Read Ыдыктыг Библия, 2011 Осия 5 Bible Online

Осия 5 - Ыдыктыг Библия, 2011 bible

Осия 5

¹«Бурганның бараалгакчылары, ол бүгүнү дыңнаңар, израиль чон, ол бүгүнү кичээнгейге ап көр, хаанның өг-бүлези, кулааңар ээктириңер; силерни ам шиидер-ле болгай. Мицпа хоорайга — какпа, Фавор дагга — чада салган четки бооп турдуңар.

²Силер Ситтимге ханы оңгар казып алдыңар [15], а Мен силерни кезедир мен.

³Эфремни билир мен, Израиль Меңээ ажык-көскү; Эфрем, самыырап тур сен, Израиль, бужартап тур сен.

⁴Үүлгедиглери израильчилерни Бурганынче ээлдирбейн турар, самыыраашкынның сүлдези оларның аразында турар-дыр, Дээрги-Чаяакчыны билбестер-дир.

⁵Израильдиң адыыргак чоруу бодунга удур херечилээр [16], Эфрем бодунуң бузут-багы дээш кээп дүжер, Иудея база олар-биле кады кээп дүжер.

⁶Израильчилер шээр-даа, бода-даа малын өргүлге салып, Дээрги-Чаяакчыны дилеп чорупкаш, тыппайн баар, Дээрги-Чаяакчы олардан ырай берген болур.

⁷Олар Дээрги-Чаяакчыга өскерлип, сурас ажы-төл төрүп алган-дыр. Оларны бир ай дургузунда [17] ээлээн чери-биле кады чиптер».

⁸«Гива хоорайга мыйыс этсиңер, Рама хоорайга труба этсиңер, Бет-Авенге дүвүрээзин чарлаңар: Вениамин, дайзын сээң артыңда тур!

⁹Кеземче хүнү кээрге, Эфрем хоозурап каар. Ол бүгү болуру чайлаш чок дээрзин Израильдиң аймактарынга медээлеп тур мен.

¹⁰Иудеяның баштыңнары ээлел чериниң кызыгаарын алгыдып, дүрүм үрээн улус-тур; Мен оларже килеңимни суг дег төгер мен.

¹¹Эфрем дарладып, шииткелге бастырган-дыр, чүге дээрге хоозун дүрзү-бурганнарны эдерген-дир [18].

¹²Эфремни үзүт-ховаган дег чиир мен, Иудеяны курт дег чиир мен.

¹³Эфрем — бодунуң аарыын, Иудея — бодунуң балыын көрүп каан, Эфрем Ассириядан дуза дилеп, өндүр улуг хаанче [19]элчиннерин ыткан. Ынчалза-даа ол силерни экиртип шыдавас, балыыңарны эмнеп шыдавас.

¹⁴Чүге дээрге Эфремге арзылаң дег мен, Иудеяга араатан аң дег мен. Ийе, Мен оларны үзерлеп каапкаш, алгаш чоруй баар мен — кым-даа оларны камгалап шыдавас.

¹⁵Олар буруузун билинмээн шаанда, Мени дилеп эгелевээн шаанда, Мен турар черимче дедир чоруй барайн.