Read Ыдыктыг Библия, 2011 Осия 4 Bible Online

Осия 4 - Ыдыктыг Библия, 2011 bible

Осия 4

¹Израиль чон, Дээрги-Чаяакчының сөстерин дыңна! Дээрги-Чаяакчы бо черниң чурттакчылары-биле чаргылдажып турар-дыр, бо черде чөптүг-шынныг чорук, энерел, Бурганны билип аарынче чүткүл чок-тур.

²Каргыш салыры болгаш мегелээр чорук, кижи өлүрер, оорланыр болгаш самыыраар чорук хөлчок нептерээн-дир, хан төгүүшкүнү даады-ла болуп турар-дыр.

³Ол бүгү дээш, бо чер ыглап-сыктаар, ооң чурттакчылары черлик аң-мең болгаш дээрниң куштары-биле кады кырлып каар, далайның балыктары безин өлүп каар.

⁴«Кым-даа өске кижи-биле маргышпазын, кым-даа өске кижини сойгалавазын. Бурганның бараалгакчызы, Мен сээң-биле чаргылдажыр мен! [12]

⁵Хүндүс-даа буураар сен, Бурганның медээчизи дүне-даа сээң-биле кады буураар. Сээң иеңни [13] база узуткап каар мен.

⁶Мээң чонум билииниң четпезинден кырдырып аар; билигни хүлээп көрбээн бооруңга, Мен база сени Меңээ бараалгаар кылдыр хүлээп көрбес мен, Бурганыңның хоойлузун уттупкан бооруңга, Мен база сээң ажы-төлүңнү уттуптар мен.

⁷Бараалгакчылар өзүп-көвүдээн тудум-на, Меңээ удур бачыт үүлгедири дам баар-дыр; оларның ат-алдарын бак атче хуулдурар мен.

⁸Олар Мээң чонумнуң бачыт дээш өргүлдеринден аштанып-чемненир-дир, ынчангаш оларның сеткил-сагыжынга чоннуң бачыттыг болуру тааржыр-дыр.

⁹Чон-биле болур чүве бараалгакчыларны оюп эртпес, оруктары дээш, Мен оларны кезедир мен, үүлгедиглерин ёзугаар оларга кеземче онаар мен.

¹⁰Олар чигеш, тотпас, самыырааш, өзүп-көвүдевес, чүге дээрге Дээрги-Чаяакчыга бараан болуушкунун сагывас апаргаш,

¹¹самыыраан-дыр. Мээң чонум арагага, эзиртир суксуннарга алзып алган-дыр.

¹²Ол кылып алган ыяш дүрзүзүнден айтыртынып турар-дыр, даянгыыжы аңаа харыы бээр-дир. Самыыраашкынның сүлдези оларны астырып каапкан боорга, олар Бурганындан ойталаан-дыр.

¹³Олар даглар баштарынга өргүлдерин эккеп салып, тейлер кырынга бүгү улуг хөлегелиг ыяштар адаанга айдызаашкын кылып турар. Ынчангаш силерниң кыстарыңар самыырап, кенээттериңер ашактарынга өскерлип турар.

¹⁴Ол кыстарыңарны, кенээттериңерни кезетпес мен, чүге дээрге эр улузуңар боттары самыын-садар херээженнер-биле хойгажыр-дыр, дүрзү-бурганнар өргээлеринге самыын-саткан улус-биле кады өргүлдер салыр-дыр силер, а чүве билбес чон узуткаттырып турар-дыр.

¹⁵Израильчилер, силер бодуңар самыырап-даа турар болзуңарза, оода-ла Иудеяны бачытче киирбеңер; Галгал хоорайже барбаңар, Бет-Авенче [14] көдүрүлбеңер, дириг Дээрги-Чаяакчының ады-биле даңгыраглаваңар.

¹⁶Израиль чөрүү бызаа дег дедир апарган-дыр, таанда-ла Дээрги-Чаяакчы ам ол чонну, хураганнарын дег, чаагай одарга оъткарар бе?

¹⁷Эфрем дүрзү-бурганнарга хандыкшаан-дыр, сен ам ооң-биле үрелдешпе.

¹⁸Оларның арагалаары кедерээн-дир, самыыраашкыны хемчээл чок-тур, ол чоннуң чагырыкчылары ыянчыг чүүлге ынак-тыр.

¹⁹Эфремни шуурган чалгыннарынга ужудуп аппаар, израильчилер өргүлдериниң хайындан адын баксырадып аар».