Read Ыдыктыг Библия, 2011 Амос 2 Bible Online

Амос 2 - Ыдыктыг Библия, 2011 bible

Амос 2

¹Дээрги-Чаяакчы мынча дээн: «Хөй санныг кемниг үүлгедиглери дээш, Моавтың чурттакчыларын өршээвес мен, чүге дээрге олар Эдомнуң хаанының сөөгүн хүл кылдыр өрттедипкен-дир.

²Моавче отту ыдар мен, ол от Кериот хоорайның шивээлерин чиптер, моав чон ону чылча шапкан аг-шеригниң алгы-кышкызының аразынга, дайзыннар труба этсип турда, кырлып каар.

³Ол чоннуң баштыңчызын узуткап, ооң-биле кады шупту нояннарны өлүрүп каар мен». Дээрги-Чаяакчының чугаалаан чүвези ол-дур.

⁴Дээрги-Чаяакчы мынча дээн: «Хөй санныг кемниг үүлгедиглери дээш, Иудеяның чурттакчыларын өршээвес мен, чүге дээрге олар Дээрги-Чаяакчының хоойлузундан ойталап, Ооң дүрүмнеринге шынчы бооп артпаан-дыр; ада-өгбезиниң эдерип турганы меге бурганнар ол чонну оруундан өскээр дуурайлап каапкан-дыр.

⁵Иудеяже отту ыдар мен, ол от Иерусалимниң шивээлерин чиптер».

⁶Дээрги-Чаяакчы мынча дээн: «Хөй санныг кемниг үүлгедиглери дээш, Израильдиң чурттакчыларын өршээвес мен, чүге дээрге ол чонда чөптүг-шынныг кижини — акша-мөңгүнге, ядыы кижини — эжеш идик өртээнге-ле кул кылдыр садып турар-дыр.

⁷Олар ядыы улусту довуракче доңгайтыр базып, эрге-шөлээ чок улустуң оруун моондактаар-дыр, оглу-даа, ачазы-даа, чаңгыс-ла ол херээжен-биле будалып, Мээң ыдыктыг адымны бужартадыр-дыр.

⁸Олар долаа төлевири кылдыр алган хевин чаткаш [2], өргүл салыр бедигээштер чанынга чыдып аар-дыр, буруудаттырып турар улустан торгаал кылдыр алган арагазын бурганнарының өргээзинге [3] ижер-дир.

⁹А Мен силерниң мурнуңарга пөш ышкаш бедик-чаагай, дуб ышкаш быжыг амор чонну узуткап кагдым, ооң дазыл-дөзүн тура тыртып кагдым.

¹⁰Мен силерни, амор черни ээлеп алзын дээш, египет черден үндүре бергеш, дөртен чыл дургузунда ээн кургаг ховуга эдертип чоруп турдум.

¹¹[11-12] Силерниң оолдарыңар аразындан — Бодумнуң медээчилеримни, аныяк оолдарыңар аразындан — назорейлерни шилип ап турдум. Ындыг эвес ийик бе, израиль чон? А силер назорейлерге арага сыгап, медээчилерге: „Өттүр билип медеглевеңер!“ — деп дужаап турдуңар». Дээрги-Чаяакчының медеглээн чүвези ол-дур.

¹³«Көрдүңер бе, Мен силерни, долдур моожалар чүдүрген тергениң базары дег, чылча бастырар мен;

¹⁴чүгүрүк-даа кижи дезе бээр арга тыппас, быжыг-даа кижиниң туржуп шыдаар күжү чок апаар, күш-шыдалдыг-даа кижи амы-тынын камгалап шыдавас.

¹⁵Ча-согуннуг-даа кижи шыдашпас, чүгүрүк-даа кижи, аът мунган-даа кижи амы-тынын камгалап шыдавас.

¹⁶Эң-не эрес-дидим дайынчы безин Дээрги-Чаяакчының шииткел хүнүнде хол даяң дезип чоруй баар». Дээрги-Чаяакчының медеглээн чүвези ол-дур.