Read Ыдыктыг Библия, 2011 Числа 18 Bible Online

Числа 18 - Ыдыктыг Библия, 2011 bible

Числа 18

¹Дээрги-Чаяакчы Ааронга мынча дээн: «Сен, оолдарың база төрел бөлүүң ыдыктыг майгынга удур үүлгеткен кем-буруу бүрүзүн бодуңар чүктээр силер; сен оолдарың-биле Бурганга бараан болур албан-хүлээлгеңерге удур үүлгеткен кем-буруу бүрүзүн бодуңар чүктээр силер.

²А ол ышкаш бодуңнуң ха-дуңмаңны — Левий өгбеңден укталган аймакты бодуңче чоокшуладып ал, олар сеңээ каттыжып, оолдарың-биле кады майгынның мурнунга турар үеңде, силерге дузалашсын.

³Олар сээң даалгаларыңны база майгында шупту ажыл-херектерни күүсетсин; чүгле ыдыктыг черниң эт-херекселинче болгаш өргүл салыр бедигээшче чоокшулавазын, оон башка олар-даа, силер-даа өлү бээр силер.

⁴Олар сеңээ каттышсын база майгынга албан-хүлээлге күүседип, аңаа хамааржыр шупту ажылдарны кылзын, а өске кижи силерже чоокшулавазын.

⁵А силер ыдыктыг майгын иштинде болгаш өргүл бедигээжинде албан-хүлээлгеңерни израиль чонче моон соңгаар килеңим көдүрүлбес кылдыр күүседиңер.

⁶Дыңнаңар даан, силерниң ха-дуңмаңар болур левиттерни Мен израиль чоннуң аразындан Бодумга ап алган болгай мен, ам оларны майгынга албан-хүлээлге күүседир кылдыр силерге белекке бердим.

⁷Сен оолдарың-биле өргүл бедигээжинде база көжеге артында — эң ыдыктыг өрээлде турар бүгү чүвеге хамаарышкан бараалгакчы албан-хүлээлгеңерни таптыг сагып, күүседиңер. Мен силерге бараалгакчы болур албан-хүлээлгени белек кылдыр берип тур мен, а ыдыктыг майгынче чоокшулаар өске кижини өлүрүп каар ужурлуг».

⁸Дээрги-Чаяакчы Ааронга оон ыңай мынча дээн: «Дыңна даан, израиль чоннуң Меңээ бараалгадып турар бүгү ыдыктыг өргүлдерин хайгаараарын сеңээ дагзып тур мен. Өргүлдерни кезээ мөңгеде алыр үлүүңер кылдыр сеңээ болгаш сээң оолдарыңга берип тур мен.

⁹Аажок ыдыктыг өргүлдерден сээң алыр ужурлууң өрттетпес үлүг бо-дур: улустуң Меңээ эккеп салып турар кандыг-даа далган-тараа өргүлү, бачыт дээш өргүлү база кем-буруу дээш өргүлү; ол өргүлдер дээрге аажок ыдыктыг, сеңээ болгаш сээң оолдарыңга хамааржыр өргүлдер-дир.

¹⁰Ол бүгүнү аажок ыдыктыг черге чиир силер [17]: үре-салгалыңның шупту эр улузу ону чип болур, ол өргүлдер сеңээ ыдыктыг болзун.

¹¹Израиль чоннуң онза өргүлдери шуптузу база сээңии болур. Мен оларны сеңээ, сээң оглу-кызыңга кезээ мөңгеде алыр үлүүңер кылдыр берип тур мен. Сээң өг-бүлеңде арыг кижи бүрүзү ол өргүлдерни чип болур.

¹²Сеңээ эң шынарлыг чаа олива үзү, эң эки чаа виноград арагазы болгаш далган-тарааны — улустуң Дээрги-Чаяакчыга өргүп турары баштайгы дүжүдүн берген мен.

¹³Чоннуң черинде үнген бүгү дүжүттүң башкылыы — оларның Дээрги-Чаяакчыга эккээр өргүлдери — сээңии болзун. Сээң өг-бүлеңде арыг кижи бүрүзү ол өргүлдерни чип болур.

¹⁴Израиль чоннуң Дээрги-Чаяакчыга кезээ мөңгеде тураскааткан бүгү чүвези сээңии болзун.

¹⁵Кандыг-даа дириг амытанның Дээрги-Чаяакчыга эккеп өргүп турар баштай төрүттүнген эр төлү — кижинии-даа, мал-маганныы-даа болза — сээңии болзун. Чүгле кижиниң дун оглун садып хостап аар ужурлуг, арыг эвес малдың дун төлүн база садып хостаар ужурлуг.

