Read Ыдыктыг Библия, 2011 Осия 2 Bible Online

Осия 2 - Ыдыктыг Библия, 2011 bible

Осия 2

¹Акы-дуңмаңарны: „Бурганның чону“ — деп, угба-дуңмаңарны: „Ээ-хайыра алган“ — деп адап аар силер».

²«Аваңар-биле чаргылдажыңар-ла, чаргылдажыңар, чүге дээрге ол — Мээң кадайым эвес-тир, а Мен — ооң ашаа эвес-тир мен; аваңар бодунуң самыын чоруун — арнындан, өскерликчи чоруун — эмиглеринден ап каапсын.

³Оон башка Мен ооң хевин уштуп, шалдаңнааш, чаа төрүттүнгенинде дег көзүлдүр тургузуп каар мен: ону ээн кургаг хову ышкаш кылып, када берген чер кылдыр хуулдурар мен, кагыдып-суксадып өлүрүп каар мен.

⁴Ооң ажы-төлүнге-даа ээ-хайыра көргүспес мен, чүге дээрге олар самыын харылзаадан тывылган төлдер-дир;

⁵оларның авазы самыын-садып турган, төрээн иези бодунуң адын баксырадып: „Хандыкшааннарымга барайн, олар мени аъш-чем, суг, дүк, лён, олива үзү болгаш суксуннар-биле хандырып турар болгай“ — деп турган.

⁶Ол бүгү дээш, Мен ооң оруун теннер-биле моондактаар мен, херим-биле долгандыр кажаалаар мен, ол ынчан оруундан аза бээр.

⁷Ол херээжен бодунуң хандыкшааннарын сүрүп чоруткаш, четпейн баар, оларны дилээш, тыппайн баар; оон ол: „Барып, баштайгы өөм ээзинче эгли берейн, чүге дээрге ынчан меңээ амгызындан эки турган-дыр“ — дээр.

⁸Ол херээжен далган-тараа, арага болгаш олива үзүн Мээң аңаа берип турганымны, Ваал бурганның дүрзүзүн шуткаан алдын, мөңгүннү Мээң аңаа көвүдедип бергенимни билбес-тир.

⁹Ол дээш, Мен Бодумнуң далган-тараамны — ажаалда үези кээрге, арагамны — виноград быжар үе кээрге, дедир ап аар мен, ооң шалдаңын чажырган Бодумнуң дүк, лёнумну хунаап аар мен.

¹⁰Мен ам ооң бужарын хандыкшааннарының мурнунга ажыдар мен, ынчан ону кым-даа Мээң холумдан камгалап шыдавас.

¹¹Ооң кандыг-даа хөглүг байырлалдарын: ай чаазы биле амыр-дыш хүннери демдеглээр байырлалдарын, бүгү-ле байырлалдыг чыыштарын соксадыр мен.

¹²Ооң: „Хандыкшааннарымның берген төлевири бо-дур“ — деп турганы виноград сыптарын, фига ыяштарын куругладыр мен; оларның үнген сесерлиин арга-эзим кылдыр хуулдуруптарымга, черлик аң-мең чимистерни чип кааптар.

¹³Ваал бурганның дүрзүлеринге бараан болуп, айдызап турганы дээш, ону кезедир мен; ол херээжен сыргалар болгаш каасталгалар-биле каастангаш, хандыкшааннарын сүрүп, Мени уттупкан турган болгай» — деп, Дээрги-Чаяакчы медеглээн.

¹⁴«Ынчангаш Мен ону хандыкшыдып, ээн кургаг ховуга эккелгеш, эргеледип чугаалажыр мен.

¹⁵Ооң соонда Мен аңаа чимистиг шөлдерни бээр мен, а Хай-халап шынаазын [5] идегелдиң кирер эжии кылдыр бээр мен; ол аңаа бодунуң аныяк үезинде дег, египет черден үнүп турган хүнүнде дег, Меңээ харыылаар [6].

¹⁶Ол хүн кээрге, сен Мени „Ашаам!“ деп адаар сен — деп, Дээрги-Чаяакчы медеглээн, — оон ыңай „Ваалым! [7]“ деп адавас сен.

¹⁷Ол дүрзү-бурганнарның аттарын сээң аксыңдан чайладып кааптар мен, оларның аттарын улус оон ыңай сагынмастай бээр.

¹⁸Ол хүн кээрге, Мен израиль чон-биле черлик аң-меңниң, дээрниң куштарының, черде соястаан амытаннарның аразынга эп-найырал керээзин чарар мен; ча-согунну сыйып, сээң чериңге чаа-дайынны узуткап кааш, айыыл чок чуртталганы сеңээ бээр мен.

¹⁹Сени Бодум-биле кезээ мөңгеде дүгдеп аар мен, чөптүг-шынныг чорук болгаш шын шииткелди, энерел болгаш ээ-хайыраны илереткеш, сени Бодум-биле дүгдеп аар мен.

²⁰Бердингенимни көргүзүп, сени Бодум-биле дүгдеп аар мен, Дээрги-Чаяакчыны билген турар сен.

²¹Ол хүн кээрге, Мен сеңээ харыы бээр мен — деп, Дээрги-Чаяакчы медеглээн. — Мен дээрге дужаарымга, ол черже чаъс чагдырар,

²²чер далган-тараа, виноград, оливаны өстүрер, а ол аъш-чем Изреелди [8] чемгерер.

²³Мен черге Бодумнуң чонумну үнүш дег тарып аар мен, „Ээ-хайыра албаан“ деп аттыг чонга ээ-хайыра көргүзер мен; „Мээңии эвес“ деп аттыг чонга: „Сен — Мээң чонум сен“ — дээр мен, а ол: „Сен — мээң Бурганым сен“ — деп харыылаар».