Read Ыдыктыг Библия, 2011 Амос 3 Bible Online

Амос 3 - Ыдыктыг Библия, 2011 bible

Амос 3

¹Израиль чон, Дээрги-Чаяакчының силерге удур — Бодунуң египет черден үндүре бергени бүгү аймак-чонга удур чугаалаан сөстерин дыңнаңар:

²«Черниң бүгү аймак-чоннарындан чүгле силерни хүлээп көрген мен, ынчангаш бүгү кем-бурууңар дээш, силерни кезедир мен».

³Ийи кижи, дугуржуп албайн чыткаш, кады чорук кылыр деп бе?

⁴Аргада арзылаңның мурнунда олча-тывыш чок болза, ол ырланыр деп бе? Арзылаңчыгаш олча тудуп албаан болза, чыдынындан ырланыр деп бе?

⁵Дузакта чемиш чок болза, куш ынаар кирер деп бе? Какпаже чүү-даа кирбээн болза, ол часты бээр деп бе?

⁶Хоорайга шериг труба этси бээрге, улус коргуп сирилевес деп бе? Айыыл-халап хоорайны хөме тавараан болза, ону Дээрги-Чаяакчы үндүрбээн деп бе?

⁷Дээрги-Чаяакчы чүү-даа чүвени Бодунуң чалчалары болур медээчилерге чажыт бодалдарын ажытпайн кылыр эвес.

⁸Арзылаң ырланган соонда, кижи коргуп сирилевес деп бе? Дээрги-Бурган-Чаяакчы чугаалаан соонда, кижи Ооң сөзүн медеглевес деп бе?

⁹«Азот хоорайның база египет черниң шивээлеринге: „Самарияны долгандыр турар дагларга чыылгаш, ол хоорайда кедерээн ужур-дүрүм чок чорукче, кызып-кыйыышкынче көрүңер“ — деп чарлаңар.

¹⁰Ол дээрге ак сеткилдии-биле чурттап билбес, боттарының шивээлеринде эртине-байлакты күчүлел болгаш үптээшкин-биле чыып ап турар улус-тур» — деп, Дээрги-Чаяакчы медеглээн.

¹¹Оон Дээрги-Бурган-Чаяакчы мынча дээн: «Дайзын бүгү чуртту бүзээлеп аар. Ол Самарияның күчү-күжүн узуткап каар, шивээлерин үптеп кааптар».

¹²Дээрги-Чаяакчы мынча дээн: «Самарияда орунунуң кыдыында база Дамаскыда орун-дөжээнде олурар израильчилер камгалал алыр бе? Кадарчы кижиниң арзылаң аксындан малының ийи чодазын азы кулааның чартыын ушта тыртып аары дег, чүгле ындыг камгалал ап шыдаарлар.

¹³Дыңнаан соонда, Иаковтуң салгалынга удур херечилеңер — деп, Аг-шериглиг Дээрги-Бурган-Чаяакчы медеглээн. —

¹⁴Кем-буруузу дээш, Израильди кезедип кээр хүнүмде Вефилде өргүл салыр бедигээштерни база үреп бузар мен: бедигээштиң мыйыстарын одура шаап каарга, олар черже кээп дүжер.

¹⁵Кышкы-даа, чайгы-даа бажыңнарны бузуп каар мен, чаан сөөгүнден кылган каасталгаларлыг бажыңнар база буступ чиде бээр — дыка хөй бажыңнар ынчалдыр буступ каар». Дээрги-Чаяакчының медеглээн чүвези ол-дур.