Read Ыдыктыг Библия, 2011 Числа 15 Bible Online

Числа 15 - Ыдыктыг Библия, 2011 bible

Числа 15

¹Дээрги-Чаяакчы Моисейге мынча деп чугаалаан:

²«Израиль чонга мону дамчыдып чугаала. Мээң силерге берип турарым, ээлеп чурттаарыңар черже кире бергеш,

³Дээрги-Чаяакчыга таарымчалыг чаагай чыттыг өргүлдерден салыр силер. Бүрүн өрттедир өргүл база өске-даа: азы онза даңгырак күүседирде салыр, азы эки тура-биле салыр, азы байырлалдарыңарда салыр өргүлдер кылдыр бода-даа, шээр-даа малыңарны эккээр силер.

⁴[4-5] Бир эвес өргүп турар малы хураган болза, Дээрги-Чаяакчыга ону салып турар кижи ооң-биле кады далган-тараа өргүлүн: бир °гинниң дөрттүң бири хире олива үзү холаан, бир °эфаның оннуң бири хире эң шынарлыг кызыл-тас далганын база өргүзүн. Бүрүн өрттедир өргүлдү азы өске-даа өргүлдү салып тура, хураган бүрүзү-биле кады бир гинниң дөрттүң бири хире арага өргүлүн база эккеп чаш.

⁵

⁶Бир эвес өргүп турар малы кошкар болза, ооң-биле кады далган-тараа өргүлүн: бир °гинниң үштүң бири хире олива үзү холаан, бир °эфаның оннуң ийизи хире эң шынарлыг кызыл-тас далганын база эккеп сал,

⁷ол ышкаш бир гинниң үштүң бири хире арага өргүлүн база эккеп чаш — Дээрги-Чаяакчыга таарымчалыг чаагай чыттыг өргүл ол-дур.

⁸Бир эвес азы бүрүн өрттедир, азы онза даңгырак күүседир, азы эп-найырал өргүлү кылдыр Дээрги-Чаяакчыга буга эккеп салып турар болзуңза,

⁹ооң-биле кады далган-тараа өргүлүн: чартык °гин хире олива үзү холаан, бир °эфаның оннуң үжү хире эң шынарлыг кызыл-тас далганын база эккеп сал,

¹⁰ол ышкаш чартык гин хире арага өргүлүн эккеп чаш — Дээрги-Чаяакчыга таарымчалыг чаагай чыттыг, отка өрттедир өргүл ол-дур.

¹¹Дээрги-Чаяакчыга буганы, кошкарны, хойну, өшкүнү өргүп турар саныңарда-ла, ынчалдыр кылыңар.

¹²Чеже малды эккеп өргүп турар-дыр силер, оларның баш бүрүзү-биле ынчалдыр кылыңар.

¹³Дээрги-Чаяакчыга таарымчалыг чаагай чыттыг, отка өрттедир өргүлдү эккеп салып тура, Израильдиң үндезин чурттакчызы болур кижи бүрүзү ынчалдыр кылыр ужурлуг.

¹⁴Бир эвес силерниң араңарда түр када чурттап чоруур даштыкы кижи азы силерниң араңарда салгалдан салгал дамчып чурттап чоруур өске сөөк кижи Дээрги-Чаяакчыга таарымчалыг чаагай чыттыг өргүл салып турар болза, силерниң кылып турарыңар дег, база ынчалдыр кылыр ужурлуг.

¹⁵Израиль чон, силерге-даа, араңарда чурттап чоруур даштыкы кижиге-даа чаңгыс-ла хоойлу — силерниң шупту салгалдарыңарга кезээ мөңгеде күштүг хоойлу турар ужурлуг: силер-даа, өскээртен келген кижи-даа Дээрги-Чаяакчының мурнунга ылгал чок болур.

¹⁶Силерге-даа, араңарда чурттап турар даштыкы кижиге-даа чаңгыс-ла ол хоойлу, чаңгыс-ла ол дүрүм турзун».

¹⁷Дээрги-Чаяакчы оон Моисейге мынча деп чугаалаан:

¹⁸«Израиль чонга мону дамчыдып чугаала. Силерни эдертип бар чыдарым черге чеде бергеш,

¹⁹ол черге үнген далган-тарааны чип тура, Дээрги-Чаяакчыга онза өргүлден салыңар:

²⁰тарааңарның баштайгы дүжүдүнден хаарган чуга далганны өргүңер — ону тараа шаңындан өргүл кылдыр салыңар.

²¹Тарааңарның баштайгы дүжүдүнден онза өргүлдү Дээрги-Чаяакчыга салгалдан салгал дамчып салыңар».

