Read Ыдыктыг Библия, 2011 Иоиль 1 Bible Online

Иоиль 1 - Ыдыктыг Библия, 2011 bible

Иоиль 1

¹Дээрги-Чаяакчының Патуилдиң оглу Иоилге ажыткан сөзү бо-дур.

²Ирейлер, дыңнаңар, чер-чурттуң бүгү чурттакчылары, кичээнгей салыңар! Силерниң чурттап турар үеңерде азы ада-өгбеңерниң чурттап турган үезинде ол ышкаш чүве болган бе?

³Ол дугайында ажы-төлүңерге чугаалап бериңер, а олар боттарының ажы-төлүнге дамчытсын, а оларның ажы-төлү дараазынга салгалга чугаалап берзин.

⁴Шартылаа чиген соонда арткан чүвени чаш шартылаа чип турган, чаш шартылааның соонда арткан чүвени шерги чип турган, а шергиниң соонда арткан чүвени чаш шерги төндүр чип каапкан.

⁵Арагачылар, оттуп келгеш, ишкирнигип ыглаңар. Виноград арагазы ижип турар бүгү улус, ооң чулуунуң ажыын ажып, ыглаңар, чүге дээрге ону силерниң аксыңардан хунаап алган-дыр.

⁶Мээң черимче күштүг, санап четпес хөй чон келген-дир. Ооң диштери — арзылаң диштери, азыглары — кыс арзылаңныы-ла.

⁷Ол чон виноградым сыптарын хоозурадып каапкан, фига ыяштарымны сыйып каапкан — ооң чөвүрээзин карттап кааптарга, будуктары агарып калган.

⁸Качыгдал хевин кеткен, ынак эжиниң ажыын ажып турар кыс ышкаш ыглап-сыктаңар.

⁹Дээрги-Чаяакчының өргээзинде далган-тараа болгаш арага өргүлү ам чок-тур. Дээрги-Чаяакчының бараан болукчулары, Бурганның бараалгакчылары качыгдап ыглажып тур.

¹⁰Шөлдер хоозураан, чер ыглап чыдар, чүге дээрге тараа узуткаттынган, виноград чулуу хайлып калган, олива ыяш кургап калган.

¹¹Тараачыннар, муңгараңар, виноград ажаакчылары, ишкирнигип ыглаңар. Шөлдерде арбай, кызыл-тас чок болган-дыр,

¹²виноград сыптары кургап, фига ыяштары кадып калган-дыр. Гранат, пальма ыяштары болгаш яблонялар шупту шөлде кургап калган-дыр, ынчангаш кижи амытанның хөглээшкини соксаан-дыр.

¹³Бурганның бараалгакчылары, качыгдал хевин кедип алыңар, ыглап-сыктаңар. Өргүл бедигээжиниң мурнунда бараан болуп турар улус, ишкирнигип ыглаңар. Мээң Бурганымның бараан болукчулары, чедип келгеш, качыгдал хевин кеткеш, өргээге дүннү эрттириңер, чүге дээрге Бурганыңарның өргээзинде далган-тараа болгаш арага өргүлдери ам чок-тур.

¹⁴Ыдыктыг шээрлээшкинден доктаадыңар, онзагай чыыштан чарлаңар, чоннуң баштыңнарын болгаш чурттуң бүгү чурттакчыларын боттарыңарның Бурганыңар Дээрги-Чаяакчының өргээзинге чыылдырыңар, дуза дилеп, Ону кыйгырыңар.

¹⁵Аа халак! Дээрги-Чаяакчының шииткел хүнү чоокшулаан-дыр. Ол хүннүң чедип кээри күчүлүг Бургандан келген хоозураашкын дег боор.

¹⁶Бис көрүп турувуста-ла, аъш-чемивис чок апарып, Бурганывыстың өргээзинден өөрүшкү биле хөглээшкин чиде берген эвес-тир бе?

¹⁷Тараа үрезини чер иштинге бырыжып калган, аңмаарлар үрелип, тараа урар черлер куруглаан, чүге дээрге тараа ам чок-тур.

¹⁸Мал-маганның човууртап турарын! Өөр малдар муңгаргай тояап чоруур, чүге дээрге оларның одар-белчиири чок. Кодан хойлар база хилинчек көрүп турар.

¹⁹Дээрги-Чаяакчы, мен дуза дилеп, Сени кыйгырып тур мен, чүге дээрге ховуда одар-белчиирни от чипти, шөлде бүгү ыяштарны чалбыыш өрттедипти.

²⁰Черлик дириг амытаннар безин Сеңээ чаннып тур, чүге дээрге дамырак суглар соглуп калган-дыр, ховуда одар-белчиирни от чипкен-дир.