Read Ыдыктыг Библия, 2011 Плач Иеремии 4 Bible Online

Плач Иеремии 4 - Ыдыктыг Библия, 2011 bible

Плач Иеремии 4

¹Аа халак! Алдын өңү чайнавастаан, тулган алдын хугбайзырап, өскерилген! Кудумчу санай, белдир санай ыдык даштар [7] төктү берген.

²Сионнуң чок дээн, алдын караан чая базар оолдарын кижи кылган, дойдан туткан савалар дег үнелеп тур.

³Бөрзектерин чемгерер дээш, шөө-бөрү-даа эмиин дөгээр, а мээң чонум хайыра чогу — ээн ховуда страус куш-ла [8].

⁴Хензиг чаштың өгү, дылы кагып-суксааш, чыпшынышкан. Аъш-чем дилээн уругларга кым-даа, чүү-даа бербейн тур!

⁵Пөктүр дойлап чораан улус кудумчулар кыдыын дургаар кырлып чыдар. Каас хеп кедип өскен улус даштын бокта чимзенип тур.

⁶Содомнуң-даа кеземчезин мээң чонум кеземчези ажып турар: шак ол хоорай, кижи холу көңгүс дегбейн, карак чивеш дээр аразында буступ дүшкен.

⁷Чонум баштаан нояннар-даа хардан арыг, сүттен аккыр, мага-боду кораллдан каас, шырайы-даа сапфир ышкаш чордулар чоп.

⁸А ам олар — арны-бажы хөө-кара, кудумчуга таныттынмас, мөчү-сөөкте херген кежи ыяш ышкаш кургап калган.

⁹Хову-шөлдер куруглаарга, тыны үстүп, диригге-ле кадып калган, аштап өлген кижилерден хылыш-биле шаштырганнар кежиктиг-дир.

¹⁰Чонум ынчаар кырлып турда, буян-чолдуг иелер-даа ажы-төлүн пашка дүлүп, боттарынга аъш-чем кылып турганнар ийик.

¹¹Дээрги-Чаяакчының килең-кылыы дендеп барды, килеңин Ол чажа каапты: Сионга Ол одун кыпсып, хоорайны өзээнге киир өрттедипти.

¹²Иерусалим хаалгазындан өштүг дайзын кирип кээр деп, черде хааннар, делегейде чурттаан улус бодап безин чорааннар бе?!

¹³А ол бүгүнүң дөзү кайдал? Хоорайга актыг улус ханын төккен бараалгакчылар бузудунда, медээчилер бачыдында.

¹⁴Олар даштын, согурлар дег, тояап чорлар, ханга былчап, бужартадып алган боорга, хептеринге дээп болбас апарган-дыр.

¹⁵«Орук чайлаңар, бужартааннар! Биске дегбейн, чоруңар!» — деп, оларже улус алгырып тур. «Тояап чоруур хейлерни! — деп, өске чоннар улузу сөглеп тур. — Моон соңгаар аравыска олар турбас».

¹⁶Дээрги-Чаяакчы Боду-ла оларны тарай сывырыпкан, моон соңгаар оларже Ол ээ көрбес. Ынчангаш Ооң бараалгакчыларын-даа хүндүткээр, баштыңнарны-даа өршээр улус ам чок.

¹⁷Дуза манаан караавыс-даа имистелип өштү. Камгалаар дээш, келбээн чонче [9] доскуул кылыр суургалардан харап көрүп, шаанга киир манадывыс.

¹⁸Кудумчуже үнмезин дээш, дайзыннар каяа-даа бол бисти кедээн. Төнчүвүс ам чоокшулаан, назынывыс кызырылган, өлүр хүн-даа чедип келген.

¹⁹Бисти кызап, сүрген улус дээрде ушкан эзирлерден дүрген болган. Олар бисти дагларга-даа чыпшыр чедип, ээн ховаа кедег кылып, дозуп турган.

²⁰«Хаанывыска карактадып, өске чоннар аразынга чурттаар бис» — деп идегеп чораанывыс амывыстың тыныжы — Дээрги-Чаяакчының шилээн хааны какпага кирип, туттурган-дыр.

²¹Уц дээр черде чурттай берген Эдом-кыс, амдыызында өөрүп-хөгле. Килең долган үлүг-дашка сеңээ чедер — шалдаңналдыр ужур ижип, эзириир сен.

²²Сион-кыс, кеземчеңниң төнчүзү кээр — сени Ол ам удавайн хостап салыр! А сени, Эдом-кыс, кем-бурууң дээш кезеткештиң, бачыттарың ажыдыптар.