Read Ыдыктыг Библия, 2011 Амос 4 Bible Online

Амос 4 - Ыдыктыг Библия, 2011 bible

Амос 4

¹Самарияның даанда чурттап турар, Васанның семис-чаагай инектери ышкаш херээженнер — ядыы улусту кызып-кыйып, түреңги улусту дарлап, боттарының ашактарынга: «Эккеп кудуңар-ла, ижер бис!» — деп турар херээженнер — бо чугаа-сөстү дыңнаңар.

²Дээрги-Бурган-Чаяакчы Бодунуң ыдыктыы-биле даңгыраглап, мынча дээн: «Силерни — тыртпалар-биле, арткан өөрүңерни — сыырткыыштар-биле сөөртүп алгаш баар үе чедип кээр.

³Мурнуңарда ханаларның оюк черлерин дамчыштыр үнер апаар силер. Дайзын силерни үндүр сывыртааш, Хармонче [4] аппаар». Дээрги-Чаяакчының медеглээн чүвези ол-дур.

⁴«Вефил хоорайга баргаш, бачыттан үүлгедиңер-ле, Галгал хоорайга баргаш, кем-бурууңар көвүдедиңер-ле; эртенниң-не — өргүлдериңерни, үш хонгаш-ла — дүжүдүңерниң оннуң бир кезээн эккеп салыңар-ла.

⁵Израильчилер, ажыткылыг безин далган-тарааны өөрүп четтириишкин өргүлү кылдыр эккеп салыңар-ла, боттарыңарның эки тура-биле салып турар өргүлдериңер дугайында медээлеңер-ле, оларны салганыңар дугайында ыыткыр чарлаңар-ла. Ынчаар кылырынга ынак эвес ийик силер бе?» Дээрги-Бурган-Чаяакчының медеглээн чүвези ол-дур.

⁶«Шупту хоорайларыңарга Мен силерни аш-биле кезедип турган мен, бүгү чурттап турар черлериңерге аъш-чемиңер чедишпейн турган. Ындыг-даа болза, Менче эглип келбээн силер». Дээрги-Чаяакчының медеглээн чүвези ол-дур.

⁷«Мен дүжүт ажаалдазынга чедир үш ай арткан турда, силерже чаъс чагдырбайн турдум; бир хоорайже чаъсты чагдыргаш, өскезинче чагдырбас турдум; бир шөлдү чаъс-биле суггаргаш, өскезин суггарбайн баарымга, кургап каар турду.

⁸Элээн каш хоорайларның чону суксунун хандырар дээш чаңгыс хоорайга элеңейндир кылаштап кээрге-даа, шуптузунуң суксунун хандырар суг чок боор турду. Ындыг-даа болза, Менче эглип келбээн силер». Дээрги-Чаяакчының медеглээн чүвези ол-дур.

⁹«Тарып алган үнүш-тарааңарны чалынныг изиг хат болгаш дүдүк-биле чиртип турдум; дыка хөй чимистиг садтарыңарны, виноград тараан шөлдериңерни, фига биле оливаңар ыяштарын шартылаа чип кааптар турду. Ындыг-даа болза, Менче эглип келбээн силер». Дээрги-Чаяакчының медеглээн чүвези ол-дур.

¹⁰«Египетке болуп турганы дег, силерже мал-маган кырар хамчык аарыгны ыттым, аныяк эрлериңерни хылыш-биле кырып кагдым, аъттарыңарны сүрүп аппаар турду; турлагларыңарда өлүмнүң чыды думчууңар үдүн дола берди. Ындыг-даа болза, Менче эглип келбээн силер». Дээрги-Чаяакчының медеглээн чүвези ол-дур.

¹¹«Мээң Содом биле Гоморраны чылча базып кааным дег, силерниң чуртуңарда чамдык хоорайларны чылча базып кагдым; ынчан силер оттан ушта тырткан кезектен дээредевес турдуңар. Ындыг-даа болза, Менче эглип келбээн силер». Дээрги-Чаяакчының медеглээн чүвези ол-дур.

¹²«Ынчангаш Мен сени мынчаар аажылаар мен, Израиль, сээң-биле мынчалдыр кылыр мен, бодуңнуң Бурганың-биле ужуражырынга белеткенип ал, израиль чон!»

¹³Дагларны тывылдырып, хатты чаяап, кижиге Бодунуң угаан-бодалын медээлеп, даң хаяазын болгаш дүмбейни чаяап турар, черниң бедиктерин базып турар Бурган — Бурганың Ол-дур. Ооң ады — Дээрги-Чаяакчы, Аг-шериглиг Бурган!