Read Ыдыктыг Библия, 2011 Амос 6 Bible Online

Амос 6 - Ыдыктыг Библия, 2011 bible

Амос 6

¹Сион дагда сагыш амыр чурттап турар улус ат болур, «Самарияның даанга айыыл чок чурттаар бис» деп бодап турар улус, израильчилерниң оларга кээп турары баштың чоннуң ат-сураглыг улузу ат болур!

²Калне хоорайже барып, көрүп көрүңер, оортан өндүр улуг Хамат хоорайже чоруптуңар, оон филистим черде Геф хоорайже бада бериңер: ол черлер бо күрүнелериңерден дээре деп бе? Ол черлерниң девискээри бо черлерден делгем деп бе?

³Айыыл-халап хүнүн ырак кылдыр бодап, күчүлелдиң дүжүлгеге олурарын чоокшуладып турар-дыр силер.

⁴Чаан сөөгү-биле каастаан оруннарыңарда чыдар-дыр силер, орун-дөжээңерде хөлестеп чыдып алгаш, сүрүг малыңарда эң-не семис хойларны, коданыңарда семиртир азыраан шарыларны дөгерип чип турар-дыр силер.

⁵«Чадаганга үдеткеш, ырлажып, хөгжүм херекселинге Давид хаан ышкаш ойнап билир бис» деп бодаар-дыр силер.

⁶Дашкаларга арага кудуп ижип, эң эки үстер-биле чагдынар-дыр силер, а Иосифтиң салгалының айыыл-халавы дээш сагыжыңар аарбас-тыр!

⁷Ол бүгү дээш, силер ам дайзынның тудуп аппаар улузунуң баштайгылары болур силер, хөлестеп чыткан улустуң дою доостур!

⁸Дээрги-Бурган-Чаяакчы Бодунуң амы-тыны-биле даңгыраглаан, Аг-шериглиг Бурган: «Иаковтуң салгалының улуургак чоруунга хөңнүм чок, ооң шивээлерин көөр хөңнүм чок. Найысылалды, ында турар бүгү чүвени дайзынга хүлээдип бээр мен — деп медеглээн. —

⁹Кандыг-бир бажыңга он кижи амы-тынныг артар-даа болза, олар база өлүп каар.

¹⁰Оларны ажаап, өрттедир дээн төрели кижи чедип келгеш, мөчү-сөөктерни үндүрер дээш, бажың иштинде кижиден: „Сенден өске кижи бар-дыр бе?“ — деп айтырарга, демгизи: „Кым-даа чок“ — деп харыылаар, ынчан келген кижи: „Ыыттава! Дээрги-Чаяакчының адын адап болбас“ — дээр [6].

¹¹Чүге дээрге Дээрги-Чаяакчы дужаарга, улуг-даа бажыңнар буступ каар, бичии-даа бажыңнар чуурлуп каар.

¹²Хаяларга аът маңнаар бе? Хая-дашты [7] шары-биле чарып болур бе? А силер база утка чок чүве кылып, шын шииткелди оо-хоран кылдыр, чөптүг-шынныг чорукту ажыг өт кылдыр хуулдуруп алган-дыр силер.

¹³Силер дээрге чөгенчиг чүүл дээш өөрүп: „Бодувустуң шыдалывыс-биле күчү-күштү чедип алган эвес бис бе?“ — деп турар улус-тур силер.

¹⁴Көөр сен, израиль чон, Мен сеңээ удур өске чонну көдүрер мен. Ынчан олар силерни соңгу чүкте Лево-Хаматтан эгелээш, мурнуу чүкте Арава шынаага чедир дарлап-бастыр» — деп, Дээрги-Чаяакчы, Аг-шериглиг Бурган чугаалаан.