Read Ыдыктыг Библия, 2011 Числа 13 Bible Online

Числа 13 - Ыдыктыг Библия, 2011 bible

Числа 13

¹Израиль чон ооң соонда Асироттан көжүп үнгеш, Фаран ховузунга турлагжып алган.

²Дээрги-Чаяакчы Моисейге:

³«Мээң израиль чонга берип турарым ханаан черни шинчип көрзүн дээш элээн каш кижиден айбылап чорудувут. Оларның ада-өгбезиниң аймак бүрүзүнден-не бир кижи кылдыр, баштың улустан чорудар силер» — деп чугаалаан.

⁴Моисей Дээрги-Чаяакчының дужаалын ёзугаар израиль чоннуң баштыңнарындан тургустунган бөлүк улусту Фаран ховузундан Ханаанче чорудупкан.

⁵Оларның аттары бо-дур: Рувимниң аймаандан — Заккурнуң оглу Шаммуй;

⁶Симеоннуң аймаандан — Хорийниң оглу Сафат;

⁷Иуданың аймаандан — Иефоннийниң оглу Халев;

⁸Иссахарның аймаандан — Иосифтиң оглу Игал;

⁹Эфремниң аймаандан — Нуннуң оглу Осия;

¹⁰Вениаминниң аймаандан — Рафунуң оглу Фалтий;

¹¹Завулоннуң аймаандан — Содийниң оглу Гаддиил;

¹²Иосифтиң оглу Манассияның аймаандан — Сусийниң оглу Гаддий;

¹³Данның аймаандан — Гемаллийниң оглу Аммиил;

¹⁴Асирниң аймаандан — Михаилдиң оглу Сефур;

¹⁵Неффалимниң аймаандан — Вофсийниң оглу Нахбий;

¹⁶Гадтың аймаандан — Махийниң оглу Геуил.

¹⁷Ханаан черни шинчип көрзүн дээш, Моисейниң айбылап чорудупкан улузу ол-дур. Моисей Нуннуң оглу Осияны Иисус [13] деп адап алган.

¹⁸Моисей оларны Ханаанны шинчип көрзүн дээш чорудуп тура: «Негев деп ээн кургаг ховуну таварып эртиңер, дагларже үнүңер;

¹⁹ол черниң кандыызын топтап көрүңер, ында кандыг чон чурттап турарын, ооң күштүүн азы кошкаан, эвээжин азы хөйүн көрүп билип алыңар;

²⁰ол улустуң чурттап турар чериниң кандыызын: эки азы багайын, оларның чурттап турар хоорайларының кандыызын: чоннуң быжыглаттынмаан турлагларда азы быжыглалдыг шивээлерде чурттап турарын көрүп билип алыңар;

²¹ол черниң дүжүткүрүн азы дүжүткүр эвезин, ында ыяштар бар азы чогун көрүп билип алыңар. Дидим болуңар, ол черниң чимистерин бээр эккелиңер» — деп чагаан. (А ол үе дээрге виноградтың баштай бышкан чимистерин чыыр үе турган.)

²²Олар хайгыыл кылып чорупкаш, мурнуу чүкте ээн кургаг Цин ховузундан эгелээш, соңгу чүкте Лево-Хамат чоогунда Реховка чедир черлерни шинчип көргеннер.

²³Негевти таварып эрткеш, Хевронга чеде бергеннер. Ол хоорайга Энактың үре-салгалы [14]: Ахиман, Шешай болгаш Талмай чурттап турган. (Хевронну Египетте Цоан хоорайдан чеди чыл мурнай туткан чүве-дир.)

²⁴Хайгыылчылар ооң соонда Эшкол [15] деп шынаага чедип келгеш, бир салбак каттыг виноград будуун сыптан кезип алганнар — ону ийи кижи мергеге аскаш, көдүрүп чораан, аңаа немей гранат биле фига чимистери ап алганнар.

²⁵Ол черни израильчилер Эшкол деп адап алган, чүге дээрге оон виноград салбаа кезип алган чүве-дир.

²⁶Хайгыылчылар ол черни шинчип көрүп алгаш, дөртен хонук эрткенде, ээп келгеннер.

²⁷Олар Моисей биле Ааронга база бүгү израиль ниитилелге Фаран ховузунга, Кадес деп черге чедип келгеш, оларга харыы тудуп чугаалааш, чедип чорааны черниң чимистерин көргүскеннер.

²⁸Хайгыылчылар Моисейге мынча деп чугаалап турганнар: «Сээң бисти айбылап чорудупканың черге четкеш келдивис. Шынап-ла, сүт биле ары чигири агып чыдар байлак чер болду, ооң чимистери бо-дур.

²⁹Ынчалза-даа ол черде чурттап турар чон күштүг-дүр, ооң хоорайлары быжыглалдыг болгаш аажок улуг-дур; Энактың үре-салгалын база аңаа көрдүвүс.

³⁰Амалик чон ол черниң мурнуу талазында, хет, иевус болгаш амор чоннар — дагларда, а хананей чон далай чанында база Иордан хемниң кыдыын дургаар чурттап турар болду».

³¹А Халев Моисейниң мурнунга чонну оожургадып: «Баргаш, ол черни эжелеп аалы, оларны тиилеп шыдаар бис» — деп турган.

³²Ынчалзажок ооң-биле кады хайгыылдап чораан кижилер: «Ол улуска удур тулчуп шыдавас бис, олар бистен күштүг-дүр!» — дижир болган.

³³Олар израиль чоннуң аразынга шинчип көрүп чорааны чер дугайында бак чугаа-соот тарадып: «Топтап көөр дээш таварып эрткенивис чер дээрге ында чурттаан улустуң бажын чип турар чер-дир; аңаа көргенивис шупту улус бедик-чаагай чорду;

³⁴Энактың үре-салгалы болур, кончуг улуг-шыырак уктуг, боттары база кайгамчык улуг улусту аңаа көрдүвүс, оларның мурнунга бодувусту шартылаага деңней көөр чордувус, олар бисче база шартылааже дег кылдыр көрүп турду» — деп турганнар.