Read Ыдыктыг Библия, 2011 Числа 27 Bible Online

Числа 27 - Ыдыктыг Библия, 2011 bible

Числа 27

¹Салпаад деп кижи (ол дээрге Хеферниң оглу, Хефер Махирниң оглу, Махир Манассияның оглу, Манассия Иосифтиң оглу чүве-дир) беш кыстыг турган. Оларның аттары: Махла, Ноа, Хогла, Милка болгаш Тирца.

²Ол беш кыс Ужуражылга майгынынга чедип келгеш, Моисей биле Элеазар бараалгакчының база баштыңнар биле бүгү израиль ниитилелдиң мурнунга туруп алгаш:

³«Бистиң ачавыс ээн кургаг ховуга өлүп калган. Ол Дээрги-Чаяакчыга удур сүлчээ кылып чыглып келген улустуң — Корахтың талалакчыларының санынче кирбээн, а бодунуң бачыдының ужун өлү берген кижи. А ол черле оолдуг бооп көрбээн.

⁴Оолдуг болбаан-на дээш ачавыстың ады чүге ооң төрел бөлүүнден казыттынып чиде бээр ужурлугул? Ооң ха-дуңмазының ээлээн черлериниң аразынга биске база хувааглыг черден бериңерем» — дээннер.

⁵Моисей оларның херээн Дээрги-Чаяакчыга дыңнадырга,

⁶Ол Моисейге мынча дээн:

⁷«Салпаадтың кыстары шынын чугаалап турлар, ачазының ха-дуңмазының ээлээн черлериниң аразынга база хувааглыг черден үзүп, ооң уругларынга ээлээр өнчү кылдыр дамчыдып бер.

⁸Израиль чонга мону чугаала. Бир эвес оолдуг болбаан кандыг-бир кижи өлүп калган болза, ооң хувааглыг черин уруунга дамчыдып бериңер;

⁹а ол кижиниң уруу база чок болза, хувааглыг черин ооң кады төрээн ха-дуңмазынга дамчыдып бериңер;

¹⁰ооң кады төрээн ха-дуңмазы база чок болза, хувааглыг черин ооң ачазының ха-дуңмазынга дамчыдып бериңер;

¹¹а бир эвес ол кижиниң ачазының ха-дуңмазы чок болза, хувааглыг черин ооң төрел бөлүүнден чоок төрели кижиге — ук черни салгап аар кылдыр — дамчыдып бериңер». Дээрги-Чаяакчының Моисейге дужааганын ёзугаар ол бүгү израиль чонга доктаадып каан дүрүм-хоойлу болган.

¹²Дээрги-Чаяакчы Моисейге мынча дээн: «Бо турар Аварим сынче үне бергеш, Мээң израиль чонга берип турарым черже көрүп көр.

¹³Ол черни көрүп алгаш, акың Аарон ышкаш, өгбелериңниң соондан өске оранче чоруй баар сен.

¹⁴Чүге дээрге силер Цин ховузунга израиль чон алгыш-кырыш үндүрүп турда, Мээң сөзүмге удурланып, суг чанынга чон мурнунга Мээң ыдыктыымны хүндүлевээн болгай силер». (Ол дээрге Цин ховузунда Кадес деп черде Мериваның суу чүве-дир.)

¹⁵Моисей Дээрги-Чаяакчыга мынча деп чугаалаан:

¹⁶«Бүгү амылыг чүүлдү тынгарып турар Дээрги-Бурган-Чаяакчы, бо ниитилелдиң бажынга бир кижиден шилип салып каап көрем.

¹⁷Ол баштыңчы кижи оларны эдертип чорзун, дайын-чаа үезинде оларны баштазын, ынчан Дээрги-Чаяакчының чону кадарчы чок хойлар ышкаш болбас».

¹⁸Дээрги-Чаяакчы Моисейге харыылаан: «Нуннуң оглу Иисусту — эрес-дидим [27] кижини — кыйгыртып алгаш, бодуңнуң холуңну аңаа дегзип каг;

¹⁹ону Элеазар бараалгакчының база бүгү ниитилелдиң мурнунга тургускаш, олар көрүп турда, аңаа чонну баштаар даалгадан бер;

²⁰бүгү израиль ниитилел ону тооп дыңнаар кылдыр, бодуңнуң эрге-чагыргаңны ооң-биле үлеш.

²¹Иисус шиитпир үндүрерде, Элеазар бараалгакчының мурнунга туруп алзын, демгизи ынчан урим [28] дузазы-биле Дээрги-Чаяакчының шиитпирин айтырып, ажыдып берзин. Иисус болгаш бүгү израиль чон чүнү-даа кылырда, Элеазарның сөзүн ёзугаар кылзын».

²²Моисей Дээрги-Чаяакчының аңаа дужааганын ёзугаар кылып, Иисусту кыйгыртып алгаш, Элеазар бараалгакчы биле бүгү чоннуң мурнунга тургускаш,

²³бодунуң холдарын аңаа дээскеш, чонну баштаар даалганы берген. Бүгү чүве Дээрги-Чаяакчының Моисейни дамчыштыр чугаалаанын ёзугаар күүсеттинген.