырак дег, карааң чажы агып батсын, ботка дышты черле бербе, карактарың дыштандырба!

¹⁹Дүннү өттүр, өйлеп-өйлеп, алгыр-кышкыр! Дээрги-Чаяакчы мурнун орта, суг-даа ышкаш, хөңнүң төп бер, кудумчулар белдиринде аштап өлүр чеде берген чаштарыңның амызы дээш, Аңаа тейлеп, холдарың сун!

²⁰«Дээрги-Чаяакчы, топтап көр даан, өске кымны шак-ла мынчаар хинчектээн сен — эмзирип өстүрген уруг-дарыының эъдин ие чиптер кылдыр? Дээргиниң өргээзинге медээчизи-даа, бараалгакчызы-даа өлүр кылдыр?

²¹Кудумчулар довураанда уруг-дарыг, кырганнар-даа чыткылаар-дыр; чалыы кыстар, оолдарымның тынын хылыш үзүп каан-дыр; оларны Сен килеңнээштиң, кээргел чокка узуткадың.

²²Коргуп чоруур дайзыннарымны, найырже дег, Дээрги-Чаяакчы чыып тур. Ооң килең хүнү чедип кээрге, камгалал ап, дириг үнер кижи чок-тур! Эмзирип өстүрген, азырап каан улузумну дайзыным кээп, узуткады».