²²«Бир эвес Дээрги-Чаяакчының Моисейге чугаалаан хамык айтыышкыннарының кайы-бирээзин частырыг болуп күүсетпейн барзыңарза, чүү боорул?

²³А Дээрги-Чаяакчы ол айтыышкыннарны Моисейни дамчыштыр силерге берген, олар Дээрги-Чаяакчының берген хүнүнден эгелээш, салгалдан салгал дамчып күштүг болгай.

²⁴Кандыг-бир айтыышкын ниитилелдиң чедир көрбээни-биле частырыг болуп күүсеттинмээн болза, бүгү ниитилел бир бугажыкты Дээрги-Чаяакчыга таарымчалыг чаагай чыттыг бүрүн өрттедир өргүл кылдыр эккеп салзын, ооң-биле кады далган-тараа өргүлүн болгаш арага өргүлүн салзын база бачыт дээш өргүл кылдыр бир дүктүгүр хунаны салзын.

²⁵Бурганның бараалгакчызы бүгү израиль ниитилелди арыглап каарга, олар өршээттирер, чүге дээрге частырыг болган-дыр, а олар Дээрги-Чаяакчыга өрттедир өргүлдү эккеп салган-дыр база боттарының частырыы дээш Дээрги-Чаяакчының мурнунга бачыт дээш өргүлдү эккеп салган-дыр.

²⁶Бүгү израиль ниитилел база оларның аразында чурттап турар даштыкы кижи өршээттирер, чүге дээрге бүгү чон бачытты частырыг болуп үүлгеткен-дир.

²⁷А бир эвес чүгле чаңгыс кижи частырыг болуп бачыт үүлгеткен болза, ол кижи бир харлыг өшкүнү бачыт дээш өргүл кылдыр эккеп салзын.

²⁸Дээрги-Чаяакчының мурнунга частырыг болуп бачыт үүлгеткен кижини бараалгакчы арыглап каар — ол кижи арыглаттына бээр база өршээттирер.

²⁹Кандыг-бир кижи частырыг болуп бир чүве үүлгедир болза, израиль чоннуң аразынга төрүттүнген кижиге-даа, силерниң араңарда чурттап турар даштыкы кижиге-даа хамаарыштыр силерге чаңгыс хоойлу турзун.

³⁰А бир эвес үндезин чурттакчылар аразындан азы өскээртен келген улус аразындан кандыг-бир кижи кара өжегээр бачыт үүлгедир болза, ол кижи Дээрги-Чаяакчыны дорамчылап турар-дыр, ону чонунуң аразынга амылыг арттырбас ужурлуг.

³¹Ол кижи Дээрги-Чаяакчының сөзүн тооваан-дыр база Ооң айтыышкынын үрээн-дир; ону амылыг арттырбас ужурлуг, ол кижи буруузун боду чүктезин».

³²Израиль чон ээн кургаг ховуга турда, улус амыр-дыш хүнүнде ыяш чыып турган кижи эскерип каан.

³³Ооң ыяш чыып турганын эскерип каан улус ону Моисей биле Ааронга база бүгү ниитилелге эккелген.

³⁴Ол кижи-биле чүнү канчаары тодараттынмаан болгаш, ону хоругдап каан.

³⁵Дээрги-Чаяакчы Моисейге: «Ол кижи өлүр ужурлуг, ону бүгү ниитилел турлаг даштынга даштар-биле соп каапсын» — дээн.

³⁶Бүгү чон демги кижини турлагдан ырады бергеш, даштар-биле соп каапкан; Дээрги-Чаяакчының Моисейге дужааганын ёзугаар ол өлүп калган.

³⁷Дээрги-Чаяакчы Моисейге мынча деп чугаалаан:

³⁸«Израиль чонга мону дамчыдып чугаала. Олар салгалдан салгал дамчып боттарының хептериниң кыдыгларынга салбактардан кылып ап чорзун база ол салбактарже көк өңнүг удазыннардан киир өрүп ап чорзун.

³⁹Удазыннар салбактарга чорзун, а силер оларже көргеш, Дээрги-Чаяакчының шупту айтыышкыннарын сактып, оларны күүседип чоруур силер база силерни самыыралче киир тыртып турар чүрээңер биле карааңарны эдербейн баар силер.

⁴⁰Ынчан силер Мээң шупту айтыышкыннарымны сактып, күүседиңер, Бурганыңар дээш ыдыктыг болуңар.

⁴¹Мен дээрге силерни египет черден силерге Бурган болур дээш үндүре берген Дээрги-Чаяакчы Бурганыңар-дыр мен. Мен — Бурганыңар Дээрги-Чаяакчы-дыр мен».