Read Ыдыктыг Библия, 2011 Плач Иеремии 3 Bible Online

Плач Иеремии 3 - Ыдыктыг Библия, 2011 bible

Плач Иеремии 3

¹Бурганның каржы килеңинден качыгдаан эр — мен-не-дир мен.

²Ол мени сүрүп алгаш, чырык эвес, дүмбейдиве эккеп кагды.

³Ындыг кончуг Ол меңээ удур болуп, холун менче соксаал чокка көдүрүп тур —

⁴эът-бодум чуурулдур соп, сөөк-даяам сый шапты;

⁵бүзээлелге мени тудуп, ажыг-шүжүг, хинчек-биле хүрээледи;

⁶үе-дүпте өлген улусту дег, караңгы оранга тургузупту.

⁷Үндүрбес дээш, Бурган мени хана-биле бүзээлепти, кинчи-бегим аартадыпты;

⁸дуза дилеп, кыйгы салдым — мөргүлүмнүң оруун досту;

⁹даштар-биле оруум боогдап, кокпа-оруум ээй тыртты.

¹⁰Ол — мени кедээн мажаалай-ла, чаштып чыдар арзылаң-на;

¹¹оруумдан астырып, үзерлеп кемдеткеш, буурап дүшкен кижи кылды.

¹²Кадыг чазын хере тырткаш, согунунга кара кылдыр тургузупту.

¹³Саадаанда согуннарын ужулгаштың, өкпе-баарым өттүр атты.

¹⁴Чонга кочу-шоот болдум: соксаал чокка одап-сөглеп, ырлап турлар.

¹⁵Ол меңээ оо-хоран пөктүр сыгап, ажыг суксун аксымдыва кудуп берди.

¹⁶Диштеримче сай-даш дыгып, хүлдү меңээ чиртип турду [5].

¹⁷Сеткилимден амыр-тайбың арлы берген, амыр-чыргал уттундурган.

¹⁸«Алдар-адым өлүп-чидип, Дээрги-Чаяакчыга идегелим бүтпээн-дир» — деп чугааладым.

¹⁹Улчуп-түрээн чуртталгамны бодап тур мен: оо-хоран, ажыг суксун!

²⁰Сактып чоруур сеткилим-даа ундаралче дүлдүнер-дир.

²¹Ынчалза-даа бодап кээрим, ынанырым чүүл бо-дур:

²²Дээрги-Чаяакчы, энерелиң кызыгаар чок, өршээлиң-даа үстүп төнмес [6] —

²³эртенниң-не чаартынып, илереп кээр, а шынчы чорууң өндүр улуг!

²⁴«Дээрги-Чаяакчы — салым-хуум — деп чугааладым. — Ынчангаш Аңаа ынаныр мен».

²⁵Аңаа ынанып, Ону дилээн улуска — Дээрги-Чаяакчыдан буян доктаар;

²⁶Ооң камгалалын шыдамык манап турар кижиге — буян доктаар;

²⁷Аар-бергелерни аныяандан ажып эртип турар кижиге — буян доктаар.

²⁸Ындыг улуг аар-бергелерни чүктээн кижи ыыт чок орзун, чааскаан орзун!

²⁹Довуракты пактап орзун, ынчалзажок идегел-даа бар бооп магат.

³⁰Дажыпканга чаагын дөгеп, базымчазын пөктүр көрзүн.

³¹Дээрги бисти кезээде эвес, хензиг када каапкаш баар;

³²хинчек-биле кезетсе-даа, энерели улуг болгаш, өршээй кааптар,

³³кижилерни хилинчектээр сеткили чок.

³⁴Черде хамык туттурган чонну таптай базып туруп бээрге,

³⁵Дээди Өрүкү Бурган мурнун орта чөптүг шииткел үндүрбеске,

³⁶чаргы кылгаш, мегелээрге, Дээрги ону көрбес бе кай?!

³⁷Дээрги аңаа дужааваанда, сорулгазын чедип алыр кижи турбас.

³⁸Эки-даа чүүл, бак-даа чүүл Дээди Өрүкүнүң аксы-сөзүн ёзугаар болбас бе?

³⁹Дириг чурттап арткан кижи бачыды дээш кеземчезинге хомудаан херээ чүл?

⁴⁰Оруувусту шинчий көрүп, истеп-хынааш, Дээргиже дедир ээр бис.

⁴¹Дээрде саадаан Бургандыва чүрээвисти угландырып, холувусту өрү сунаал:

⁴²«Бачыттыг бис, удур-дур бис, Сен-даа бисти өршээведиң.

⁴³Килеңнээштиң, истеп-сүрдүң, хайыра чок кырып келдиң,

⁴⁴мөргүлүвүс четпезин дээш, булут-биле шугланыптың.

⁴⁵Өске чоннар аразынга бисти бок-чам кылып кагдың.

⁴⁶Дайзыннарывыс бисче шупту өгү-дылын караңнатты.

⁴⁷Какпага кирер, коргуп-сүртээр, хоозураар, өлүп-чидер — үүлевис ол».

⁴⁸Чонум өлүп-калганы дээш, караам чажы суг дег акты.

⁴⁹[49-50] Дээрги-Чаяакчы черже кайгап, дээрден бисче көрбээн шаанда, оожургал чок, амыр-дыш чок, караамның суу боглур уг чок.

⁵⁰

⁵¹Хоорайым кыстарының салым-чолун көрүп келгеш, сеткил-хөңнүм качыгдап тур.

⁵²Дайзыннарым, кушту-даа дег, хей-ле черге мени аңнап турарлар-дыр.

⁵³Олар мени оңгардыва киир октап, даш-биле базырдылар.

⁵⁴Бажым ашкан сугже дүлнүп, «Өлдүм-не!» деп чугаалаан мен.

⁵⁵Тамы дүүнден, Дээрги-Чаяакчы, Сээң адың кый деп турдум.

⁵⁶Мээң үнүм дыңнап кагдың: дуза дилээн човуурумдан кулааң дестирбе!

⁵⁷Кый дээримге, чедип келдиң. «Кортпайн көр» деп чугааладың.

⁵⁸Чаргымга Сен болчуп келдиң, амы-тыным камгаладың;

⁵⁹хомудалым көрүп кагдың, Дээрги-Чаяакчы, херээм үзе шиидип бердиң,

⁶⁰дайзыннарым өштүг багын, өзү кара бодалдарын көрүп кагдың.

⁶¹Дыңнап кагдың, Дээрги-Чаяакчы: мени дора көргенин, өзү кара бодалдарның дөгерезин,

⁶²меңээ удур улустуң чугаа-соодун, үргүлчү-ле кара сагыш бодап кээрин;

⁶³ам кээп көр даан: органда-даа, турганда-даа одап ырлаар кижизи — мен!

⁶⁴Дээрги-Чаяакчы, оларны Сен, үүлгеткен херээн ёзугаар кезедип көр:

⁶⁵чүректерин чөрүү кылып, каргыжыңны оларже сал;

⁶⁶килең чажып, истеп-сүрүп, дээрлериң адаан орта узуткап каг!