Read Ыдыктыг Библия, 2011 Числа 4 Bible Online

Числа 4 - Ыдыктыг Библия, 2011 bible

Числа 4

¹Дээрги-Чаяакчы Моисей биле Ааронга мынча дээн:

²«Левийниң аймааның аразындан Кохаттың үре-салгалын оларның төрел бөлүктерин, ада-өгбезин барымдаалап санап каг —

³үжен хардан бежен хар чедир назылыг, Ужуражылга майгынынга ажылдаар албан-хүлээлгезин күүседип шыдаар шупту эр улусту санап каг.

⁴Кохаттың үре-салгалының майгынга кылыр ажылдары аажок ыдыктыг чүүлдер-биле харылзаалыг болур.

⁵Турлагда чон көжүп үнер деп турда, Аарон оолдары-биле майгынче киргеш, көжегени дүжүргеш, ооң-биле ыдыктыг аптараны шып кагзын.

⁶Оон аптараны тахаш кештеринден даараан шывыг-биле шыпкаш, ооң кырынга көк өңнүг, бүдүн кезектен бүткен пөстү чаткаш, көдүрткүүш-мергелерни кедирип кагзын.

⁷Ыдыктаан хлебтер салыр ширээге көк өңнүг шывыг чаткаш, аңаа тавактар, хымыштар, арага кудуп, чажар аяктар болгаш дашкаларны салып кагзын; ширээ кырынга үргүлчү эккеп салыр ужурлуг өргүл хлебтерин салып каан турзун.

⁸А ол бүгүнү кызыл өңнүг шывыг-биле, оон тахаш шывыг-биле шыпкаш, көдүрткүүш-мергелерни кедирип кагзын.

⁹Көк өңнүг шывыгны ап алгаш, чырыткыны база ооң деңнерин, дең өзээ үзе ызырар кыскаштарны, дең кыпсырда ажыглаар саваларны, чырыткыга ажыглаар олива үзү кудар хамык саваларны шып кагзын.

¹⁰Оон чырыткыны база ооң хамык херекселдерин тахаш шывыг-биле ораай шыпкаш, көдүрткүүш-мергеге ааттындыр азып кагзын.

¹¹Айдызаар алдын бедигээшке көк өңнүг шывыгны чаткаш, ону тахаш шывыг-биле шыпкаш, бедигээштиң көдүрткүүш-мергелерин кедирип кагзын.

¹²Олар ыдыктыг майгынга ажыглаар хамык эт-херекселдерни ап алгаш, көк өңнүг шывыг-биле ораагаш, тахаш шывыг-биле шыпкаш, көдүрткүүш-мергеге азып кагзын.

¹³Өргүл салыр бедигээштиң хүлүн аштап каапкаш, ону кызыл-хүрең өңнүг шывыг-биле шып кагзын.

¹⁴Өргүл бедигээжинге ажыглаар хамык эт-херекселдерни: көс дажыглаар хүүрекчигештерни, илбектерни, хүл-узарларны, хан кудар аяктарны бедигээш кырынче салып кааш, ону тахаш шывыг-биле шыпкаш, ооң көдүрткүүш-мергелерин кедирип кагзын.

¹⁵Турлагда чон көжүп үнер деп турда, Аарон оолдары-биле ыдыктыг майгынны база ооң хамык эт-херекселдерин шып каан соонда, Кохаттың үре-салгалы ол бүгүнү дажыглаар дээш чедип келзин, ынчалза-даа олар ыдыктыг чүүлдерге дегбезин — оон башка өлүп каарлар.

¹⁶Аарон бараалгакчының оглу Элеазарның хайгааралында турар чүүлдер бо-дур: чырыткыже кудар олива үзү, айдызаар чаагай чыттыг холуксаа, үргүлчү эккеп салыр ужурлуг далган-тараа өргүлү болгаш шилип чаар олива үзү. Элеазарның хайгааралынга бүгү ыдыктыг майгын болгаш ында бар хамык эт-херекселдер турар».

¹⁷Дээрги-Чаяакчы Моисей биле Ааронга мынча деп чугаалаан:

¹⁸«Кохаттың төрел бөлүү левиттер аразынга узуткаттырып аар кылдыр кылбаңар.

¹⁹Харын улус аажок ыдыктыг чүүлдерже чоокшулап тура, дириг артып, өлбезин дээш, мынчалыңар: Аарон оолдары-биле майгынче киргеш, оларны кылыр ажылының база дажыглаар чүъгүнүң чанынга тургузуп кагзын.

²⁰А ыдыктыг чүүлдерни шарып турда, Кохаттың үре-салгалы ынаар көрбезин — оон башка өлүп каарлар».

²¹Дээрги-Чаяакчы Моисейге мынча деп чугаалаан:

²²«Гирсоннуң үре-салгалын оларның төрел бөлүктерин, ада-өгбезин барымдаалап санап каг —

²³үжен хардан бежен хар чедир назылыг, Ужуражылга майгынынга ажылдап-даа, аңаа албан-хүлээлгезин күүседип-даа шыдаар эр улустуң шуптузун санап каг.

²⁴Гирсоннуң үре-салгалының чүък дажыглап ажылдап тургаш, кылыр чүүлдери бо-дур.

