Read Ыдыктыг Библия, 2011 Амос 1 Bible Online

Амос 1 - Ыдыктыг Библия, 2011 bible

Амос 1

¹Текоя чурттуг кадарчыларның бирээзи Амостуң сөстери бо-дур. Израиль дугайында Бурганның чорутканы бо көстүүшкүннү Амос Иудеяның хааны Озияның чагырып турганы база Иехоаштың оглу, Израильдиң хааны Иеровоамның чагырып турганы үеде, чер шимчээшкини болурунуң ийи чыл мурнунда көрген.

²Амос: «Дээрги-Чаяакчы Сиондан диңмирээр, Иерусалимден дыңзыдыр алгырар; кадарчыларның оран-савазында улус качыгдап ыглажыр [1], Кармил дааның бажы кургай бээр» — деп чугаалаан.

³Дээрги-Чаяакчы мынча дээн: «Хөй санныг кемниг үүлгедиглери дээш, Дамаскының чурттакчыларын өршээвес мен, чүге дээрге олар Галаадты демир-биле чылча бастырып турган-дыр.

⁴Азаил хаанның ордузунче отту ыдар мен, ол от Венадад хаанның шивээлерин чиптер.

⁵Дамаскының хаалгазының дээктерин адыра шаап кааптар мен, Авен шынаада чурттаан улусту база Бет-Эденде дүжүлге ээлээн кижини узуткап каар мен; арамей чонну тудуп алгаш, Кирже шөлүптер». Дээрги-Чаяакчының чугаалаан чүвези ол-дур.

⁶Дээрги-Чаяакчы мынча дээн: «Хөй санныг кемниг үүлгедиглери дээш, Газа хоорайның чурттакчыларын өршээвес мен, чүге дээрге олар хары чонну, Эдомга хүлээдип бээр дээш, мөөңү-биле тудуп аппарган болгай.

⁷Газаның ханазынче отту ыдар мен, ол от ооң шивээлерин чиптер.

⁸Азот хоорайның чурттакчыларын, Аскалонда дүжүлге ээлээн кижини узуткап каар мен база Экронче холумну угландырар мен — ынчан артып калган филистим чон кырлып каар». Дээрги-Бурган-Чаяакчының чугаалаан чүвези ол-дур.

⁹Дээрги-Чаяакчы мынча дээн: «Хөй санныг кемниг үүлгедиглери дээш, Тир хоорайның чурттакчыларын өршээвес мен, чүге дээрге олар хары чонну мөөңү-биле тудуп аппаргаш, Эдомга хүлээдип берген-дир база ха-дуңмалышкы эвилелди уттупкан-дыр.

¹⁰Тирниң ханазынче отту ыдар мен — ол от ооң шивээлерин чиптер».

¹¹Дээрги-Чаяакчы мынча дээн: «Хөй санныг кемниг үүлгедиглери дээш, Эдомнуң чурттакчыларын өршээвес мен, чүге дээрге олар ха-дуңмазы болур израиль чонну хылыш туткаш, кээргел чок сывыртап, килеңинге алыскаш, доктаамал дошкуурап, үргүлчү хорадап турган-дыр.

¹²Теман черже отту ыдар мен, ол от Восора хоорайның шивээлерин чиптер».

¹³Дээрги-Чаяакчы мынча дээн: «Хөй санныг кемниг үүлгедиглери дээш, аммон чонну өршээвес мен, чүге дээрге ол, бодунуң девискээрин алгыдып аар дээш, галаад черге сааттыг херээженнерни одура шаап турган-дыр.

¹⁴Равва хоорайның ханазынга отту кыпсыр мен, ол от ооң шивээлерин чаа-дайын хүнүнде алгы-кышкы аразынга, хат-шуурганныг хүнде казыргыланып келгеш, чиптер.

¹⁵Оларның хаанын хамык нояннары-биле кады дайзын тудуп алгаш баар». Дээрги-Чаяакчының чугаалаан чүвези ол-дур.