Read Ыдыктыг Библия, 2011 Иоиль 3 Bible Online

Иоиль 3 - Ыдыктыг Библия, 2011 bible

Иоиль 3

¹«Ол хүннерде, ол үеде, кажан Мен Иудеяга база Иерусалимге эки чолду эгидипкенимде [5],

²Мен бүгү чоннарны чыггаш, Иосафат шынаазынга [6] эккелгеш, оларны аңаа Мээң чонум дээш, Мээң өнчүм болур Израиль дээш шиидер мен. Чүге дээрге олар Мээң чонумну өске чоннар аразынга тарадып каапкан-дыр, Мээң черимни үлежип алган-дыр.

³Олар Мээң чонумну үлежип, төлге даштары октаан; самыын-садар херээженнерге төлевир бээри-биле база арагалаары-биле чонумнуң бичии оолдар, кыстарын кул кылдыр садып турган.

⁴Тир, Сидон хоорайларның база бүгү филистим девискээрлерниң чурттакчылары, силер Меңээ чүү апарган силер? [7] Менден өжээн негээр деп тур силер бе? Ынчаар-даа болзуңарза, Мен силерниң өжээн негээшкиниңерни удавас боттарыңарның бажыңарже амыр-белен халдадыр мен.

⁵Силер Мээң алдын-мөңгүнүмнү ап алган, улуг үнелиг эртинелеримни боттарыңарның бурганнарыңарның өргээлеринче ап алган-дыр силер.

⁶Иудея биле Иерусалимниң улузун оларның төрээн чуртундан ырадыры-биле гректерге садып турдуңар.

⁷Көрүңер, Мен иудейлерни силерниң садып чорудупкан черлериңерден көдүрүп эккээр мен, үүлгедииңерни боттарыңарның бажыңарже халдадыр мен.

⁸Силерниң оглу-кызыңарны Иудеяның чонунга садыптар мен, а иудейлер оларны ыракта Шеваның чурттакчыларынга садыптар».

⁹Ол чоннар аразынга мону чарлап чугаалаңар: дайынга белеткениңер! Эрес-дидим дайынчыларны көдүрүңер! Бүгү шериглер чоокшулап келзин, халдап кирзин.

¹⁰Андазыннарыңарны хылыштарже, хол кадыырларыңарны чыдаларже эде соп кылып алыңар. Кошкак кижи безин: «Күш-шыдалдыг мен!» — дизин.

¹¹Бүгү чоннар, чер болгандан далаш-биле келиңер, Шииткел шынаазынга чыглыңар. О, Дээрги-Чаяакчы, дайынчыларыңны ынаар эдертип аппар!

¹²«Бүгү чоннар оттуп келзин, Иосафат шынаазынче чедип келзин, чүге дээрге Мен аңаа долгандыр турар чоннарны шиидери-биле саадап олурар мен.

¹³Оларны, бышкан тараа дег, дүжүт ажаар херекселдер-биле кезип эгелеңер. Барып, оларны виноград дег сы базыңар, арага доскаарларның эриин ажып турзун — ол чоннарның бузут-багы кончуг улуг-дур.

¹⁴Шииткел шынаазында эңдерик хөй чон мөөңнежип тур, чүге дээрге Дээрги-Чаяакчының хөделип үнер хүнү Шииткел шынаазынче чоокшулап келген-дир!

¹⁵Хүн биле ай өжүп, сылдыстар чырытпастап турар-дыр.

¹⁶Дээрги-Чаяакчы Сиондан диңмирээр, Иерусалимден дыңзыдыр алгырар, чер биле дээр сириңейни бээр. Ынчалза-даа Дээрги-Чаяакчы Бодунуң чонунга хоргадаар чер болур, израиль чонга — шивээ болур.

¹⁷Ынчан Мени силерниң Бурганыңар Дээрги-Чаяакчы деп, Бодумнуң ыдыктыг даам Сионда чурттап турарымны билип аар силер. Иерусалим ыдыктыг хоорай болур, хары улус оон ыңай кажан-даа олче халдап келбес апаар.

¹⁸Ол хүн виноград чулуу даглардан сыстып үнер, тейлерден сүт агып бадар, Иудеяның бүгү хем уннары долу суглуг апаар. Дээрги-Чаяакчының өргээзинден суг бажы аттыгып үнгеш, Ситтим шынааны суггарар.

¹⁹Египет ээнзиреп каар. Эдом ээн кургаг хову апаар. Иудеяның чонун каржы-дошкуну-биле аажылап, ол черге буруу чок хан төп турганы дээш, ындыг болур.

²⁰Иудея мөңге чурттаар, Иерусалим салгалдан салгал дамчып амыдыраар.

²¹Мен оларның ам-даа чуп бербээним ханын чуп кааптар мен. Дээрги-Чаяакчы Сионга чурттаар!»