Read Ыдыктыг Библия, 2011 Осия 6 Bible Online

Осия 6 - Ыдыктыг Библия, 2011 bible

Осия 6

¹Олар хилинчекке бүргеткеш, Менче чүткүп эгелээр». Барып, Дээрги-Чаяакчыже эглиили! Ол бисти аартып каан — Ол бисти экиртип каар; бисти балыглап каан — балыгларывысты шарып бээр;

²ийи хонук эртерге, Ол бисти диргизер, үшкү хүнде Ол бисти бут кырынга тургузуп каар, ынчан Аңаа шынчы амыдырап, Ону билип алыр бис.

³Ынчангаш Дээрги-Чаяакчыны билип алырынче чүткүп көрээли. Ол биске даң хаяазы дег ыяап-ла көстүп кээр, Ол бисче чаъс ышкаш — черни суггарган часкы чаъс ышкаш чедип кээр.

⁴«Эфрем, сени канчаайн? Сени канчаайн, Иудея? Силерниң энерелиңер эртенги туман дег, эрип каар шалың дег.

⁵Ынчангаш өлүм биле узуткаашкынны медээлээр дээш, силерже медээчилеримни чорудуп турдум; Мээң шииткелим чырык дег чайынналдыр чырып кээр.

⁶Өргүлдү эвес, энерелдиг бооруңарны күзеп тур мен, улустуң Бурганны билип алырын оларның бүрүн өрттеткен өргүлдеринден артык күзеп тур мен.

⁷А олар, өске улус ышкаш [20], чагыг-керээни үреп, Меңээ өскерилди.

⁸Галаад — бузут үүлгедикчилериниң ханга борашкан хоорайы.

⁹Дээрбечилерниң кижини кедеп турары дег, бараалгакчыларның бөлүглели Сихем чедер орукка кижилер өлүрүп, бузут үүлгедип турар.

¹⁰Израиль чонда чүдек-бужар чүвени көрүп тур мен. Эфрем самыырап турар-дыр, Израиль бужартап турар-дыр.

¹¹Иудея, сеңээ база дүжүт ажаар үени доктаадып каар! Мен Бодумнуң чонумга эки чолду эгидер деп баарымга [21],