Read Ыдыктыг Библия, 2011 Числа 1 Bible Online

Числа 1 - Ыдыктыг Библия, 2011 bible

Числа 1

¹Дээрги-Чаяакчы Моисейге Синай ховузунга, Ужуражылга майгынынга, израильчилерниң Египеттен хосталып үнгениниң ийиги чылында, ийи айның бирээде мынча деп дужааган:

²[2-3] «Сен Аарон-биле бүгү израиль ниитилелдиң санаашкынын төрел бөлүктерин, ада-өгбезин барымдаалап кылып калыңар, шупту эр улусту санаашкынче киирип, кымны-даа арттырбайн даңзылаңар. Израиль шеригге албан-хүлээлге эрттирип шыдаар, чээрби хардан өрү назылыг шупту эр улусту чурум-чыскаалдыг бөлүктер аайы-биле санап калыңар.

⁴Аймак бүрүзүнден-не бодунуң аймааның баштыңы болур кижи санаашкынны силер-биле кады чорутсун.

⁵Силерге дузалажыр эр кижилерниң аттары бо-дур: Рувимниң аймаандан — Шедеурнуң оглу Элицур;

⁶Симеоннуң аймаандан — Цури-Шаддайның оглу Шелумиил;

⁷Иуданың аймаандан — Аминадавтың оглу Наассон;

⁸Иссахарның аймаандан — Цуарның оглу Нафанаил;

⁹Завулоннуң аймаандан — Хелоннуң оглу Элиав;

¹⁰Иосифтиң оглу Эфремниң аймаандан — Аммиудтуң оглу Элишама; Иосифтиң оглу Манассияның аймаандан — Педацурнуң оглу Гамалиил;

¹¹Вениаминниң аймаандан — Гидеонийниң оглу Авидан;

¹²Данның аймаандан — Амми-Шаддайның оглу Ахиезер;

¹³Асирниң аймаандан — Охранның оглу Пагиил;

¹⁴Гадтың аймаандан — Регуилдиң оглу Элиасаф;

¹⁵Неффалимниң аймаандан — Энанның оглу Ахира».

¹⁶Ол эр кижилер дээрге израиль ниитилелден шилиттинген, ада-өгбе төрел бөлүктериниң — Израильдиң аймактарының баштыңнары улус турган.

¹⁷Моисей биле Аарон шак ол аттарын адаан улусту кыйгырып эккелгеш,

¹⁸ийи айның бирээде бүгү израиль ниитилелди чыып алганнар. Чээрби хардан өрү назылыг эр улус боттарының төрел бөлүктерин, ада-өгбезин айыткаш, санаашкынче боттарын киирип, кижи арттырбайн даңзыладып алганнар.

¹⁹Моисей израильчилерниң санаашкынын Синай ховузунга Дээрги-Чаяакчының дужааганын ёзугаар күүсеткен.

²⁰Израильдиң дун оглу Рувимниң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — кымны-даа арттырбайн санап кааннар.

²¹Рувимниң аймаанда эр улусту санаарга, 46 500 кижи болган.

²²Симеоннуң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — кымны-даа арттырбайн санап кааннар.

²³Симеоннуң аймаанда эр улусту санаарга, 59 300 кижи болган.

²⁴Гадтың үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

²⁵Гадтың аймаанда эр улусту санаарга, 45 650 кижи болган.

²⁶Иуданың үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

²⁷Иуданың аймаанда эр улусту санаарга, 74 600 кижи болган.

²⁸Иссахарның үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

²⁹Иссахарның аймаанда эр улусту санаарга, 54 400 кижи болган.

³⁰Завулоннуң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

³¹Завулоннуң аймаанда эр улусту санаарга, 57 400 кижи болган.

³²Иосифтиң оглу Эфремниң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

³³Эфремниң аймаанда эр улусту санаарга, 40 500 кижи болган.

³⁴Иосифтиң оглу Манассияның үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

³⁵Манассияның аймаанда эр улусту санаарга, 32 200 кижи болган.

³⁶Вениаминниң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

³⁷Вениаминниң аймаанда эр улусту санаарга, 35 400 кижи болган.

³⁸Данның үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

³⁹Данның аймаанда эр улусту санаарга, 62 700 кижи болган.

⁴⁰Асирниң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

⁴¹Асирниң аймаанда эр улусту санаарга, 41 500 кижи болган.

⁴²Неффалимниң үре-салгалын — дөргүл-төрелин, төрел бөлүктерин, ада-өгбезин барымдаалап, чээрби хардан өрү назылыг, шериг албаны эрттирип шыдаар шупту эр улусту санаашкынче киирип — санап кааннар.

⁴³Неффалимниң аймаанда эр улусту санаарга, 53 400 кижи болган.

⁴⁴Санаашкынны эрткен улус ол-дур. Моисей, Аарон болгаш Израильдиң он ийи баштыңының — бир аймактан-на бир кижиниң санап кааны улус ол-дур.

⁴⁵Шупту израильчилерни — чээрби хардан өрү назылыг, израиль шеригге албан эрттирип шыдаар бүгү улусту — төрел бөлүктер барымдаалап санап кааннар.

⁴⁶Санаашкынны эрткен шупту эр улус 603 550 кижи болган.

⁴⁷А левиттерни санаашкын эрткен чон аразынче, ада-өгбезиниң аймаан барымдаалап, киир санавайн барган.

⁴⁸Дээрги-Чаяакчы Моисейге мынча деп дужааган турган:

⁴⁹«Чүгле Левийниң аймаан чизе-даңзыже киирбе, оларны өске израильчилер-биле кады санава.

⁵⁰Сен левиттерге Ужуражылга майгынын, ооң хамык херекселдерин болгаш ооң иштинде турар бүгү чүүлдү хүлээндирип каг — олар майгынны болгаш ооң хамык херекселдерин дажыглазын, аңаа бараан болзун, ооң чанынга турлагжып алзын.

⁵¹Ужуражылга майгынын көжүрүп турда, ону левиттер дүрүп, буссун, а майгынны тигер апарганда, ону олар тиксин. Өске-бир кижи майгынче чоокшулап кээр болза, ону өлүрүп каар ужурлуг.

⁵²Израильчилер боттарының туктарының чанынга чурум-чыскаалдыг бөлүктер ёзугаар турлагжып алыр ужурлуг.

⁵³А левиттер израиль чоннуң ниитилелинче Бурган килеңневезин дээш, майгынны долгандыр турлагжып алгаш, ол дээш ээ-харыысалгалыг болур ужурлуг».

⁵⁴Израиль чон бүгү чүвени Дээрги-Чаяакчы Моисейге канчаар дужааганыл, ынчаар күүсеткен.