Read Ыдыктыг Библия, 2011 Числа 12 Bible Online

Числа 12 - Ыдыктыг Библия, 2011 bible

Числа 12

¹Моисей кадай кылдыр эфиоп херээжен ап алган турган чүве-дир. Мариам биле Аарон аңаа удур чүве чугаалап: «Эфиоп кадай ап алган сен!» — деп турган.

²Олар оон ыңай: «Дээрги-Чаяакчы чаңгыс-ла Моисейни дамчыштыр чон-биле чугаалажып турган чүве бе? Ол бисти дамчыштыр база чон-биле чугаалажып турду чоп!» — дээннер. Дээрги-Чаяакчы ол бүгүнү дыңнап каан.

³А Моисей болза чер кырында кижи төрелгетенниң иштинде эң биче сеткилдиг кижи турган.

⁴Дээрги-Чаяакчы ынчан хенертен Моисей, Аарон болгаш Мариам оларга: «Силер үжелээ Ужуражылга майгынының чанынче үнүп келиңер» — деп чугаалаан. Олар ынчан үжелээ ынаар чеде берген.

⁵Дээрги-Чаяакчы булут чагы аразынга дүжүп кээп, майгынче кирер чер чанынга туруп алгаш, Аарон биле Мариамны кый дээрге, олар иелээ чоокшулап келген.

⁶Оларга Дээрги-Чаяакчы: «Мээң сөстеримни дыңнаңар: бир эвес силерниң араңарда медээчи кижи турар болза, Дээрги-Чаяакчы мен онза көстүүшкүн кылып, аңаа ажыттынар мен; дүжүнге кирип, ооң-биле чугаалажыр мен.

⁷А Мээң чалчам Моисей-биле ындыг эвес — бүгү чонум аразында дыка бүзүрелдиг кижи ол болгай.

⁸Мен ооң-биле удур-дедир көржүп алгаш, элдээртип чажырбаан, тодаргай уткалыг чугаа кылып турар мен, Дээрги-Чаяакчының овурун ол көрүп турар болгай. Ынчангаш Мээң чалчам Моисейге удур чүве чугаалаарын канчап диттир силер?!» — дээн.

⁹Дээрги-Чаяакчы Мариам биле Ааронга удур килеңи кыптыгып, оларны каапкаш барган.

¹⁰Булут майгын кырындан көдүрлү бээрге, Мариам кеш аарыы-биле — хар дег ак чүүл-биле — шыптына берген болган! Аарон кеш аарыглыг апарган Мариамче көргеш,

¹¹Моисейге: «Дээргим, бистиң мелегейзип, бачыт үүлгеткенивис дээш, буруувусту бисче чүдүрбейн көрем.

¹²Иезиниң иштинден үнүп кээрге-ле, мага-бодунуң чартыы ирип калган болур өлүг төрүттүнген чаш төлге Мариам дөмейлешпезин!» — деп чугаалаан.

¹³Моисей Дээрги-Чаяакчыдан дуза дилеп: «Бурганым, ону экиртип көрем!» — деп кыйгырган.

¹⁴Дээрги-Чаяакчы Моисейге: «Бир эвес ачазы ооң арнынче дүкпүрүпкен болза, ооң ады чеди хүн дургузунда баксыравас чүве бе? Ындыг болганда, ону чеди хүн дургузунда турлагдан үндүрүп, улустан аңгылап каапсын, а ооң соонда ол ээп кээп болур» — деп харыылаан.

¹⁵Мариам чеди хүн дургузунда турлагның даштынга, улустан аңгы черге турган, а чон ол ээп келгижеге чедир көжүп үнмээн.