Read Ыдыктыг Библия, 2011 Числа 30 Bible Online

Числа 30 - Ыдыктыг Библия, 2011 bible

Числа 30

¹Моисей Дээрги-Чаяакчының аңаа дужааган бүгү чүвезин израиль чонга дамчыдып чугаалаан.

²Моисей израиль чоннуң аймактарының баштыңнарынга мынча деп чугаалаан: «Дээрги-Чаяакчының дужаалы бо-дур.

³Бир эвес кандыг-бир эр кижи Дээрги-Чаяакчыга даңгырак берген азы бир-ле чүүлдү кылбазын аазаан болза, ол кижи сөглээн сөзүнге ээ бооп, шупту чүвени чугаалаан аайы-биле күүседир ужурлуг.

⁴Бир эвес ачазының аал-оранында чурттап турар аныяк кыс кижи Дээрги-Чаяакчыга аазаашкын азы даңгырак бээрге,

⁵ачазы уруунуң даңгыраан азы аазаашкынын дыңнап кааш, ол дугайында чүү-даа дивес болза, уруу шупту аазаашкыннары биле даңгырактарын күүседир ужурлуг.

⁶А бир эвес аныяк кыстың ачазы ол дугайында дыңнап кааш, күүседирин хоруур болза, уруунуң шупту аазаашкыннары биле даңгырактары күш чок апаар, Дээрги-Чаяакчы ону ол дээш өршээр, чүге дээрге ачазы аңаа хоруп каан-дыр.

⁷Бир эвес аазаашкын берген азы алызын бодавайн даңгырак берген турган кыс кижи ашакка барып аарга,

⁸ооң ашаа ол дугайында дыңнап кааш, чүү-даа дивес болза, херээжен кижи бодунуң аазаашкыннары биле даңгырактарын күүседир ужурлуг.

⁹А бир эвес ооң ашаа ол дугайында дыңнап кааш, ол-ла хүндүс күүседирин хоруур болза, ашаа кадайының берген аазаашкынын болгаш алызын бодавайн даңгырак бергенин күш чок болдуруп каар, ынчан Дээрги-Чаяакчы ол херээженни өршээр.

¹⁰Дулгуяк азы ашаандан чарылган херээжен кижиниң кандыг-даа даңгыраа азы берген аазаашкыны күүсеттинер ужурлуг.

¹¹Бир эвес ашактыг херээжен кижи аазаашкын азы даңгырак берип, аашкынган болза,

¹²ашаа ол дугайында дыңнап кааш, чүү-даа дивээн база күүседирин хоруваан болза, ол херээжен бодунуң берген аазаашкыннары биле даңгырактарын шуптузун күүседир ужурлуг.

¹³А бир эвес ооң ашаа аазаашкыннар дугайында дыңнап кааш, оларны күш чок болдуруп каар болза, ол херээженниң аксындан үнген аазаашкыннар биле даңгырактар күш чок болу бээр: оларны ашаа үреп каапкан ужурунда, Дээрги-Чаяакчы ооң кадайын өршээр.

¹⁴Кадайының кандыг-даа аазаашкынын база бодун кызыгаарланыр дээш аашкынган кандыг-даа даңгыраан ашаа кижи чок-ла болза чүүлзүнүп, чок-ла болза күш чок болдуруп каап болур.

¹⁵Бир эвес ашаа кижи ол дугайында даартагы хүнге чедир чүү-даа дивес болза, ол ыыт чогу-биле кадайының аазаашкыннары биле даңгырактарын шуптузун чүүлзүнген-дир, чүге дээрге ол дугайында дыңнап кааш, чүү-даа дивээн-дир.

¹⁶А ашаа кижи ол дугайында дыңнап каан соонда, элээн үе эрткенде, кадайының аазаашкыннары биле даңгырактарын күүсеттирбейн барган болза, кадайының буруузун боду чүктээр».

¹⁷Дээрги-Чаяакчының Моисейге дужааганы, ашак-кадай улус аразында база адазы биле ооң аал-оранында чурттап турар аныяк уруунуң аразында харылзаалар дугайында дүрүм-хоойлу ол-дур.