¹⁶А олар дээш садыызы бо-дур: бир ай назылыг төл дээш доктааткан өртекти — ыдыктыг черге ажыглаар беш °шекел мөңгүннү алыр сен. (Ыдыктыг шекелдиң деңзизи чээрби °герага дең.)

¹⁷Ынчалза-даа баштай төрүттүнген буга, хой азы өшкү дээш садыызы кылдыр чүнү-даа алба: ол малдар дээрге ыдыктыг өргүлдер-дир, оларның ханын өргүл бедигээжинче төвүт, а чаан өрттедиптер сен — Дээрги-Чаяакчыга таарымчалыг чаагай чыттыг өргүл ол-дур.

¹⁸Онза өргүлдүң төжү биле оң талакы дөңмек эъдиниң сеңээ хамааржыры дег, оларның эъди база сеңээ хамааржыр.

¹⁹Израиль чоннуң Дээрги-Чаяакчыга эккеп салып турар ыдыктыг өргүлдериниң шуптузун сеңээ, сээң оглу-кызыңга кезээ мөңгеде алыр үлүүңер кылдыр берип тур мен; ол дээрге Дээрги-Чаяакчының мурнунга мөңге, дус-биле шынзыттынган чагыг-керээ-дир, ону сээң-биле болгаш сээң үре-салгалың-биле чарып тур мен».

²⁰Дээрги-Чаяакчы Ааронга оон ыңай мынча дээн: «Израильчилерниң черинге сээң хувааглыг чериң, оларның аразынга алыр үлүүң турбас. Израиль чоннуң аразынга сээң үлүүң биле өнчүң — Мен-дир мен.

²¹А Левийниң үре-салгалынга оларның Ужуражылга майгынынга албан-хүлээлге күүседип, кылып турар ажыл-херээ дээш, Мен Израильде бар бүгү чүвениң оннуң бир кезиин өнчү кылдыр берип тур мен.

²²Израиль чон майгынче моон соңгаар чоокшулавазын, оон башка олар бачыдын чүктеп, өлүп каарлар.

²³Левиттер майгынга албан-хүлээлгезин эрттирзин, майгынга удур кылган кандыг-даа кем-бурууну боттары чүктезин. Ол дүрүмнү силерге салгалдан салгал дамчып кезээ мөңгеде доктаадып каан. Левиттер израиль чоннуң аразынга хувааглыг чер албас.

²⁴Израиль чоннуң Дээрги-Чаяакчыга салып турар өргүлдериниң оннуң бир кезиин левиттерге өнчү кылдыр берип тур мен. Ынчангаш: „Олар израиль чоннуң аразынга хувааглыг чер албас“ — деп, левиттерге хамаарыштыр чугаалаан мен».

²⁵Дээрги-Чаяакчы оон Моисейге мынча деп чугаалаан:

²⁶«Левиттерге мону дамчыдып чугаала. Мээң израильчилерден ап алгаш, силерге өнчү кылдыр берип турарым үлүүңерни — оларның эдилээн чүвезиниң оннуң бир кезиин хүлээп ап тура, Дээрги-Чаяакчыга демги оннуң бир кезииниң оннуң бир кезии болур өргүлдү салыр силер.

²⁷Ол өргүлүңер шаңыңарның тараазы, виноград сы базар оңгарыңарның арагазы деп санаттынар.

²⁸Силер база израиль чондан ап турарыңар оннуң бир кезиинден Дээрги-Чаяакчыга өргүлден салыңар, Дээрги-Чаяакчыга бараалгаткан ол өргүлдү Аарон бараалгакчыга бериңер.

²⁹Силерге берип турар шупту белектерден Дээрги-Чаяакчыга өргүлдү салыңар, эң эки, ыдыктап каан чүүлдү шилип, Аңаа өргүңер.

³⁰Левиттерге мону база чугаала. Өнчүңерниң эң эки кезиин Дээрги-Чаяакчыга өргүүр болзуңарза, ооңар шаңыңарның тараазы, сы бастырган виноградыңарның арагазы деп санаттынар.

³¹А силер: бодуңар-даа, өг-бүлеңер-даа алган үлүүңерни кандыг-даа черге чип болур силер — Ужуражылга майгынында кылып турар ажылыңар дээш төлевир ол-дур.

³²Үлүүңерниң эң эки кезиин Дээрги-Чаяакчыга өргүп турзуңарза, ооң арткан кезиин чигениңер дээш бачыт чүктевес силер, ынчалдыр кылыр болзуңарза, израиль чоннуң Бурганга салган ыдыктыг өргүлдерин бужартатпас силер база өлбес силер».