Read Ыдыктыг Библия, 2011 Числа 8 Bible Online

Числа 8 - Ыдыктыг Библия, 2011 bible

Числа 8

¹Дээрги-Чаяакчы Моисейге мынча деп чугаалаан:

²«Ааронга дыңнадып: „Чырыткының деңнерин кыпсып каарыңга, чеди дең чырыткының мурнунда черни чырыдар ужурлуг“ — деп чугаалап каг».

³Аарон шак ынчаар кылып, Дээрги-Чаяакчының Моисейге дужааганын ёзугаар, деңнерни чырыткының мурнунче чырыдар кылдыр тургускаш, кыпсып каан.

⁴Чырыткының тургузуу бо-дур: ону сывындан эгелээш, чечек бүрүлеринге чедир [7], Дээрги-Чаяакчының Моисейге көргүскен хевири олчаан кылдыр, алдындан хевилей соктап кылып каан.

⁵Дээрги-Чаяакчы Моисейге мынча деп чугаалаан:

⁶«Израиль чоннуң аразындан левиттерни аңгылап алгаш, оларны арыглап каг.

⁷Левиттерни мынчалдыр арыглаар сен: оларже бачыт арыглаар сугну бызай чаш; олар мага-бодун бүрүнү-биле тазартыр чүлүп, хептерин чуп алзын. Ынчан левиттер арыгланы бээр.

⁸Олар бугажыкты база ооң-биле кады салыр далган-тараа өргүлүн — олива үзү холаан, эң шынарлыг кызыл-тас далганын ап алзын: бачыт дээш өргүл кылдыр өске бугажыктан база ап аар сен.

⁹Оон левиттерни Ужуражылга майгынының мурнунга эккелгеш, израиль чоннуң бүгү ниитилелин чыыптар сен.

¹⁰Левиттерни Дээрги-Чаяакчының мурнунга эккээриңге, израильчилер оларга холун дегзир ужурлуг.

¹¹А Аарон левиттерни израиль чоннуң өмүнээзинден салган онза өргүл кылдыр Дээрги-Чаяакчыга бараалгатсын — олар ынчан Аңаа бараан болуушкунун күүседир.

¹²Левиттер холдарын бугажыктарның бажынга салзын; бир бугажык — Дээрги-Чаяакчыга салган бачыт дээш өргүл, өскези — бүрүн өрттедир өргүл болур. Ол өргүлдер левиттерни арыглап каар.

¹³Аароннуң болгаш ооң оолдарының мурнунга левиттерни тургускаш, оларны Дээрги-Чаяакчыга салган онза өргүл кылдыр бараалгат.

¹⁴Левиттер Мээңии болу берзин дээш, оларны израиль чоннуң аразындан аңгылап каг.

¹⁵Олар ооң соонда — сен оларны арыглааш, Меңээ онза өргүл кылдыр салганың соонда — Ужуражылга майгынынга ажылдар кылыр дээш, ынаар кире бээрлер.

¹⁶Чүге дээрге оларны Меңээ израиль чоннуң аразындан бүрүнү-биле хүлээдип берген, оларны Мен израиль чоннуң кандыг-даа баштай төрүттүнген оолдарының орнунга Бодумга ап алган мен.

¹⁷Израильде кандыг-даа дун төл — кижиниң-даа, мал-маганың-даа дун төлү — Мээңии болур, египет черде бүгү дун төлдерни узуткап каан хүнүмде израиль чоннуң дун төлдерин Бодумга аңгылап ыдыктап алган мен.

¹⁸Мен израиль чоннуң бүгү дун төлдериниң орнунга левиттерни Бодумга ап алган мен.

¹⁹Левиттерни израиль чоннуң аразындан аңгылап алгаш, Ааронга болгаш ооң оолдарынга хүлээдип бердим — левиттер шупту израиль чоннуң өмүнээзинден Ужуражылга майгынынга ажылдар кылып, Мээң килеңимни чондан чайладып турзун. Ынчан ыдыктыг майгынче чоокшулап-даа турза, израильчилерже айыыл-халап салбас мен».

²⁰Моисей, Аарон база бүгү израиль чон левиттерге хамаарыштыр Дээрги-Чаяакчының Моисейге дужааганын ёзугаар кылган.

²¹Левиттер бачыттан арыгланып, хептерин чуп алган; Аарон оон оларны Дээрги-Чаяакчыга онза өргүл дег кылдыр бараалгаткан болгаш левиттерни арыг кылып каар дээш арыглаашкын ёзулалын күүсеткен.

²²Ооң соонда левиттер Аароннуң болгаш ооң оолдарының хайгааралы-биле ажылдар кылыр дээш Ужуражылга майгынынче кире бергеннер. Аарон оолдары-биле левиттерге хамаарыштыр Дээрги-Чаяакчының Моисейге дужааганын ёзугаар кылган.

²³Дээрги-Чаяакчы Моисейге мынча деп чугаалаан:

²⁴«Левиттерге хамаарышкан дүрүм бо-дур: чээрби беш хардан өрү назылыг левит кижи бүрүзү майгынга ажылдаар албан-хүлээлгени күүседир ужурлуг:

²⁵а бежен харлаан соонда, албан-хүлээлгезин күүседиринден хосталып, оон ыңай ажылдавас ужурлуг.

²⁶Ол ынчан ха-дуңмазынга майгынга албан-хүлээлге күүседиринге дузалашсын, ынчалза-даа боду ажылдар кылбазын. Левиттерниң күүседир албан-хүлээлгезин тодарадып тура, ол дүрүмнү сагып чор».