Read Ыдыктыг Библия, 2011 Числа 9 Bible Online

Числа 9 - Ыдыктыг Библия, 2011 bible

Числа 9

¹Дээрги-Чаяакчы израильчилерниң египет черден хосталып үнгениниң ийиги чылының бирги айында Синай ховузунга Моисей-биле чугаалашкаш:

²«Израиль чон Хосталыышкын байырлалын доктааткан үеде демдеглеп эрттирзин.

³Бо айның он дөртте, имир дүшкенде, ону эрттирер кылдыр доктаадып каан үеде, ооң бүгү ёзулал-чаңчылдарын сагывышаан, демдеглеп байырлаңар» — дээн.

⁴Моисей оон израиль чонга Хосталыышкын байырлалы эрттирерин дужааган.

⁵Улус ону Синай ховузунга бир айның он дөртте, имир дүшкенде, демдеглеп эрттирген. Израиль чон бүгү чүвени, Дээрги-Чаяакчы Моисейге канчаар дужааганыл, ынчаар күүсеткен.

⁶Чамдык улус өлүг кижилерниң мага-бодунче чоокшулааш, арыг эвес апарган болгаш, Хосталыышкын байырлалын ол хүн демдеглеп эрттирип шыдавайн барган. Олар Моисей биле Ааронга ол-ла хүн чедип келгеш,

⁷Моисейден: «Өлген кижилерниң мага-бодунче чоокшулааш, арыг эвес апардывыс; израиль чоннуң аразынга Дээрги-Чаяакчыга өргүлдү доктааткан үеде эккеп салыр аргавысты казаан херээ чүл?» — деп айтырганнар.

⁸Моисей оларга: «Манап туруңар, Дээрги-Чаяакчының силерге хамаарыштыр чүү деп дужаарын дыңнаптайн» — дээн.

⁹Дээрги-Чаяакчы Моисейге мынча деп чугаалаан:

¹⁰«Израиль чонга мону чугаала. Силерниң кайы-бирээңер азы үре-салгалыңар секче чоокшулааш, арыг эвес апарган азы ырак орукка чораан-даа болза, ол кижи база Дээрги-Чаяакчыга бараалгаткан Хосталыышкын байырлалын демдеглеп эрттирер ужурлуг.

¹¹Ийи айның он дөртте, имир дүшкенде, ол кижи ону демдеглеп эрттирзин, байырлал малының эъди-биле кады ажыткы-биле хөөтпейн хаарган далганнар болгаш ажыг оът холуу чизин.

¹²Малдың эъдин даартагы эртенге чедир арттырбазын база ооң сөөктерин сыкпазын; Хосталыышкын байырлалын демдеглеп эрттирерде, ооң шупту дүрүмнерин сагызын.

¹³А арыг болгаш орукка чорбаан кижи Хосталыышкын байырлалын демдеглеп эрттирбээн болза, ол кижини чонунуң аразынга амылыг арттырбас, чүге дээрге Дээрги-Чаяакчыга салыр өргүлүн доктааткан үеде эккелбээн-дир, ол кижи бачыдын боду чүктээр.

¹⁴Дээрги-Чаяакчыга бараалгаткан Хосталыышкын байырлалын демдеглеп турар кижи силерниң араңарда чурттай берген даштыкы кижи болза, ол кижи шупту ёзулал-чаңчылдарны барымдаалап, ону демдеглеп эрттирер ужурлуг. Өскээртен келген кижиге-даа, үндезин чурттакчыга-даа чаңгыс аай дүрүм турзун».

¹⁵Ужуражылга майгынын — ыдыктыг өргээни тип каан хүнде ону булут шыва апкан. Кежээден эгелээш, эртенге чедир майгын кырынга от ышкаш чүве чырып хонар турган.

¹⁶Үргүлчү ындыг бооп келген: хүндүс [8] майгынны булут бүргей дуглаар, а дүне ооң кырынга от ышкаш чүве чырып хонар.

¹⁷Кажан булут майгынның кырындан көдүрлү бээрге, израиль чон ооң соондан көжүп үнер, а булут каяа доктаар-дыр, олар база аңаа доктаар болу берген.

¹⁸Израиль чон шак ынчаар, Дээрги-Чаяакчының дужаалын ёзугаар, көжүп үнер база турлагжып доктаар турган; кажан булут майгынның кырынга шимчевейн турар үеде, олар база ол черге турар турган.

¹⁹Бир эвес булут майгынның кырынга үр үеде шимчевейн турар болза, израильчилер база Дээрги-Чаяакчының айтыышкынын эдерип, көжүп үнмес турганнар;

²⁰чамдыкта булут майгынның кырынга каш хонук иштинде турар болган: олар ынчан Дээрги-Чаяакчының айтыышкынын ёзугаар доктаап, база-ла Ооң айтыышкынын ёзугаар көжүп үнүп турган.

²¹Чамдыкта булут чүгле дүннү өттүр доктаап турупкаш, эртен көдүрлүрге, олар база көжүп үнүп турган, чамдыкта булут хондур-хүнзедир шимчевейн туруптар болган, а ол көдүрлүрге-ле, олар көжүп үнүп турган.

²²Бир эвес булут майгын кырынга ийи хонук азы бир ай дургузунда, азы оон үр үеде шимчевейн турар болза, израиль чон көжүп үнмейн, манап артар турган, а ол көдүрлүрү билек, шимчеп үнүптер турган.

²³Израильчилер Дээрги-Чаяакчының айтыышкынын ёзугаар турлагжып доктаап, көжүп үнүп турганнар — олар Дээрги-Чаяакчының Моисейни дамчыштыр берген дужаалын ёзугаар Ооң айтыышкынын сагып келгеннер.