Read Ыдыктыг Библия, 2011 Михей 4 Bible Online

Михей 4 - Ыдыктыг Библия, 2011 bible

Михей 4

¹Сөөлгү хүннер кээрге, Дээрги-Чаяакчының өргээзи турар дагны Ол өске бүгү тейлер, даглардан бедидир тургузуп каар; өске аймактар ынаар чедип кээр,

²эңдерик чоннар аңаа чыглып кээр. Олар бот-боттарынга: «Барып, Дээрги-Чаяакчының даанче, Иаковтуң Бурганының өргээзинче үне берээли. Бурган бисти Ооң оруктары-биле чоруурунга өөредип каар, бис Ону эдерер бис» — дижир. Сиондан ыдыктыг хоойлу дүжүп кээр, Иерусалимден Дээрги-Чаяакчының сөзү тараар.

³Аймактарның херээн Ол шиитпирлээр, ырак чурттарда күштүг чоннарның чаргы-чаалызын Ол үзер. Олар боттарының хылыштарын андазыннарже, чыдаларын — хол кадыырларынче эде соп кылып аар. Бир чон өске чонга удур хылыш көдүрбес, олар моон соңгаар дайын чорударынга өөренмес.

⁴Кижи бүрүзү бодунуң виноградын, бодунуң фига ыяжын болбаазырадып, тайбың чурттаар, оларны моон соңгаар кым-даа коргудуп-дүвүретпес, чүге дээрге Аг-шериглиг Дээрги-Чаяакчы ынча деп чугаалаан болгай.

⁵Бүгү өске чоннар боттарының бурганнарының аайы-биле чурттап турар, а бис кезээ мөңгеде Бурганывыс Дээрги-Чаяакчының аайы-биле чурттаар бис.

⁶«Ол хүн Мен аскак-бүскек чонну чыыптар мен — деп, Дээрги-Чаяакчы медеглээн. — Шөлүттүрген улусту, Мээң оларже айыыл-халап ытканым улусту чыглыр кылыптар мен.

⁷Аскак-бүскек чондан Израильдиң артынчызын тургузар мен, ойлаттырган улусту күштүг чон кылып каар мен. Шак ол хүнден эгелээш, Дээрги-Чаяакчы мен оларны Сион дагдан кезээ мөңгеде чагырар мен.

⁸А сеңээ хамаарыштыр, Сион тей. Сен Бурганның Бодунуң чонун, кадарчы кижи кодан малын хайгаарааны дег, көрүп турар суургазы сен. Биеэги эрге-чагыргаң сенче эглип кээр, Иерусалимге катап база күрүне доктаап турар.

⁹Сен чүү дээш алгырып тур сен? Хааның чок чүве бе? Сээң чөвүлекчиң чок апарган бе? Божуп чыдар херээжен дег, аарышкыга алзып чооруң ол?

¹⁰Сион-кыс, божуп чыдар херээжен дег, хилинчектенип, човуурта, чүге дээрге сен ам хоорайны каапкаш, ажык шөлге турумчуп аар сен, Вавилонче чеде бээр сен. Ооң соонда аңаа камгалал алыр сен, Дээрги-Чаяакчы сени аңаа дайзыннар холундан хостап аар.

¹¹Ам сеңээ удур хөй чоннар чыглып келгеш: „Ол бужартазын! Бистиң карактарывыс Сионнуң буураарын мага хандыр көрүп алзын!“ — дижип турар-дыр.

¹²Ынчалза-даа ол чоннар Дээрги-Чаяакчының бодалдарын билбейн турар-дыр. Бурган оларны тараа шаңынга моожалар дег чыып алган, а олар Ооң бодаан чүүлүн угаап билбээн-дир.

¹³Көдүрлүп келгеш, ол моожаларны таптай бастыр-ла, Сион-кыс; Мен сени демир мыйыстыг, хүлер дуюгларлыг буга дег кылып каар мен, хөй чоннарны чылча шавар сен. Оларның эт-хөреңгизин Дээрги-Чаяакчыга, оларның байлаан — бүгү чер-делегейниң Чагырыкчызынга бараалгадыр сен».