Read Ыдыктыг Библия, 2011 Михей 6 Bible Online

Михей 6 - Ыдыктыг Библия, 2011 bible

Михей 6

¹Дээрги-Чаяакчының чугаалаар чүвезин дыңнаңар. Чон база туруп келгеш, дагларның мурнунга херээн чугаалазын, тейлер ооң сөзүн дыңназын.

²Даглар, чер-делегейниң быжыг үндезиннери, Дээрги-Чаяакчының чаргызын дыңнаңар. Чүге дээрге Ол Бодунуң чону-биле чаргылдажып турар-дыр, Израиль-биле Ол маргыжып турар-дыр:

³«Мээң чонум, сени Мен канчапкан мен? Чүнүң-биле сээң шыдамыыңны шенедим? Меңээ харыылап көр.

⁴Мен сени египет черден үндүре берген мен, кулданыышкындан хостап каан мен. Моисей, Аарон болгаш Мариам оларны сени баштаар кылдыр чоруткан мен.

⁵Мээң чонум, Моавтың хааны Валактың чүнү бодап алганын, Беорнуң оглу Валаамның аңаа чүү деп харыылаанын сактып кел, Ситтимден Галгалга чедир орууңну [6] бодап кел. Дээрги-Чаяакчының чөптүг херектерин билип алыңар».

⁶Чүнүң-биле Дээрги-Чаяакчының мурнунга кээр мен, Дээди Өрүкү Бурганның мурнунга чүнүң-биле кээп мөгеер мен? Ооң мурнунга бүрүн өрттедир өргүлдерлиг, бир харлыг бызааларлыг кээр мен бе?

⁷Муң-муң кошкарлар-биле, эмге-тикчок хемнер дег аккан олива үзү-биле Дээрги-Чаяакчының күзелин хандырып болур бе? Кем-буруум дээш Аңаа дун оглумну өргүүр мен бе, сагыш-сеткилимниң бачыды дээш иштимден үнген үре-төлүмнү бээр мен бе?

⁸О, кижи амытан, Бурган сеңээ Ооң экизинер чүүлү чүдел дээрзин чугаалап каан ийик. Дээрги-Чаяакчы сенден чүнү негеп турар ийик: ажыл-херектериңге чөптүг бооруңну, энерел көргүзеринче чүткүлдүг бооруңну болгаш Бурганыңның мурнунга томаарып чурттаарыңны эвес чүве бе?

⁹Дээрги-Чаяакчы хоорайны кыйгырып тур (мерген угаан дээрге Сээң адыңдан коргары болгай): «Чагырга мергезин база ону тургузуп каан Бурганны тооп дыңнаңар [7].

¹⁰Бузуттуг улустуң бажыңында байлакты багай үүлгедиг-биле чедип алган эвес чүве бе? Эвээжедип каан, каргаттырган хемчээл ажыглап турар эвес чүве бе?

¹¹Шын эвес деңзилер, меге хемчээлдер ажыглаар кижини агартыр мен бе?

¹²Сээң байларың каржы-дошкун-дур, чурттакчыларың меге чүве чугаалаар-дыр, оларның аксындан чүгле меге үнер-дир.

¹³Ол дээш, Мен сээң когуң үзүп эгелээн мен, бачыттарың дээш сени хоозурадып эгелээн мен.

¹⁴Чемненгеш-даа, тотпас сен, ишти-хырның куруг болур; чыып шыгжааш-даа, камнап ап шыдавас сен: камнап шыдаптар-даа болзуңза, ол чүвеңни хылышка хүлээдип бээр мен.

¹⁵Тарып олурткаш-даа, дүжүт ажаап албас сен, оливкаларны сыскыргаш-даа, үзү-биле чагдынмас сен; виноград чулуун сы баскаш-даа, арага ишпес сен.

¹⁶Омри хаанның чаңчылдарын, Ахав хаанның өг-бүлезиниң бүгү бузуттуг херектерин хевээр арттырып алган сен, оларның сүмелерин ёзугаар кылып турган сен. Ынчангаш Мен хоорайны хоозуралга, ооң чурттакчыларын — бак атка киреринге таварыштырар мен; силер өске чоннарның дорамчылалынга таваржыр силер».