Read Ыдыктыг Библия, 2011 Авдий 1 Bible Online

Авдий 1 - Ыдыктыг Библия, 2011 bible

Авдий 1

¹Дээрги-Бурган-Чаяакчының Авдий медээчиже чоруткан көстүүшкүнү, Эдомнуң дугайында чугаалаан чүвези бо-дур. Дээрги-Чаяакчыдан келген медээни дыңнаан бис. «Көдүрлүп үнгеш, Эдомга удур чаалажыылы!» — деп медээни өске чоннарга чедирзин дээш, айбычы кижини чоруткан турган.

²«Дыңнап көр, Мен сени чоннар аразынга чөгенчиг чон кылып каар мен, оларга аажок бак көрдүрер сен.

³Турамык чорууң сени дуурайлап алган-дыр: чалымнарда, бедик черде чурттап турар болгаш: „Мени кым черже дүжүр октаптар боор?!“ — деп чугааландың.

⁴Сен, эзир куш дег, бедидир ужуп үне бээр-даа болзуңза, уяңны сылдыстар аразынга-даа тудуп аар болзуңза, Мен сени оортан-даа дүжүр октаптар мен — деп, Дээрги-Чаяакчы чугаалаан. —

⁵Хоозурап когараар деп чүвеңни! Бир эвес сээң шөлүңче кат-чимис чыыкчылары кирип кээр болза, олар элээн катты арттырып кагбас чүве бе? Оорлар азы дүнеки үптекчилер сеңээ кээр болза, олар чүгле бодунга чеже херегил, ынчаны оорлап албас бе?

⁶А Исавтың үре-салгалының бүгү чүвезин үптеп-тонап, ооң чажыт шыгжамырларын безин үжеп-чиндиири кайы хире-дир!

⁷Сээң шупту эвилелчилериң сени чериңден үндүр ойладыптар, сээң-биле эп-найыралдыг улус сени дуурайлааш, ажып тиилээр, сээң аъш-чемиңни чип турган улус сеңээ дузак салыр. Эдомга угаан-сарыыл артпас!»

⁸Оон Дээрги-Чаяакчы мынча деп медеглээн: «Эдомда мерген угаанныг улусту, Исавтың даглыг чуртунда бодамчалыг улусту Мээң шииткелим хүнүнде узуткап каар эвес ийик мен бе?

⁹Теман чер, сээң эрес-дидим улузуң коргуушкунга алзыр. Исавтың даглыг чуртунга кымны-даа амылыг арттырбас.

¹⁰Өлүрүкчү чорук кылып турарың дээш, ха-дуңмаң болур Израильди бастып турарың дээш, бак атка кирип, кезээ мөңгеде узуткаттырар сен.

¹¹Хары улус Израильдиң эртине-байлаан аппарып турда [1], даштыкы улус ооң эжик-хаалгазын дамчып Иерусалимче киргеш, аңаа үлеш кылып турда, сен кыдыынга көрүп турган сен, ооң дайзыннарының бирээзи дег болган сен.

¹²Ха-дуңмаң айыыл-халапка таваржырга, хыың ханып, амырава! Иудеяның чону өлүп турда, өөрүве! Олар базындырып турда, аксың калбаңнатпа!

¹³Мээң чонум айыыл-халапка алзып аарга, ооң эжик-хаалгазын дамчып кирбе! Ол буурап каарга, ооң хай-халавынче топтап көрбе! Ол айыыл-халапка таваржы бээрге, ооң эт-хөреңгизинге дегбе!

¹⁴Ооң менди арткан улузун өлүрер дээш, орук белдирлеринге кедеп, манап турба! Ол базындырып турда, дириг арткан улузун дайзыннарга тудуп бербе!

¹⁵Дээрги-Чаяакчының шииткелиниң хүнү бүгү чоннарга чоокшулап келген-дир: өскелерни канчаар аажылап чораан болдур сен, Бурган сени база ынчаар аажылаар; херектериңге дүгжүр кеземче бодуңнуң бажыңче суг кудар.

¹⁶Килеңимниң дашказын Мээң чонумнуң ыдыктыг даамга ишкени дег, шупту өске чоннар база ону үргүлчү ижип, төндүр пактаар, олар оон шуут турбаан-даа ышкаш, кырлып чиде бээр».

¹⁷«А Сион даг ыдыктыг чер болур, аңаа хоргадаан чон дириг артар. Иаковтуң үре-салгалы бодунуң өнчү черин ээлеп аар.

¹⁸Иаковтуң үре-салгалы кыпкан от апаар, Иосифтиң үре-салгалы чалбыыш апаар, а Исавтың үре-салгалы кургаг сиген апаргаш, өрттеттирип, узуткаттырып аар, олардан кым-даа дириг артпас». Дээрги-Чаяакчының чугаалаан сөзү ол-дур.

¹⁹Негев чурттакчылары Исавтың даглыг чуртун эжелеп аар, Шефела чурттакчылары филистим чоннуң чуртун эжелеп аар; олар Эфремниң черин — Самарияның чоок-кавызын эжелеп аар, а Вениаминниң аймаа Галаад девискээрин эжелеп аар.

²⁰Израильдиң өскээр көжүртү берген аг-шерии ханаан черни шуут-ла Сарептага чедир эжелеп аар, а Иерусалимниң өскээр көжүртү бергеш, Сефарадта чурттап турар чону Негевтиң хоорайларын эжелеп аар.

²¹Тиилекчи улус [2] Сион дагга чедип келгеш, Исавтың даглыг чуртун башкарып эгелээр. Дээрги-Чаяакчының Чагыргазы тургустунар.