Read Ыдыктыг Библия, 2011 Осия 13 Bible Online

Осия 13 - Ыдыктыг Библия, 2011 bible

Осия 13

¹«Эфрем чүве чугаалаарга, улус сүрээдеп, сирилээр турган; ол Израильге бедик турушту ээлеп алган, ынчалза-даа Ваал бурган дээш буруудап, өлүп калган.

²Ам израильчилерниң бачыт үүлгедири дам барган-дыр: ус-шевер улус оларга дүрзү-бурганнарны мөңгүнден шуткуп, чогаадып кылып берип турар-дыр; израильчилер оон дүрзү-бурганнар-биле чугаалажып, оларга өргүлдер салып турар-дыр; кижилер шуткумал бугажыктарны ошкап турар-дыр!

³Ол чоруу дээш, израильчилер эртенги туман ышкаш дүрген эстип чиде бээр, олар эрип каар шалың дег, шаңдан хадаан тараа саваңы дег, хоолайдан үнген ыш дег апаар.

⁴А Мен — египет черге турган үеңден бээр, сээң Дээрги-Чаяакчы Бурганың болгай мен, сен Менден өске Бурган билбес сен, Менден өске Камгалакчы-даа чок.

⁵Ээн кургаг ховуга, кадып калган черге сенче сагыш салып турган мен.

⁶Одар-белчиирлиг апаргаш, израильчилер тодуг-догаа болу берди, а тода бергеш, туразы улгадып, Мени уттупту.

⁷Мен оларга арзылаң дег болур мен, пар дег, орук чанынга кедээр мен.

⁸Оларже оолдарын оскунган кыс адыг дег халдааш, хөрек-чүрээн үзерлээр мен; арзылаң ышкаш чиир мен; черлик аң-араатан оларны үзерлеп кааптар.

⁹Израиль, сээң узуткаттырар үең келди, чүгле Мен сеңээ дузалап боор мен.

¹⁰Сээң хааның ам кайдал? Ол сени бүгү хоорайларыңга камгалап алзын че! Баштыңнарың кайдал? Сен: „Биске хаандан, нояннардан берем!“ — деп дилеп турдуң чоп.

¹¹Мен килеңней бергеш, сеңээ хаан бердим, хорадай бергеш, ону хунаап алдым.

¹²Эфремниң кем-буруузун доңнай баглап каан, ооң бачыдын шыгжап каан — Мен ону утпас мен.

¹³Эфрем угаан чок оол-дур, херээжен кижи ону божуп чыдырда дег, ол хилинчектенип турар, ынчалза-даа хырындан үнер хөңнү чок-тур.

¹⁴Мен израильчилерни өлүглер оранының эрге-чагыргазындан адырар мен бе? Чок, оларга кээргел көргүспес мен! Өлүм, сээң хамчык аарыың кайыл? Алдыы оран, сээң халдавырлыг аарыың кайыл? [39]

¹⁵Эфрем акы-дуңмазынга бодаарга, өзүген-даа болза, өрттендир чиир хат чедип кээр — ээн кургаг ховудан Дээрги-Чаяакчының хады көдүрлүр, ынчан ол хат Эфремниң суунуң бажын соолдуруп каар, булаан кадырып каар; ол хат Израильдиң эртине-байлаан үптээр, ооң бүгү үнелиг чүүлдериниң шыгжамырын куругладыр.