Read Ыдыктыг Библия, 2011 Наум 1 Bible Online

Наум 1 - Ыдыктыг Библия, 2011 bible

Наум 1

¹Бурганның Элкос чурттуг Наумга ажытканы өттүр билиишкин бижээн ном бо-дур. Мында Ниневия хоорай дугайында көстүүшкүн бижиттинген.

²Дээрги-Чаяакчы — хүннээчел, өжээн негекчизи Бурган. Ол — өжээн негекчизи, Ол кедергей килеңнээн. Дээрги-Чаяакчы Бодунуң дайзыннарындан өжээн негээр, Ол Бодунуң өжээтеннеринге соксаал чок килеңнээр.

³Дээрги-Чаяакчы килеңин үр тудуп шыдаар, ындыг-даа болза, Ооң күчү-күжү өндүр улуг, Ол буруулугларны кеземче чок арттырбас. Хат-шуурган, казыргы Ону эдерип чоруур, Ооң буду булуттарны, довурак ышкаш, базып чоруур.

⁴Ол далайны чемелээрге, далай кадып каар, бүгү хемнер соглуп каар, Васан биле Кармил деп дүжүткүр черлер кургап каар, Ливан дагларының үнүжү оңа бээр.

⁵Ооң мурнунга даглар сирилээр, тейлер эстип чиде бээр; Ону көргеш, чер-делегей — өртемчей болгаш ооң бүгү чурттакчылары сириңейни бээр.

⁶Ооң хорадаан сагыжынга удур кым туржуп шыдаарыл? Ооң кыптыккан килеңин кым шыдажырыл? Ооң килеңи от дег чаттыларга, хаялар Ооң мурнунга буступ турар.

⁷Дээрги-Чаяакчы ачылыг, Ол — айыыл-халап хүнүнде шивээ-дир. Ол Оон хоргадал дилээн улусче сагыш салыр.

⁸А Ниневия хоорайны Ол хөме алыр үер-биле узуткап каар. Ооң дайзыннарын дүмбей караңгы бүргей аптар.

⁹Дайзыннар Дээрги-Чаяакчыга удур чүнү-даа бодап алган болза, Ол оларны узуткап каар, өжээтен ооң соонда катап көдүрлүп шыдавас.

¹⁰Олар тенниг чадаң үнүштер дег ораажып, арагачылар дег эзирип каар, кургаг оът-сиген дег, отка бүрүнү-биле чиртип аар.

¹¹Дээрги-Чаяакчыга удур бак чүве үүлгедирин бодаар, бузуттуг чүүл сүмелээр кижи сенден үндү чоп, Ниневия.

¹²Дээрги-Чаяакчы: «Байдалы айыыл чок-даа болза база дыка хөй санныг-даа болза, олар, кыргыдып-хыдыткаш, чиде бээр; а сени, Иудея, Мен хилинчектеп-даа турган болзумза, моон соңгаар ынчанмас мен.

¹³Мен ам сээң мойнуңда дөңгүнү уштур мен, кинчи-бегиңни үзе тыртар мен» — дээн.

¹⁴А сеңээ [1] хамаарыштыр Дээрги-Чаяакчы: «Моон соңгаар сээң адың эдилээн үре-салгал турбас. Мен сээң бурганнарың өргээлеринде шуткуп, чонуп алганың дүрзүлерни буза шавар мен, чөгенчиг сеңээ чевег-хөөрден белеткеп каар мен» — дээн.

¹⁵Көр даан, даглар кезип буянныг медээ чедирикчизи, амыр-тайбың медээлекчизи кылаштап кел чыдыр: «Иудея, бодуңнуң байырлалдарың демдеглеп байырла, Бурганга даңгырактарың күүсет. Дүржок кижи сээң чериңче катап база чаза базып кирбес — ол бүрүнү-биле узуткаттырган» — дээн.