Read Ыдыктыг Библия, 2011 Осия 1 Bible Online

Осия 1 - Ыдыктыг Библия, 2011 bible

Осия 1

¹Озия, Иоафам, Ахаз болгаш Эзекия оларның Иудеяны чагырып турганы база Иоастың оглу Иеровоамның Израильди чагырып турганы чылдарда Дээрги-Чаяакчының Беериниң оглу Осияга ажыдып чугаалаан сөзү бо-дур.

²Дээрги-Чаяакчы Осия-биле мынчаар чугаалажып эгелээн. Ол аңаа: «Барып, самыын-садар кадайдан ап ал, ооң самыын харылзаазындан тывылган ажы-төлдүг бол, ол чорук бо черниң улузу Дээрги-Чаяакчыдан ойталап, аажок самыырап турарынче айтыр» — дээн.

³Ынчангаш Осия Дивлаимниң уруу Гомерни кадай кылдыр ап алган. Демгизи саатталгаш, аңаа оол уруг божуп берген чүве-дир.

⁴Дээрги-Чаяакчы Осияга: «Бо чаш төлдү Изреел деп адап аар сен, ол ат удавайн Иеху хаанның салгалын Изреел хоорайга төгүлген хан дээш кезедиримче, Израильдиң салгалының күрүнези турарын соксадырымче айтыр.

⁵Шииткелим хүнү кээрге, Мен Изреел шынаазынга Израильдиң чазын сыйып каар мен» — дээн.

⁶Гомер база катап саатталгаш, кыс уруг божуп алган. Дээрги-Чаяакчы Осияга: «Бо чаш төлдү Ло-рухама [1] деп адап аар сен, ол ат израиль чонну моон соңгаар өршээвезимче, аңаа ээ-хайыра көргүспезимче айтыр.

⁷А Иудеяның чонунга ээ-хайыра көргүзерин уламчылап, оларны чаа-дайын: ча-согун, хылыш болгаш дайынчы аъттарлыг шериглер-биле эвес, а ооң Дээрги-Чаяакчы Бурганының ачызы-биле камгалаар мен» — дээн.

⁸Ло-рухаманы эмзирип доруктурган соонда, Гомер база катап саатталгаш, оол уруг божуп алган.

⁹Дээрги-Чаяакчы ынчан: «Бо чаш төлдү Ло-амми [2] деп адап аар сен, ол ат силер — Мээң чонум болбазыңарже, Мээң силер-биле харылзаа тутпазымче айтыр» — дээн.

¹⁰«Ынчалза-даа алызында израиль чоннуң саны далайның санап четпес элезини ышкаш көвүдей бээр. Израильчилерге улустуң: „Ооң чону эвес силер“ — деп турган черинге: „Дириг Бурганның ажы-төлү силер“ — деп, оларга улус чугаалай бээр.

¹¹Иудеяның, Израильдиң чону ынчан каттыжып чыылгаш, боттарын чагырар чаңгыс баштыңчы олуртуп алгаш, боттарының черинге үнүш дег өзүп үнүп кээр [3]. Изреелдиң [4] хүнү өндүр улуг болур!