²⁵Олар майгынның бодун база шывыгларын, ооң дээвиир-шывыын, кырынга салыр тахаш шывыын, майгынче кирер черни дуглаар көжегени дажыглазын.

²⁶Майгынны база өргүл салыр бедигээшти долгандыр турар херимниң шывыгларын, ынаар кирер хаалга-шывыгны, шупту шывыгларның хендирлерин база оларга хамааржыр хамык эт-херекселди дажыглазын. Гирсоннуң төрел бөлүү ол бүгү чүүлдерге хамаарыштыр кылыр ужурлуг шупту ажылдарны кылзын.

²⁷Гирсоннуң үре-салгалы чүък дажыглаар база өске-даа хамык ажылдарны Аароннуң болгаш ооң оолдарының айытканын ёзугаар кылзын. Оларга дажыглап турар бүгү чүүлдери дээш ээ-харыысалганы хүлээндирип калыңар.

²⁸Гирсоннуң үре-салгалының төрел бөлүү Аарон бараалгакчының оглу Ифамарның хайгааралы-биле Ужуражылга майгынынга ол ажылдарны кылыр ужурлуг».

²⁹«Мерариниң үре-салгалын оларның төрел бөлүктерин, ада-өгбезин барымдаалап санап каг —

³⁰үжен хардан бежен хар чедир назылыг, Ужуражылга майгынынга ажылдап, албан-хүлээлгезин күүседип шыдаар шупту эр улусту санап каг.

³¹Оларның майгынга ажыл-албан кылып, дажыглаар чүүлдери бо-дур. Олар майгынны тудуп турар рамкаларны болгаш доора оорга ыяштарны, адагаштарны болгаш дөжектерни дажыглазын.

³²Майгынны долгандыр турар херимниң бүгү талаларында адагаштарын, оларның дөжектерин, өргеннерин, хендирлерин, ол бүгүге ажыглаар хамык эт-херекселдерин база дажыглазын. Кижи бүрүзүнге ооң дажыглаар ужурлуг эт-херекселин тодарадып бериңер.

³³Мерариниң үре-салгалының төрел бөлүү Ужуражылга майгынынга Аарон бараалгакчының оглу Ифамарның хайгааралы-биле ол бүгү ажылдарны кылыр ужурлуг».

³⁴Моисей, Аарон болгаш израиль ниитилелдиң баштыңнары Кохаттың үре-салгалын оларның төрел бөлүктерин, ада-өгбезин барымдаалап санааш,

³⁵үжен хардан бежен хар чедир назылыг, Ужуражылга майгынынга ажылдаар албан-хүлээлгезин күүседип шыдаар шупту эр улусту санап кааннар.

³⁶Оларның төрел бөлүүн санаарга, 2750 эр кижи бар болган.

³⁷Кохаттың төрел бөлүүнден санаттынган, майгында бараан болуп турар улус шупту ол-дур; Моисей биле Аарон оларны Дээрги-Чаяакчының Моисейни дамчыштыр берген айтыышкынын ёзугаар санап каан.

³⁸Гирсоннуң үре-салгалын оларның төрел бөлүктерин, ада-өгбезин барымдаалап санааш,

³⁹үжен хардан бежен хар чедир назылыг, Ужуражылга майгынынга ажылдаар албан-хүлээлгезин күүседип шыдаар шупту эр улусту санап кааннар.

⁴⁰Оларның төрел бөлүүн ада-өгбезин барымдаалап санаарга, 2630 эр кижи бар болган.

⁴¹Гирсоннуң үре-салгалының төрел бөлүүнде санаттынган, майгында бараан болуп турар улус шупту ол-дур; Моисей биле Аарон оларны Дээрги-Чаяакчының айтыышкынын ёзугаар санап каан.

⁴²Мерариниң үре-салгалын оларның төрел бөлүктерин, ада-өгбезин барымдаалап санааш,

⁴³үжен хардан бежен хар чедир назылыг, Ужуражылга майгынынга ажылдаар албан-хүлээлгезин күүседип шыдаар шупту эр улусту санап кааннар.

⁴⁴Оларның төрел бөлүүн санаарга, 3200 эр кижи бар болган.

⁴⁵Мерариниң үре-салгалының төрел бөлүүнде санаттынган улус ол-дур; Моисей биле Аарон оларны Дээрги-Чаяакчының Моисейни дамчыштыр берген айтыышкынын ёзугаар санап каан.

⁴⁶Моисей, Аарон болгаш израиль чоннуң баштыңнары шупту левиттерни оларның төрел бөлүктерин, ада-өгбезин барымдаалап санап каан.

⁴⁷[47-48] Үжен хардан бежен хар чедир назылыг, Ужуражылга майгынынга ажылдап-даа, аңаа албан-хүлээлгезин күүседип-даа шыдаар шупту эр улусту санаарга, 8580 кижи бар болган.

⁴⁸

⁴⁹Дээрги-Чаяакчының дужаалын ёзугаар, Моисейниң хайгааралының адаа-биле левит кижи бүрүзүнүң кылыр ажылдарын, дажыглаар чүъгүн тодараткаш, оларның шуптузун Дээрги-Чаяакчының Моисейге дужааганын ёзугаар санап каан.