Read Ыдыктыг Библия, 2011 Амос 5 Bible Online

Амос 5 - Ыдыктыг Библия, 2011 bible

Амос 5

¹Израиль чон, силер дээш ыы-сыым төп кажыыдаан сөзүмнү дыңнаңар.

²Израиль-кыс кээп дүшкеш, туруп чадап тур! Ол бодунуң черинге бүгү улуска кагдырыпкан чыдырда, көдүрер кижи тывылбас-тыр.

³Чүге дээрге Дээрги-Бурган-Чаяакчы: «Израильде муң кижи дайылдажып үнген хоорайга чүс-ле шериг артар, чүс кижи дайылдажып үнген хоорайга он-на шериг артар» — дээн.

⁴Дээрги-Чаяакчы израиль чонга чугаалаан: «Менче чүткүңер, ынчан амы-тынныг артар силер;

⁵Вефилче чүткүвеңер, Галгалче барбаңар, Беэр-Шеваже чорук кылбаңар, чүге дээрге Галгалдың чурттакчыларын тудуп алгаш баар, Вефил айыыл-халапка таваржыр.

⁶Дээрги-Чаяакчыже чүткүңер, ынчан амы-тынныг артар силер, оон башка Ол Иосифтиң салгалын от ышкаш өттүр таварып эрткеш, ону чиптер, Вефилге ол отту өжүрер кижи турбас.

⁷Силер дээрге шын шииткелди оо-хоран кылдыр хуулдуруп турар, чөптүг-шынныг чорукту черже чыттыр базып турар улус-тур силер!

⁸Үгер сылдыс биле Үш-Мыйгак сылдысты кым чаяаганыл, кым дүмбей караңгыны чырык эртенче хуулдуруп, а хүндүскү үени дүн кылдыр караңгыладып, далайның сугларын кыйгыргаш, чер кырынга тарай аксып турарыл? Ооң ады — Дээрги-Чаяакчы!

⁹Ол күш-шыдалдыг улуска удур хоозуралды салыптарга, шивээлер чылча шаптырып аар.

¹⁰А силер шииткел черинде сойгалакчыны көөр хөңнүңер чок, шынны чугаалап турар кижи силерге бак бооп көстүр болгай.

¹¹Ядамыкты түрү бастырып, ооң далган-тараазын үндүрүг кылдыр былаап ап турар силер. Ынчангаш каас-коя бажыңнар-даа тудуп алган болзуңарза, аңаа чурттавас силер, шөлдерге кайгамчык эки виноград-даа тарып алган болзуңарза, ооң арагазын ишпес силер.

¹²Чүге дээрге Мен кемниг херээңерниң кайы хире хөйүн, бачыдыңарның кайы хире аарын билир мен: чөптүг-шынныг кижини кызып-кыйып, хээли ап турар силер, шииткел черинге ядыы кижиниң херээн шын шиитпес силер.

¹³Ынчангаш угаанныг кижи ол үеде чүве чугаалавас, чүге дээрге каржы-бак үе болган-дыр.

¹⁴„Дээрги-Чаяакчы бис-биле кады“ дээр-дир силер. Амы-тынныг артар дээш, бузутче эвес, буянче чүткүңер, ынчан Аг-шериглиг Бурган ылап-ла силер-биле кады боор.

¹⁵Бузутка хөңнүңер чок, буянга ынак болуңар база шииткел черинге шын шииткелди тургузуңар; ынчан Дээрги-Чаяакчы, Аг-шериглиг Бурган Иосифтиң арткан салгалынче ээ көрнүр чадавас».

¹⁶Ынчангаш Дээрги-Чаяакчы, Аг-шериглиг Бурган мынча дээн: «Улус бүгү кудумчуларга ыглап-сыктаар, хамык шөлчүгештерге „халак-халак!“ дижир. Олар кажыыдап ыглаар кылдыр — тараачын кижини, ыглап-сыктаар кылдыр — ажыг-шүжүг ырлары күүседип билир кижилерни кыйгырып алыр.

¹⁷Виноград тараан шөлдерниң шуптузунга ыы-сыы дыңналыр, чүге дээрге Мен силерниң араңар-биле кезедип эрте бээр мен». Дээрги-Чаяакчының чугаалаан чүвези ол-дур.

¹⁸«Дээрги-Чаяакчының шииткел хүнүн күзелдии-биле манап турар улус ат болур! Ол хүннү чүге манаар силер? Ол дээрге чырык эвес, дүмбей-дир!

¹⁹Кандыг-бир кижи арзылаңдан дезе бээрге, аңаа уткуй адыг келген дег азы кандыг-бир кижи бажыңынга чедип келгеш, холу-биле ханадан даянырга, ону чылан шапкан ышкаш хүн-дүр.

²⁰Дээрги-Чаяакчының шииткел хүнү караңгы эвес, чырык чүве бе? Ол дээрге дүмбей-дир, ында чырыш кынныр чүү-даа чок.

²¹[21-22] Байырлалдарыңарга хөңнүм чок, оларны хүлээп көрбес мен, байырланчыг чыыштарыңар үезинде салган бүрүн өрттедир өргүлдериңер Меңээ таалал бербес. Далган-тарааңар өргүлдерин Меңээ салыр болзуңарза, оларны хүлээвес мен, семис мал-маганыңардан салган эп-найырал өргүлдеринче көрүнмес мен.

²³Боттарыңарның ырларыңарның ыыт-шимээнин Менден ырадыңар, силерниң чадаганнарыңарның ойнаанын дыңнавас-даа мен.

²⁴Силерден күзээр чүвем бо-дур: шын шииткел — хем суу ышкаш, чөптүг-шынныг чорук — кажан-даа катпас агым ышкаш хөме аксын.

²⁵Израиль чон, силер Меңээ ээн кургаг ховуга дөртен чыл дургузунда янзы-бүрү эът өргүлдери, далган-тараа өргүлдери салып турган бис дээр силер бе?

²⁶Хаан-бурганыңар Саккуттуң болгаш сылдыс-бурганыңар Кайванның дүрзүлерин — боттарыңарга кылып алган дүрзү-бурганнарыңарны ап чораан болгай силер! [5]

²⁷Ынчангаш Мен силерни Дамаскының ындынче шөлүптер мен» — деп, Дээрги-Чаяакчы чугаалаан; Ооң ады — Аг-шериглиг Бурган!